Brunicowu jamu rozšěrja
Hač do 2044 chcedźa w Pólskej brunicu wudobywać
Žitawa (SN). Wudobywanje brunicy w pólskej brunicowej jamje Turów móže po wobzamknjenju pólskich zarjadow hač do 2044 pokročować, kaž tele dny čěska nowina „Liberecky Deník“ informuje. Njedawno je pólska generalna direkcija za wobswětoškit dalšemu wudobywanju přizwoliła a z tym pruwowanje wo wobswětowu znjesliwosć zakónčiła. Potajkim sćěhuje nětko próstwa wo hórnistwowu dowolnosć. Hač do lěta 2044 chce pólski hórnistwowy koncern PGE wuhlo z brunicoweje jamy, kotraž bjezposrědnje za mjezu z Němskej leži, wudobywać. Tež tu liča z přichilnym stejišćom pólskich zarjadow. To zdźěli njestatna organizacija Greenpeace, kotraž chce tohodla na sudnistwje jednać.
Njeporjad ze systemom
Čehodla lěsne hospodarstwo lěs njerumuje, hdyž su štomy pušćane?
Mnozy ludźo, kotřiž so w lěsach wuchodźuja, su měnjenja, zo wupada njeporjadnje, hdyž wostanu hałuzy a skora po pušćenju štomow w lěsu ležo. Prjedy bě w lěsach wjetši porjad, wšo bě zrumowane, mnozy praja. Tola to ma swoju přičinu, přetož štož w lěsu ležo wostanje, njeje za lěs zhubjene a jemu nješkodźi.
Hospodarsce najbóle požadany dźěl štoma je zdónk, po nim dźěle wjerška, kotrež so hišće jako palne drjewo wužiwaja. Ćim ćeńše su dźěle štoma, ćim ćešo je, tute žnjeć a efektiwnje wužiwać. A wjace prócy nałožować rěka wjace časa nałožować, potajkim wjace pjenjez. Struchle a jednorje prajene rěka to: hospodarsce so njewupłaći, cyły štom hač k wjerškej žnjeć.
Štož ležo wostanje, skići druhim žiwocham přebytk a picu ...
Połoženje je nětko wjetše wužadanje hač w lěće 2015
Zhorjelc (AK/SN). Zhorjelski wokrjes nastaja so na přichad dalšich ćěkancow. „Znowa přichadźeja mnozy ćěkancy ze směra Balkana“, podšmórny krajny rada dr. Stephan Meyer (CDU) njedawno w Zhorjelcu. „Předewšěm ze Słowakskeje a z Čěskeje přijědu kóždy dźeń dalši ćěkancy do Drježdźan. Wottam z připokazanjemi ličimy.“
Kaž w lětomaj 2015 a 2016 sadźa wokrjes na decentralne zaměstnjenje. Předewšěm nastupajo jednotliwych muži w starobje 18 do 30 lět so krajny rada nastaja. Tuchwilu je něhdźe 850 azyl požadacych w dalokej měrje do přebywanišćow rozdźělenych. „Dyrbimy na dalšich ćěkancow přihotowani być“, krajny rada wujasni. Wón začuwa hranicu, jelizo ludźi w sportownjach zaměstnja a so tohodla kulturne a sportowe žiwjenje wobmjezuje.
Dalši solarny park ma blisko Drjowka nastać
Pod mjenom GigawattFactory chce předewzaće Łužiska energija a milinarnje (LEAG) najwjetši centrum wobnowjomnych energijow w Němskej hač do lěta 2030 we Łužicy natwarić. Za dalši wulkoprojekt we wobłuku tohole projekta bu puć zrunany. Zhromadźizna měšćanskich zapósłancow w Drjowku (Drebkau) je minjeny tydźeń nastajenske wobzamknjenje za solarny park „Energijowy park Drjowk“ schwaliła.
Choćebuz/Drjowk (SN/at). Solarny park z planowanym cyłkownym wukonom hač do 140 megawattow je dalši wulkoprojekt fotowoltaiki, kotryž předewzaće EP New Energies (EPNE) jako strategiski partner LEAG we Łužicy wuwiwa a zwoprawdźi. EPNE a LEAG stej sotrowskej předewzaći pod třěchu EPH-holding jako mějićelki LEAG. „Smy kompetencny centrum EPH, zo bychmy na přestrjenjach LEAG a Mibrag projekty za nowe energije wuwili“, wujasni Margarita Schulz, managerka za komunikaciju EPNE na naprašowanje.
Něhdźe 5 000 ludźi demonstrowaše minjeny pjatk na Drježdźanskich ...
Něhdźe 470 ludźi je so wčera na přeprošenje Biskopičanskeho ...
Wulki wothłós za projekt NCA we Wojerecach
Z planowanym Němskim centrumom za astrofyziku (NCA) cyłej Łužicy šansy a wužadanja kiwaja. Nimo podzemskeho slědźenskeho labora blisko Konjec ma hłowne sydło z campusom w Zhorjelcu nastać. Wotnožka je we Wojerecach předwidźana.
Dźeń mištra w stadionje swjećili
Termu snano zaso zawrěja
Korzym (SN). Terma w Korzymju budźe prawdźepodobnje kónc lěta najprjedy raz zawrjena, kaž zdźěli minjeny pjatk zaměrowy zwjazk, kiž termu wobhospodari. Hakle srjedź septembra bu wočerstwjenišćo po wjacorych krizach korony a pobrachowaceho personala dla zaso wotewrjena. Hišće wobstejace zrěčenja z dodawarjemi energije z poměrnje přijomnymi kondicijemi kónc lěta kónča. Za klětu pak liči zaměrowy zwjazk z jasnje wyšimi płaćiznami, kotrež móhli samo dźesać króć wyše być hač tuchwilu. Tež wopytowarjow je tučasnje wo třećinu mjenje. Tuž njehodźi so terma wysokich płaćiznow dla wobhospodarić. Zdobom su klětu reparatury trěbne, při čimž budźe ćežko dźěle za staru techniku dóstać.
Personalna rada je wo nowym wuwiću informowana. Zaměrowy zwjazk prócuje so wo to, zo dóstanu přistajeni nowe dźěłowe městno w komunalnych předewzaćach Budyskeho wokrjesa. Budyski krajny rada Udo Wićaz (CDU) zawrjenje termy wobžaruje. Po jeho słowach je trěbne wo ponowjenju rěčeć. Wobhospodar wuchadźa z toho, zo budźe terma w Korzymju hakle w lěće 2025 zaso přistupna.
Najwjetše wužadanje bě lěta 2002
Budyšin (CS/SN). Štož su sobudźěłaćerjo Sakskeho krajneho zarjadnistwa rěčnych zawěrow (LTV) w minjenych 30 lětach wutworili, móže so widźeć dać. To rjekny sakski wobswětowy minister Wolfram Günther (Zeleni) wčera na fachowym sympoziju składnostnje 30. załoženskeho jubileja zarjadnišća w Budyskej Krónje. Najwjetše wužadanje bě wulka woda 2002. Mjez nowymi nadawki, kotrymž maja so sobudźěłaćerjo stajić, je njedostatk wody. Tón bywa z nowej normalitu. Na tamnej stronje maja z dalšimi situacijemi wulkeje wody ličić. Kwalitu wody zachować, wšako wužiwaja Saksojo 40 procentow pitneje wody z rěčnych zawěrow, je runje tak naročne. System pak pomału hranicu poćežomnosće docpěwa. Ze zapřimnjenja hórnistwa do přirody wodohospodarjam tež we Łužicy generaciski nadawk wurosće, zo bychu zaso sam so regulowacy kołoběh wody docpěli.
