Budyšin (SN/BŠe). Zjednoćenstwo kasowych lěkarjow je njedawno nowu kampanju „Praksy za Saksku“ zahajiło. Zaměr je wjace domjacych lěkarjow zdobyć, dokelž je ambulantne strowotniske zastaranje wohrožene. Zo je tole nuznje trěbne, ličby z Budyskeho wokrjesa dopokazaja. Kónčina rozrjaduje so do pjeć planowanskich wobwodow – Budyšin, Biskopicy, Wojerecy, Kamjenc a Radeberg.

Najwjac njewobsadźenych sydłow za domjacych lěkarjow a terapeutow je we Wojerecach. Cyłkownje 10,5 sydłow je tam tuchwilu swobodnych. Po tym sćěhuje Kamjenc ze 6,5 sydłami, Budyšin z 5,5 a Biskopicy z 5 njewobsadźenymi městnami. Tež fachowych lěkarjow je w kónčinje nuznje trěbnych. W Budyšinje pytaja lěkarja abo lěkarku za kožu a po cyłej Hornjej Łužicy-Delnjej Šleskej psychiatrow za dźěći a młodostnych. W po­datych ličbach njejsu lěkarjo, kotrež tuchwilu za naslědnikom pytaja.