Tež lětsa chcedźa organizatorojo mjezynarodneho folklorneho festiwala rjemjeslnikam, wikowarjam a ludowuměłskim kružkam móžnosć dać so prezentować.

Dobra přiležnosć, twory abo twórby wulkej ličbje ludźi spřistupnić, mjezynarodny folklorny festiwal w Chrósćicach skići. Lětsa wotměja so wiki sobotu na nowym parkowanišću před bywšim gmejnskim zarjadom a njedźelu na swjedźenskej łuce. Tuž změja zajimcy składnosć, so na dwěmaj dnjomaj rozhladować.

Kaž hižo minjene lěta wobdźěli so tónkróć tež zaso Birgit Patokowa z Hory. Wona zhotowja z ruku dźěłane unikaty. Tak wona škleńcy ze serbskimi hrónčkami abo wěnowanjom pomoluje. Wosebite ručne dźěło je hornčerjenje, z čehož je we Łužicy wjacorych dźěłarnjow. Na wikach zastupjena je Marion Sperlingowa, kotraž poskića mjez druhim keramiku ze serbskimi hrónčkami. Dale je zaso Eitnerec keramiska dźěłarnja z Grodka ze swojim hornčerskim poskitkom na wikach přitomna.