Grodk (JoS/SN). Zawod Mjedźel Łužica (KSL) bě zašłu sobotu druhi raz wo to wabił, w kónčinje wokoło Grodka nowe wudobywanišćo kopora wutworić. Za to pak dyrbja najprjedy wuslědźić, hač kónčina tole docyła znjese. Prěnju tajku próstwu wo zwěsćenje znjesliwosće bě braniborske ministerstwo za infrastrukturu a planowanje kraja – zhromadny wotrjad planowanja krajow Berlin-Braniborska (GL) w lěće 2023 wotpokazało. Prjedy hač dalši pospyt zahaja, su zajimowanych wobydlerjow nětko znowa wo procedurje informowali. Něhdźe 150 wobydlerjow bě na informaciske zarjadowanje přichwatało. Zawod KSL bě swoju strategiju za prezentaciju přiměrił, wšako běchu so ludźo po poslednim zarjadowanju nowemu wudobywanišću spjećowali. Sobotu tuž jenož fachowcy ze wšelkich wobłukow referowachu. Tole přisporješe wěcownu debatu. Hižo na spočatku rjekny Doris Grahn, sobudźěłaćerka inženjerskeho běrowa GICON, kotryž za KSL dźěła, zo chcedźa wokoło Grodka jenož telko kopora wudobywać, kaž to přiroda znjese. Wona rozprawješe, zo je KSL swoju strategiju za wudobywanje dospołnje změnił.