Radwor (SN/AN). Na Radworskim dwórnišću inkluzije přihotuja so tele dny na wosebitu wustajeńcu. Něhdyši šulerjo 10. lětnika Ewangelskeje srjedźneje šule w Husce kaž tež Pawołskeje šule w Rakecach su zhromadnje ze swojej tehdyšej wučerku za wuměłske kubłanje Claudiu Matoušekowu wosebitu modowu přehladku kreěrowali. Nowostka je, zo su w njej načasnu wšědnu drastu z elementami serbskeje drasty „zmandźelili“.
Startował je wosebity projekt hižo w šulskim lěće 2013/14 na Ewangelskej srjedźnej šuli w Husce, jako přińdźe Claudia Matoušekowa z połnym košom njewužiwaneje serbskeje drasty do rjadownje. Podpěrowała a fachowje přewodźowała je šulerjow tež mějićelka drastoweho fundusa w Nowej Jaseńcy Monika Cyžowa. Po tym zo běchu projekt na kóncu šulskeho lěta dokónčili, prezentowachu swoje wudźěłki na hrodźe w Husce. Fotografowka Anne Hasselbach z Kamjenca je wustajeńcu fotografisce dokumentowała. W lěće 2016 je wučerka Claudia Matoušekowa projekt na Pawołskej šuli w Rakecach z tamnišimi šulerjemi dale wjedła.