Budyšin (SN/VaŽ). We wobłuku lětušeho mytowanja portala booking.com bu Budyšin jako jedne z najhospodliwišich městow wuznamjenjeny. Z tym wobsadźi po cyłej Sakskej prěnje městno, w Zwjazku pak docpě třeće. Z tutej informaciju zahaji Budyski wyši měšćanosta Karsten Vogt (CDU) wčera rozmołwu z nowinarjemi. Wón dźakowaše so lokalnym hosćencarjam, hotelownikam a hosćićelam za jich přinošk, kotryž na pozitiwnych hódnoćenjach hosći bazuje.

„Etat města je wobzamknjeny a tuchwilu prawniskemu dohladej předleži“, rozprawješe nawodnica financneho zarjadnistwa města Budyšina Regine Krause. Město planuje za lětsa wudawki we wobjimje něhdźe 108 milionow eurow. Dochodow změja wjace hač 89 milionow eurow, hłownje z dawkow a powšitkownych připokazankow. „Strukturny deficit wurunamy z rezerwami“, fachowča za financy připowědźi. Do zarjadnistwa běchu někotre próstwy a namjety k wuradźowanju wo etaće dóšli. Mjez druhim dźěše wo srědki za ćopłotne planowanje.