Budyšin (SN/VaŽ). Kónc nowembra zašłeho lěta je Beno Brězan na Budyskej Karla Marxowej nowy wobchod, tak mjenowany „Lokalny regal“ wotewrěł. Inowatiwny projekt skići wikowarjam regionalnych produktow a rjemjeslniskeho wuměłstwa móžnosć, swoje wudźěłki prezentować a předawać. Wobchod je wot srjedy do soboty wšědnje wot 10 do 19 hodź. wotewrjeny. Cilowa skupina njejsu jenož turisća a wopytowarjo Budyšina, ale tež domoródni, kotřiž­ pytaja za wosebitymi, lokalnje zhotowjenymi produktami. Paleta poskićenych tworow je přewšo mnohostronska, kóždy tu něšto nadeńdźe. Mjez druhim poskića łužisku keramiku, w ručnym dźěle zhotowjene wačoki abo měd łužiskich pčołarjow.