Tež dr. Renate Harcke słuša do rjadu lětušich zasłužbnych Serbow, kotrychž je Domowina ze swojim Čestnym znamješkom mytowała. W lěće 1954 w měsće Calbe nad Solawu rodźena Němka je wosebje ze swojej hłubokej prawniskej ekspertizu na dobro Serbow skutkowała.

Jako absolwentka studija prawniskich wědomosćow w ruskim Woronježu dźěłaše najprjedy jako wyša asistentka, pozdźišo jako nawodnica katedry na Akademiji statnych a prawniskich wědomosćow w Podstupimje-Babelsbergu. Po tym, zo bu kubłanišćo juristow w Babelsbergu po přewróće rozpušćene, dźěłaše dr. Renate Harcke spočatnje jako referentka, pozdźišo jako frakciska jednaćelka w frakciji PDS krajneho sejma Braniborskeje. Mjeńšinowe prawo a mjeńšinowa politika běštej jej wot spočatka politiskeho skutkowanja wěc wutroby. Wona je zwjazkowe dźěłowe zjednoćenstwo Lěwicy „Etniske mjeńšiny“ 2003 sobu załožiła, kotrež hač do dźensnišeho z Hajkom Kozelom nawjeduje.