Hač w Sakskej Šwicy, w Harzu abo w Berlinskim Grunewaldźe, wšudźe lěsne wohenje wulke škody zawinuja a kónčinu zniča. Ćim wažniše je, wohenje spěšnje spóznać, tak zo móhli wjetšim škodam zadźěwać. Projekt lěsnych stražnikow Zhorjelskeho wokrjesa móhł wupuć być.
Zhorjelc (SN/BŠe). Tež w Zhorjelskim wokrjesu su lěsne płoniny, hdźež je strach lěsnych wohenjow jara wulki. Předewšěm potrjechi to Hornjołužiske wojerske zwučowanišćo južnje Běłeje Wody. Hladajo na přiběrace horce lěća je wažne, strachi spěšnje spóznać a wupřestrěwanju wohenjow zadźěwać. Pomhać móža při tym nowe techniske móžnosće mobilneje škričkoweje generacije 5G. Hižo w lěće 2020 su w Zhorjelcu za to ideje zběrali a koncept zdźěłali. Wosebite přestrjenje chcedźa tam z trutami kontrolować, lěsne wohenje spóznać a wotpowědne rozsudy w nuzowych situacijach tworić. Ćežišćo projekta je potajkim wosebity lěsny monitoring z nowej techniku, při čimž chcedźa tež sensory zasadźeć. Tajke móhli njewšědne daty wo temperaturje abo wo kurje do wohnjowobornych centralow sposrědkować.