Hižo dlěje hač měsac su hosćency korony dla zawrjene. Runje w dohodownym času bychu wone hewak tójšto wobrota měli. Kak z tym wobchadźeja, smy so w Jědlicy naprašowali.
Jědlica (SN/MWj). Mjeztym zo wobchodnicy starosćiwje na přichodnu póndźelu zhladuja, hdyž dyrbja swój wobchod začinić, je to za Hrebikec swójbu w Jědlicy pola Wotrowa hižo zwučeny staw. Mějićeljo tamnišeho woblubowaneho hosćenca ze žurlu, pensiju a winowej pincu hižo wot spočatka nowembra nikoho pohosćić njesmědźa. Wot lěta 1906 je hosćenc w swójbnym wobsydstwje. Mjeztym dźesać lět jón René Hrebik z mandźelskej Sandru wjedźe. Ale tajke struchłe časy ani wón ani jeho staršej hišće dožiwili njejsu. W normalnych časach sy tam předewšěm kónc tydźenja bjez přizjewjenja lědma městno dóstał. A zwjetša su wulki dźěl blidow serbske swójby z bliskosće wobsadźili. Mnozy dojědźechu sej tam tež składnostnje prěnjeho swjateho woprawjenja abo firmowanja.