Tež serbske rjemjesło ma złote dno. Dokelž buchu wěda a kmanosće starych mištrow přez generacije dale dawane, nastachu zawody, kotrež su změny časow přetrali.
Kamjenc (BG/SN). Dlěje hač 160 lět – mjeztym w pjatej generaciji – je Zelnakec swójba w Pančicach-Kukowje a wokolinje synonym za solidne pjekarske rjemjesło. Z chlěbami, całtami, tykancami, tortami a wosuškami je tež Dominik Zelnak doma napřećo klóštrej wotrostł. Mjeztym wjedźe wón hromadźe z mandźelskej Sandru hižo dlěje hač 20 lět swójsku pjekarnju na Kamjenskej Goethowej. 23. nowembra su kulojty jubilej swjećili.
Pjekarski mišter móže na wobšěrny kruh kupcow zhladować. Woni sej předewšěm waža, zo wukonja Dominik Zelnak swoje rjemjesło bjez industrielnych přidawkow. „Dam swojim ćěstam telko chwile, kaž trjebaja, zo bychu porjadnje zrawić móhli“, wón wuswětla.
