Łužiska jězorina so dale a bóle na turistisku kónčinu a wočerstwjenišćo změnja. Lěto wob lěto maja tam wjace poskitkow. Tu wam lětuše chłóšćenki předewšěm při a na wodźe předstajamy.

Łužica (SN). Łužiski wotrězk Nysy je za sportowcow na wodźe paradiz. Dźakowano přirodnym přibrjoham maja tam zwěrjata kaž žorawje, libele abo rybački swoju domiznu. Tež padlowarjam skići rěka wuběrne wuměnjenja. Podłu Nysy přewjeduje firma expeditours wodźene tury z čołmikom abo kolesom. W jězorinje pak móža so ludźo tohorunja z kolesom na puć podać. Dźakowano kanalam, po kotrychž łódźe jězdźa, njetrjebaja zajimcy cyłu čaru kolesować, ale jědu wěste wotrězki z łódźu sobu. Tak móža sej w běhu krótkeho časa Złokomorowski, Lejnjanski a Parcowski jězor wobhladać.