Budyšin (SN/at). Budyska wokrjesna lutowarnja poskićuje w dźesać ze swojich 21 filialow widejowy serwis. Trěbna technika bu tam instalowana. To potrjechi filiale w Budyskej Strowotnej studni, na Ericha Weinertowej a Nowosólska, we Wjazońcy, Załomju, Budestecach a Małym Wjelkowje. Wo tym je kreditny institut wčera informował. W Großharthauwje, Zemicach-Tumicach a Njeswačidle lutowarnja městny serwis jenož přez widejo zaruča. Nětko přiměrja serwisowy čas za widejowu posłužbu wot 1. awgusta w mjenowanych dźesać filialach wot póndźele do pjatka wot 9 do 18 hodź.

W Njeswačidle wjesnjanosta Gerd Schuster (CDU) dobre nazhonjenja z widejoserwisom wobkrući. „Posłužowanje je zdobom za staršich ludźi jara jednore“, wón měni a ma za wažne, zo „je so Budyskej wokrjesnej lutowarni poradźiło, we wjesnym rumje serwis na městnje wobchować“. Dalši dopokaz je praksa. Lutowarnja rěči wo měsačnje wjace hač 500 serwisowych rozmołwach, kotrež nětko hižo z pomocu widejoweje techniki wjedu. Tak lutowarnja kontakt z klientami wosebje na wsy wudźeržuje.

Drježdźany (dpa/SN). Sakski kabinet je nowemu programej EU za brunicowe regiony přihłosował, z kotrehož je přichodnje 645 milionow eurow k dispoziciji. Konkretnje jedna so wo program Just Transition Fund (JTF), zdźěli hospodarske ministerstwo Swobodneho stata Sakska minjenu wutoru po posedźenju sakskeho kabineta. We łužiskim rewěrje chcedźa hač do lěta 2027 spěchowanske srědki we wobjimje 375 milionow eurow zasadźić, w srjedźoněmskim rewěrje je to 200 milionow eurow a městu Kamjenicy ma 70 milionow eurow k dispoziciji być. Spěchowanske srědki EU chcedźa z priwatnymi a srědkami kraja dale wudospołnjeć, tak zo wučinja cyłkowna suma samo hač do 1,3 miliardy eurow.

Ličba filialow lutowarnje we wokrjesomaj Budyšin a Zhorjelc je w běhu minjenych 30 lět wo tójšto woteběrała. Kóžda na wsach zawrjena wotnožka je klientam přidatne puće nabrěmjeniła. Wosebje starši ludźo słušachu k přěhračkam. Zo njeby tam dale klientow zhubiła, spyta lutowarnja Hornja Łužica-Delnja Šleska z mobilnej filialu serwis we wjesnym rumje zaručić. Budyska wokrjesna lutowarnja bě so za rozrisanje w zwisku z digitalizaciju rozsudźiła. Online-banking, app lutowarnje – to mnohim njejstej cuzej wopřijeći. Zwostanu pak tajcy, kotřiž so na to hišće njezwěrja. Tohodla zda so widejowy serwis spomóžna alternatiwa być. Wuměnjenje, zo je posłužowanje trěbneje techniki jednore, je rozsudny faktor za to, zo ludnosć poskitk přiwozmje. W Njeswačidle tomu woprawdźe tak je. Klienća móža na wobrazowce rozmołwnej partnerce mjezwoči hladać a tak bóle wosobinski poćah k njej natwarić. Digitalizacija žadyn čertowski grat njeje. Axel Arlt

Budyšin (CS/SN). Wjacore iniciatiwy, kotrež so w Budyšinje „zelenym“ temam wěnuja, přeprosychu předwčerawšim na „Zeleny dźeń“ před Němsko-Serbske ludowe dźiwadło. Tam běchu swoje stejnišća natwarili, zo móhli wo swojich zaměrach informować a ludźi k sobu činjenju pohnuwać. Ze zastupjerjemi iniciatiwow so Manja Gruhn rozmołwješe a jich dźěło předstaji. Na te wašnje wopytowarjo na přikład wot Steffena Reitziga ze Šešowa wo skutkowanju tak mjenowanych měšćanskich hajnikow zhonichu. Hajnicy staraja so wo zranjene abo wohrožene zwěrjata w měsće.