We Wojerowskej kupjeli maja sobudźěłaćerjo wulke wizije a sadźeja mjez druhim tež na turizm

Při zachodźe stejachu ludźo w dołhich rynkach. Swójby, poriki a mnohe skupiny chcychu spočatk nazymskich prózdnin do Wojerowskeje Łužiskeje kupjele. Přichadźa w prózdninskim času stajnje wjele wopytowarjow? „Poprawom haj“, měni Matthias Brauer, wot lěta 2020 jednaćel kupjele. „Kupjel je skerje warianta za špatne wjedro, ale wona je hišće wjele wjace. Cyłe lěto móža ludźo přińć.“ Lětuše lěćo drje bě trochu přerosćene. Jeničce w awgusće je so tam 18 508 ludźi wočerstwiło, štož bě wot wotewrjenja w lěće 1999 rekord. W dobrych lětach mějachu we Łužiskej kupjeli přerěznje něhdźe 13 600 wopytowarjow wob měsac. „Nutřkokrajny turizm přiběra. Mjeztym přichadźeja ludźo samo ze Sylta abo Garmisch-Partenkirchena, zo bychu so z Łužicu zeznajomili“, Matthias Brauer rozprawja. „Město Wojerecy ma we łužiskej jězorinje najwjetšu dožiwjensku kupjel.“ Cyłkownje maja tam 35 sobudźěłaćerjow, kotřiž najwšelakoriše wobłuki zastaruja.