Kamjenc (SN/BŠe). Poskitki powołanskeje orientacije su za młodych ludźi jara wažne. Nimo praktikumow, hdźež móža sej šulerjo swět powołanjow wotkryć, su tež wiki dobra móžnosć, wšelake powołanja zeznać. Tuž so zawčerawšim zaso wjele młodostnych do Kamjenca poda, hdźež je dohromady 98 wustajerjow swoje poskitki prezentowało. Kaž Budyski krajnoradny zarjad zdźěli, je wjace hač 1 600 zajimcow do sportoweje hale při Kamjenskim lěta­nišću přišło. Woni mějachu najwšelakoriše móžnosće, so z powołanjemi roze­stajeć. Nimo rozmołwow při stejnišćach móžachu so młodostni na městnje tež praktisce wuspytać a so gratu přimać. Wjele kedźbnosće zbudźi zdobom poskitk na Kamjenskim lětanišću, hdźež móžachu so z nowej technologiju kołowokoło trutow rozestajeć. Technika so spěšnje dale wuwiwa a skići nowe powołanske móžnosće. Nimo nowych powołanjow su tež tradicionalne rjemjeslniske předewzaća składnosć wužiwali, młodostnych na přehladce direktnje narěčeć. Dźěło z ruku je wjele lubjace. Nic podarmo je rěč wo złotych rukach rjemjesła.