Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (60)

Za mnohich je njedźelniše warjene jejo k snědani njeparujomne. Druzy sebi časćišo jejo popřeja, na př. sportowcy za natwar musklow. Jasne je, zo hraje jejo w Němskej dźeń a wjetšu rólu. W lěće 2020, tak wozjewi ratarske ministerstwo, je so w Němskej nimale 20 miliardow jejow jědło. Tendenca stupa.

Ći jedni su přeswědčeni, zo tyje jejo we wobłuku zežiwjenja ćěłu a powšitkownej strowoće. Dalše měnjenja pak pokazuja tež na strachi přez na př. wysoki podźěl cholesterina jeja abo infekcije z bakteriju salmonela abo kampylobakter.