Po třilětnej přestawce, hłownje koronapandemije dla, je wukubłanišćo LEAG w Čornej Pumpje swoje wrota prěni raz minjenu sobotu zaso wotewrěło. Na dźeń požadarjow je 450 zajimowanych młodych ludźi z cyłeje Łužicy přišło.

Čorna Pumpa (JoS/SN). Předstajene buchu wukubłanske poskitki w hórnistwje a w milinarni. Zajim za pjeć hodźin trajace zarjadowanje bě wulki, wšako bě hnydom móžno so požadać abo swoje kontaktowe daty za pozdźiši rozsud powołanja zawostajić.

Předewzaće Łužiska energija a milinarnje (LEAG) planuje we wobłuku strukturneje a energijoweje změny wulke projekty přichoda, wo kotrež maja so wukubłani fachowcy starać. To wězo wabi, ale cyle tak daloko hišće njeje, kaž rjekny to Ingo Fischer, zamołwity za wukubłanje w hórnistwje. „Daloki wid do přichoda předewzaća wězo je, specifiske powołanja za to pak dotal postajene njejsu. Z aktualnym wukubłanskim profilom je LEAG derje nastajena, zo by mnohe wužadanja zmištrowała.“