Budyšin (SN/BŠe). Dźěłarnistwo Verdi je dźěłopřijimarjow zjawneje słužby namołwjało, jutře a pjatk stawkować. Potrjechene su pěstowarnje w nošerstwje komunow, dźěłowa agentura a měšćanske zarjady. Dźěłarnistwo žada sej wot dźěłodawarjow zwyšenje mzdy měsačnje wo wosom procentow, znajmjeńša pak 350 eurow. Mzda za wučomnikow, studowacych a praktikantow ma wo 200 eurow wob měsac stupać.
Mjeztym je Budyski měšćanski zarjad informował, zo su zajutřišim tež w sprjewinym měsće warnowanske stawki připowědźene. Regularne wotewrjenske časy měšćanskeho zarjadnistwa dale płaća. W kotrej měrje k wobmjezowanjam dóńdźe, njehodźi so dotal rjec, dokelž njeje žaneje winowatosće informacije dźěłodawarjej podać. Starši dźěći w pěstowarnjach měli informacije we wotpowědnych kubłanišćach dóstać.
Budyska dźěłowa agentura na swojich wotewrjenskich časach ničo njezměni. Tam chcedźa wopytowarjow po móžnosći normalnje dale posłužować.
