Wučomnikow zelenych powołanjow z wukubłanja wuwjazali

Biskopicy (SN/BŠe). Dźěło w ratarstwje so změnja, předewšěm hladajo na škit klimy a techniske naroki. Tole wuzběhnychu fachowcy minjeny pjatk na wuwjazanju wučomnikow zelenych powołanjow w Biskopicach na Butrowej horje. Ratar je najstarše powołanje čłowjestwa a kóžde lěto rozsudźa so mnozy młodostni za wukubłanje w tymle wobłuku. Cyłkownje 24 młodostnych Budyskeho wokrjesa je lětsa swoje wukubłanje wuspěšnje wotzamknyło. Z toho je 17 ratarjow, šěsć hladarjow zwěrjatow a jedna fachowa pomoc agrarneho wobłuka.

„Hladajo na přiwótřenu krizu zežiwi­dłow, was nuznje trjebamy“, wuzběhny wotrjadnica sakskeho krajneho zarjada za wobswět, ratarstwo a geologiju Kerstin Lässig. Niwow docpětych wukonow bě lětsa jara dobry. Hnydom wosom absolwentow je do statneje kenclije na wosebite přijeće přeprošenych. Tohorunja jich krajny zarjad nastupajo dalekubłanje financielnje podpěra. „Předewšěm hladajo na wobmjezowanja koronapandemije dla su wukony zwjeselace“, Lässig wujasni.