Hózk (SN/mb). Šef statneje kenclije Sakskeje dr. Andreas Handschuh poby wčera na třoch stejnišćach předewzaćow, kotrež maja za přichod regiona wosebity wuznam. Přeprosyła bě jeho zapósłanča sakskeho krajneho sejma Elaine Jenčec (wobaj CDU). Zakónčiła je so tura w tworni TDDK w Nadróznej Hrabowce, kotraž njeje z 950 přistajenymi jenož jako producent klimatizacije za awta znata, ale tež jako spěchowar serbšćiny w hospodarstwje. Samo swójsku społnomócnjenu za serbske naležnosće w zawodźe maja. Zastupowacy jednaćel Ronald Juhnke hosći po zawodźe wodźeše, kotryž so jako serbsce wuknjacy hižo dołho za serbski profil firmy angažuje.

Do toho rozmołwjachu so w radnicy Njedźichowa z měšćanostu Harryjom Habelom (CDU) a měšćanskimi radźićelemi wo přichodnym bataljonje zwjazkoweje wobory za logistiku. Tule změje jónu 800 wojakow dźěłać, při tym chcedźa něhdyše stejnišćo narodneje ludoweje armeje (NVA) NDR za dźensniše wójsko wužić. Z toho wočakuja „přinošk za změnu strukturu a pozitiwne wuskutki za hospodarstwo“, kaž w podłožkach běrowa zapósłanče za wotběh dnja čitamy.