Na němsko-serbskich přirodowych wikach w Stróži su organizatorojo mjeztym 23. rybowe tydźenje zahajili. Předewšěm karpy rybarjo we Łužicy plahuja. Wo kwaliće móža so zajimcy přichodne tydźenje přeswědčić.
Stróža (AK/SN). Rybarjo k tomu přinošuja, zo so kulturna krajina we Łužicy hlada a zachowa. Runje tuta wjace hač 700 lět stara krajina z hatami dyrbja fachowcy wobhospodarić. „Łužiska ryba njeje jenož zapřijeće, ale jónkrótna kwalitna marka. W 30 zawodach we Łužicy tónle produkt plahuja. Dwanaće z nich je ze certifikatom ‚Woprawdźita łužiska ryba‘ woznamjenjena“, podšmórny jednaćel Marketingoweje towaršnosće Hornja Łužica-Delnja Šleska (MGO) Olaf Franke zawčerawšim na zahajenju 23. Łužiskich rybowych tydźenjow. Wotewrjenje wotmě so tónraz na stejnišću zarjadnistwa biosferoweho rezerwata Hornjołužiska hola a haty při Domje tysac hatow w Stróži, hdźež wotměchu samsny čas němsko-serbske nazymske přirodowe wiki. Domizniske towarstwo Radiška Stróža a biosferowy rezerwat stej zhromadnje na nje přeprosyłoj. Wopytowarjo zbliska a zdaloka tam přichwatachu.
