Leaderowy region zhladuje na wuspěšne projekty a dobre zhromadne dźěło
Rakecy (SN/BŠe). W regionje Hornjołužiska hola a haty (OHTL) je so europski spěchowanski program minjene lěta jara derje etablěrował. Jeničce lětsa je jeho management tři projektne namołwy wo spěchowanske srědki wozjewił, za kotrež móžachu so zajimcy požadać. W spěchowanskej dobje 2014 do 2020 bě to dohromady 17 namołwow. Cyłkowny budget wot lěta 2014 hač donětka wučinješe 13,1 milion eurow. Za dokładnje 265 projektow su zajimcy pjenježne srědki požadali, z čehož je management OHTL 259 wuzwolił a podpěru přizwolił.