Domjace swinjo jako wšožračk přewodźa čłowjeka hižo dlěje hač 9 000 lět a je tak najstarše wužitne skóćo. Jako dodawar mjasa je wone poboku čłowjeka wjele wotrězkow wuwića nazhoniło. Swinjace mjaso je dźensa w Europje a we wuchodnej Aziji najpožadaniše.
Produkcija swini je w Sakskej wažny dźěl ratarstwa a wučinja z produkciskej hódnotu 100 do 150 milionow eurow wob 4 lěto něhdźe 12 do 18 procentow hódnoty skótneje produkcije. To je něhdźe pjeć do wosom procentow hódnoty cyłeho sakskeho ratarstwa.
Po cyłej Němskej wučinja tónle podźěl jenož dwaj procentaj. W Sakskej plahuja přerěznje něhdźe 660 000 swini. Z toho je někak 72 800 plahowanskich swini, 395 000 prosatow a młodych swini a nimale 200 000 kormnych swini. Tele ličby su w minjenych lětach nimale konstantne wostali. Rancy k plahowanju dźerža po 75 procentach we wobstatkach z wjac hač tysac skoćatami. Tu plahuja lětnje wjace hač połdra miliona kormnych prosatow, w Sakskej pak kormja z nich jenož 40 procentow hač k docpěću rězneje wahi, to je 120 kilogramow.
Kotre družiny w Sakskej mamy?
