Bjaršec lěsniski zawod dale do noweje techniki inwestuje
Smječkecy/Nowy Šěrachow (aha/SN). W lěsu Budyskeho tachantstwa južnje Noweho Šěrachowa sy předwčerawšim dopołnja při najrjeńšim pózdnjonazymskim wjedrje słyšał, zo so wjacori tam zhromadźeni tež serbsce rozmołwjeja. Přičina bě, zo su monterojo firmy z mecklenburgsko-předpomorskeho Malchowa pod nawodom hłowneho jednaćela Güntera Josta Smječkečanskej firmje Achima Bjarša za lěsne posłužby nowu mašinu přepodali. W Finskej produkowany nastroj typa John Deere Rückezug je jedyn z najwjetšich mjenowaneje serije. Wob dźeń zamóže něhdźe 80 do 150 kubiknych metrow rězaneho drjewa pod ekstremnymi wuměnjenjemi na kromu lěsa transportować. Achim Bjarš swoje mašiny hižo dawno z Malchowa bjerje, česćo sej tak wukony nastupajo poradźowanje a zastaranje z trěbnymi narunanskimi dźělemi. Wosebje pak je Smječkečan nazhonił, zo finske předewazaće hižo wot lěta 1973 wuběrne mašiny produkuje, a to z wysokej kwalitu. Wone su z wosebitej chorhojčku woznamjenjene, štož wězo napadnje.
