Sta šulerjow k maturje wjedł
Dohromady dźesać zasłužbnych Serbow je Domowina lětsa z Čestnym znamješkom mytowała. Na tutym městnje chcemy Wam kóždeho z nich bliže předstajić.
Mnohim ludźom w Delnjej Łužicy je Juro Gera předewšěm jako wučer matematiki a jako něhdyši nawoda Delnjoserbskeho gymnazija znaty. Sta šulerjow je wón k abiturje wjedł a přez wjace hač dwaj lětdźesatkaj wuwiće krajiny serbskich kubłanišćow sobu formował.
Žylowčan pak angažuje so tež zwonka swojeho powołanskeho žiwjenja na serbskim polu: Jako spěwar a solist w Žylowskim němsko-serbskim chórje a wot lěta 2006 w chórje Łužica. Runje tak zasłyšiš Jura Gera hdys a hdys w Serbskim rozhłósu.
Dźěłowy plan wulke wužadanje
Chrósćicy (SN). Dźěłowy plan za klětu je wulke wužadanje – to bě po zdźělence regionalneje rěčnicy Kathariny Jurkoweje facit wčerawšeho posedźenja předsydstwa župy „Michał Hórnik“ w Chrósćicach. 800lětny jubilej wosady a gmejny Chrósćicy, mjezynarodny folklorny festiwal, pasion a hłowna zhromadźizna Domowiny w Budyšinje su terminy, kotrež su z wjele nadawkami zwjazane. Nimo toho pak ma so w nazymje hišće župna hłowna zhromadźizna přewjesć a w adwenće kubłanska jězba. Dale su wo móžnosćach zetkanja chronikarjow župy wuradźowali. Zajimawe bě tež rozmołwa wo wobsahach a idejach za webstronu župy, kaž tež wustupowanje na Facebooku abo wo móžnej prezentaciji na Instagramje.
Najprjedy pak přeprosy župa swojich čłonow hišće lětsa sobotu, 30. nowembra, na adwentnu kubłansku jězbu do Choćebuza. Zhromadnje ze župu Delnja Łužica su wotměnjaty program přihotowali. Tak čaka na wopytowarjow serbske wodźenje po měsće, wopyt serbskeho muzeja kaž tež adwentnych wikow. Přizjewjenja su w regionalnym běrowje Domowiny hač do 22. nowembra móžne.
Zhromadnje za serbske ewangelske wosadne žiwjenje
Na hłownej zhromadźiznje Serbskeho ewangelskeho towarstwa (SET) reformaciski dźeń je předsyda Mato Krygaŕ w narěči, kotruž tu dokumentujemy, wo dźěle a wuhladach SET přednošował.
Serbske ewangelske towarstwo ma tuchwilu 51 čłonow. Lětsa móžemy knjeni fararku von Ruthendorf-Przewoski jako nowu čłonku SET witać. (...)
Předsydstwu SET přisłušeja Stefan Cuška, dr. Günter Holder, Mato Krygaŕ, Robert Maćij, Měrćin Wirth a Günter Wjenk kaž tež Serbski superintendent Krystof Rummel.
Jako předsydstwo smy so lětsa trójce w Serbskim domje w Budyšinje schadźowali a wuradźowali: w januarje, w meji a w septembrje.
Dźěło w minjenym lěće
Loni, druhu njedźelu adwenta, 10. decembra, swjećachmy na Michałskej farje w Budyšinje adwentničku.
Zaměrnje so ze serbšćinu zaběrał
Dohromady dźesać zasłužbnych Serbow je Domowina lětsa z Čestnym znamješkom mytowała. Na tutym městnje chcemy Wam kóždeho z nich bliže předstajić.
Dr. Křesćan Kessner je so 1954 w Lubiju narodźił. W lěće 1973 zasłyša jako wojak w Grodku prěni raz na zarjadowanju Domowiny oratorij „Nalěćo“. Hnydom so do serbskeje rěče a kultury zalubowa, wuwědomjejo sej swoje wosobinske serbske korjenje. Započa so ze serbšćinu zaměrnje zaběrać. Po studiju psychologije a mediciny wróći so wědomje do bliskosće domizny, zadomi so w Lohmenje na kromje Sakskeje Šwicy. Wottam kontakt do serbskeje Łužicy daloki njebě. Nawukny hornjoserbšćinu a z toho časa wužiwa kóždu składnosć serbować. Wón chodźi na čitanja w Smolerjec kniharnje, na přednoški Maćicy Serbskeje, słucha Serbski rozhłós, čita Serbske Nowiny a druhe časopisy. Z lěta 1996 je z čłonom chóra „Budyšin“ a podpěruje nimale 20 lět aktiwnje bas w chórje, ale tež skutkowanje chóra jako serbske ćěleso.
Z hrajerskim talentom zahorił
Marcel Hoza narodźi so 1974 we Worklecach. Wuchodźiwši šulu w Chrósćicach, wukubła so na instalatera za płun a wodu. Po tym poda so na studij statnje pruwowaneho technikarja za mašinotwar w Budyšinje. Dźensa dźěła jako projektny sobudźěłaćer w mašinotwarskej firmje w Drježdźanach. Marcel Hoza je woženjeny, nan třoch dźěći a bydli we Worklecach. Wot 1992 je čłon Serbskeje lajskeje dźiwadłoweje skupiny z. t. Chrósćicy. Ze swojim hrajerskim talentom namaka w nimale kóždej inscenaciji swoju rólu. Prěnja běše w inscenaciji „Djaboł hraje z ludźimi“ z pjera dr. Achima Nawki. Marcel Hoza bě jedyn z akterow a bě tež za zwoprawdźenje spěwohry „Z TOBU – Bohu swjećene lěto“ zamołwity. Teksty spěwohry wuchadźeja sobu z jeho pjera. Pjeć předstajenjow 1 500 zahorjenych přihladowarjow – tole je žiwy dopokaz za to, kak so narodnosć a nabožnosć w Serbach zeskutkownjatej.
Serbsku hudźbu wobohaćił
Budyšin (SN). Na namjet župy „Jan Arnošt Smoler“ Budyšin wuznamjeni so Pětr Cyž z Budyšina – woporliwy prócowar serbskeje spěwneje interpretacije – z Čestnym znamješkom Domowiny. Hižo 16 lět nawjeduje Pětr Cyž chór „Meja“. Z wosobinskim rukopisom a kreatiwnej žiłku zamó wuměłsku kwalitu wuznamneho serbskeho ćělesa zaručeć a z tradiciju swójskeje interpretacije serbskeho a słowjanskeho ludoweho kaž tež wuměłskeho spěwa pokročować.
Domowina staja žadanja
Budyšin (SN/mb). Domowina je CDU, BSW a SPD, kotrež tuchwilu w Sakskej wo wutworjenju koalicije wuradźuja, swoje žadanja sposrědkowała. Třěšny zwjazk Serbow zwěsća hladajo na to w swojej aktualnej zdźělence: „W minjenych lětach připowědźene a zahajene naprawy wočakowanjam njewotpowěduja, wosebje nic na polu kubłanja. Njedostatk wučerjow wohrožuje wučbu w serbšćinje.“ Předsyda Domowiny Dawid Statnik praji k tomu: „Krajne knježerstwo Sakskeje dyrbi serbski lud při škiće rěče a kultury aktiwnje podpěrować.“
Swoje žadanja je Domowina do šěsć wotrězkow zrjadowała: 1. kubłanje, polěpšenje serbskeje kubłanskeje infrastruktury, 2. financowanje, dołhodobne zaručenje; 3. medije, zaručene financowanje serbskeho poskitka, 4. digitalizacija a spěchowanje serbšćiny, 5. mjeńšinowa politika na krajnej a zwjazkowej runinje; 6. europska mjeńšinowa politika, zhromadne dźěło a škit.
Serbske Nowiny budu w pjatkownym wudaću „žadanja serbskeho ludu na koaliciske jednanja Sakskeje“ (titul teksta) dokumentować.
Přichod za dom Měrćina Nowaka
Budyšin (kl/SN). Čłonojo župneho předsydstwa župy „Jan Arnošt Smoler“ Budyšin wuhódnoćachu na swojim wčerawšim zeńdźenju dotalne zarjadowanja župy. Županka Leńka Thomasowa rozprawješe, zo móžachu na wodźenju po Tuchorju z Trudlu Malinkowej a Jurjom Łušćanskim 50 hosći witać. Wulki a jara pozitiwny wothłós měješe tež wotkryće pomnika za Jana Awgusta Měrćinka spočatk oktobra w Hrodźišću. Županka chwaleše sebi rjany swjedźeń we wuchodnym dźělu župy.
Přichodne zarjadowanja, na kotrež wšitkich přeprošuje, su nazymski koncert 2. nowembra, na dnju Romantici w Budyšinje. Započatk je w 16 hodź., a zahudźi dujerska skupina Horjany. Nazajtra je nazymski koncert w Bukecach z chórom Budyšin. Zhromadnu adwentničku chcedźa z čłonami Domowinskich skupin a towarstwow 4. decembra na žurli Serbskeho domu swjećić. Wobrubjeć budźe adwentničku mały chór Serbskeho gymnazija Budyšin.
Plan za klětu
Malešecy (kl/SN). Hłownu zhromadźiznu Domowinskeje skupiny Malešecy zahajichu srjedu dźěći Witaj-pěstowarnje z třomi spěwami. Předsydka Maritta Schneiderowa na to lětuše aktiwity wuhódnoćeše. Skupinje přisłuša 23 čłonow – na zhromadźiznje witachu jednu nowu čłonku, wot druheje so rozžohnowachu.
W meji wotmě so nalětni koncert w Malešecach, kiž skupina kóžde lěto sobu organizuje. Dale wobdźěli so čłon předsydstwa w měrcu na zetkanju skupin a towarstwow župy „Jan Arnošt Smoler“ Budyšin. W septembrje předstaješe jim Herbert Probst z Jatřoba přednošk a film wo něhdyšim kulturnym žiwjenju w Malešecach. Předsydka wuzběhny dobre zhromadne dźěło ze župnym předsydstwom.
Za klětu maja konkretne plany: 25. meje budźe nalětni koncert z 1. Serbskej kulturnej brigadu. Dale hotuja so w Malešecach na 800lětny jubilej. Wot 15. do 22. junija wuhotuja swjedźenski tydźeń. 15. junija poskića na wjesnej žurli serbske poskitki: wustajeńcu, wóskowanje jejkow, přehladku narodnych drastow a wjele wjac.
Z talentom a zapalom našemu ludu słužili
Dokumentacija z lawdacijow za lětušich lawreatow Myta Domowiny
Lucija Handrikowa ze SmjerdźacejeNa swjatočnym zarjadowanju je předsyda Domowiny Dawid Statnik pjatk wječor w Budyšinje angažowanym Serbowkam a Serbam Myto Domowiny, Myto Domowiny za dorost a Čestne znamješko přepodał. Tule dokumentujemy jich wjelelětne a angažowane čestnohamtske dźěło za serbski lud z wurězkami z lawdacijow.
