Statnik w Slepom był
Budyšin/Slepo (SN). Předsyda Domowiny Dawid Statnik a referentka za naležnosće třěšneho zwjazka Madlenka Di Sarnowa pobyštaj wčera nawječor w Slepom. Přičina běše rozmołwa ze župnym předsydstwom župy „Jakub Lorenc-Zalěski“, kiž je zastupjerka Serbow w Zhorjelskim wokrjesu. Hłowna tema bě přihot přichodneje hłowneje a wólbneje zhromadźizny Domowiny, kotraž so 5. jutrownika w Serbskim ludowym ansamblu w Budyšinje wotměje. Zdobom su tež wo wšelakich aktualnych wotewrjenych prašenjach diskutowali.
Dawid Statnik informowaše wo planowanych wólbach a wabješe za sobudźěło w gremijach Domowiny, wšako steja mjez druhim wólby zwjazkoweho předsydstwa na dnjowym porjedźe hłowneje zhromadźizny. Zhromadnje wuradźowachu wo tym, kak hodźa so zajimy Slepjanskeho regiona w přichodźe w třěšnym zwjazku dale a lěpje zastupować.
Županka Diana Maticowa wužiwaše składnosć a přeprošuje hižo nětko na hłownu a wólbnu zhromadźiznu župy 29. winowca w Slepom. Župje přisłuša tuchwilu 480 čłonow.
Domowina: Serbja, wolće!
Budyšin (SN). Domowina namołwja wšěch wólbokmanych Serbow, so na wólbach zwjazkoweho sejma wobdźělić. W aktualnej zdźělence pisa třěšny zwjazk jako zastupnistwo zajimow serbskeho ludu, zo je „w časach politiskich změnow ćim rozsudnišo, naše demokratiske hódnoty zakitować a přichod aktiwnje wobwliwować. Wólby do zwjazkoweho sejma su rozsudna šansa, so za mnohostronsku, sprawnu a wotewrjenu Němsku zasadźeć – za Němsku, w kotrejž so prawa Serbow a wšěch awtochtonych mjeńšin česća a škitaja.“ Zdobom pisaja: „Aktualne politiske wuwića, wosebje zesylnjenje prawicarstwa, nas starosća.“
Tohodla prosy Domowina: „Informujće so, kotre strony a kandidatki a kandidaća so jasnje a wěryhódnje k škitej serbskeje identity, rěče a kultury wuznawaja.“ Mjeńšinowa rada je k tomu žadanja wozjewiła, na přikład nowy artikl wo spěchowanju domoródnych narodnych mjeńšin do zakładneho zakonja a sposrědkowanje wjace wědy wo serbskim ludźe, wo Sintach a Romach, wo friziskej ludowej skupinje a danskej mjeńšinje. Wjac na www.minderheitensekretariat.de.
Župa Kamjenc tójšto planuje
Chrósćicy (SN). Předsydstwo župy „Michał Hórnik“ Kamjenc je so wčera wječor w Chrósćicach schadźowało. Kaž ze zdźělenki regionalneje rěčnicy Kathariny Jurkoweje wuchadźa, běše hłowna tema přihot na wólbnu zhromadźiznu třěšneho zwjazka 5. jutrownika w Budyšinje. Wosebje intensiwnje su so z naćiskom dźěłowych směrnicow Domowiny a jich wuznamom za dźěło župy zaběrali. Sobustawam předsydstwa stej Marlis Młynkowa a županka Diana Wowčerjowa tež hłowne změny we wustawkach Domowiny rozjasnili.
Čłonojo župneho předsydstwa su z wuradźowanjom wo lětušim dźěłowym planje pokročowali. Hižo kruće zaplanowane předewzaća su konkretizowali, na přikład nazymske koncerty. Tohorunja su nowe zrodźili. Na kóncu přeprosychu na přednošk a diskusiju wo temje „Prawicarske prudy we Łužicy – što woznamjenja to za našu młodźinu, dźěći a wnučki?“, wutoru, 4. małeho róžka, w 19.00 hodź. do kulturneho domu w Nowoslicach. Župa Michał Hórnik je zarjadowar tutoho wječora w zhromadnym dźěle z wjesnej radu Nowoslicy.
Wjerški Delnjeje Łužicy přihotuja
Choćebuz (SN). Na posedźenju předsydstwa župy Delnja Łužica wčera w Choćebuzu su hłownu zhromadźiznu župy přihotowali, kotruž přewjedu pjatk, 28. februara, w Žylowje. Tam chcedźa mjez druhim njedawne wólby Rady za naležnosće Serbow w Braniborskej wuhódnoćić. Nowy předsyda gremija je Marcus Końcaŕ. Tež hłownej zhromadźiznje třěšneho zwjazka 5. apryla w Budyšinje su so wěnowali, kaž nas regionalna rěčnica Heike Apeltowa informowaše. Župa Delnja Łužica je z 2 600 čłonami najwjetši regionalny zwjazk Domowiny a budźe z 32 delegatami zastupjena.
Tež dalše wažne terminy su rozjimali, tak je Franciska Albertowa na „Rěčnu kofejownju“ 23. februara do Dešna přeprosyła, tam budźe rěčne hnězdo „Zorja“ zaso stacija zapustoweho přećaha Dešnjanskeje młodźiny. Na čitanje wo Mari Grólmusec přeprošujetej Domowina a Rosy Luxemburgowa załožba 18. měrca do Choćebuza.
Nic naposledk wjesela so w Delnjej Łužicy na wulki swjedźeń 24. meje w Mósće. Dytar Worješk je na jubilej Mósćanskeho kwasneho přećaha přeprosył.
Mysla hižo na domchowanku
Nowe župne předsydstwo je so we Wojerecach do dźěła dało a wuhibki za lětuše nadawki stajiło, kaž smy wot županki Gabriele Linakoweje po wčerawšim posedźenju zhonili.
Wojerecy (SN/mb). Jednaćelka Domowiny Judit Šołćina běše wčera na wuradźowanju we Wojerecach z hosćom předsydstwa župy „Handrij Zejler“. Wona připowědźi, zo chcedźa w zwisku z wobnowjenjom prezentacije třěšneho zwjazka w interneće nowe logo za kóždu župu wuwić. Naćiski budźe Domowinski zarjad župam sposrědkować a z nimi wothłosować. Dalša zajimawa informacija: Hdyž regionalna rěčnica mjenje hač 40 hodźin dźěła, móže něchtó druhi zbytne hodźiny z nadawkami za region přewzać.
W přichodnym zwjazkowym předsydstwje njezměje župa z aktualnje 591 čłonami hižo dweju, ale jenož jednoho zastupjerja. Na lětušej hłownej zhromadźiznje budźe župu sydom delegatow reprezentować. Jednaćelka Domowiny rozkładźe čłonam župneho předsydstwa tež naćisk za nowe dźěłowe směrnicy.
Najprjedy žane požadanje za lisćinu UNESCO
Choćebuz (SN/mb). Domowina ma aktualnje 7 600 čłonow. Tutón pozitiwny staw předsyda narodneje organizacije Dawid Statnik na posedźenju zwjazkoweho předsydstwa (ZP) pjatk w Choćebuzu lóštnje komentowaše. Hladajo na rozrostowacy třěšny zwjazk porno woteběranju ludnosće regiona praješe: „Hdyž tak dale činimy, budźe wjetšina Łužicy bórze serbska.“ Na zakładźe ličby je zwjazkowe předsydstwo ličbu mandatow župow a čłonskich towarstwow resp. zwjazkow w tutym gremiju za dobu 2025-2029 schwaliło. Kóždej sobustawskej organizaciji přisteji znajmjeńša jedne městno, za kóždych 600 čłonow dóstanje dalši mandat. Wjac hač jedyn mandat změja župa Delnja Łužica (pjeć za 2 683 čłonow), župa „Michał Hórnik“ Kamjenc (tři za 1 499) a Towarstwo Cyrila a Metoda (2 za 610). Cyłkownje ma hłowna zhromadźizna 5. apryla w Budyšinje 25 zastupjerjow župow a towarstwow, městopředsydow a předsydu wolić, tak zo budźe gremijej 28 ludźi přisłušeć. Dawid Statnik, kiž wot 2011 třěšnemu zwjazkej předsydari, připowědźi, zo budźe znowa kandidować.
Hromadźe domoj do serbskeho swěta
Budyšin (SN). Krótko do hód su so wobdźělnicy prěnjeho kursa programa DOMOJ w Budyšinje zetkali, zo bychu so zeznali a wo nazhonjenjach w „serbskim swěće“ wuměnili. Zdobom předstaji so při tutej składnosći Jadwiga Brězanowa. Wona je wot spočatka lěta jako docentka přistajena a budźe wot apryla w „rěčnym hnězdźe“ we Wulkich Zdźarach – tam so kurs přewjedźe – wuwučować.
„Sym wjesoła, zo móžu ze swojimi nazhonjenjemi jako wučerka nětko intensiwne kursy za dorosćenych sobu wudźěłać, je přewjesć a sobu na tym dźěłać, hornjoserbsku rěč rewitalizować. Zhromadnje móžemy tomu přinošować, tute drohotne kulturne herbstwo zdźeržeć a za přichodne generacije zachować.“, docentka Jadwiga Brězanowa wuzběhny.
Podpěruje projekty towarstwow
Nimo wólbow měješe Domowina loni dźěła połne lěto. Prawidłownje stej so zwjazkowe předsydstwo a prezidij Domowiny schadźowałoj. Tež towarstwa su wšelake projekty přewjedli, při čimž je Domowiny podpěraše.
Budyšin (SN/BŠe). Domowina je swoje towarstwa při zwoprawdźenju jich projektow aktiwnje nastupajo organizaciju zarjadowanjow podpěrała. To běštej na přikład 75. jubilej załoženja 1. Serbskeje kulturneje brigady w Budyšinje abo superkokot w Dešnje. Wobšěrniše a wusahowace předewzaće bě Europeada, kotraž je so w lěću w němsko-danskej namjeznej kónčinje přewjedła a na kotruž je Domowina dwě serbskej mustwje delegowała, wobstejacej z koparkow a koparjow z Hornjeje a Delnjeje Łužicy. Dale je Domowina dwanaće nazymskich koncertow po cyłej Łužicy organizowała, kotrež wopyta wjace hač 1 300 ludźi.
Judit Šołćina powołana
Budyšin (SN). Čłonki a čłonojo prezidija Domowiny zetkachu so wčera w Budyskim Serbskim domje na 40. posedźenje w aktualnej legislaturnej periodźe. W srjedźišću steješe přihot Hłowneje zhromadźizny Domowiny, kotraž budźe lětsa 5. apryla w Budyšinje. Prezidij je so z wjacorymi dypkami zaběrał, kotrež mějachu so w zhromadźiznje schwalić. To běchu mjez druhim změna wustawkow, wólbny porjad Domowiny a program Domowiny.
We wustawkach su so nimo stilistiskich změnow tež korektury přewjedli. Dale je so do wólbneho porjada pasus zapisał. Tutón wuzamkuje kandidatow, kotrež mjez druhim přećiwo swobodno-demokratiskemu zakładnemu porjadej agěruja. Programowa komisija je dźensa tydźenja kónčny naćisk programa Domowiny wudźěłała.
Nimo toho je prezidij za dobu 2025 – 2029 Judit Šołćinu jako wěcywustojnu wobydlerku do přirady za serbske naležnosće města Budyšin powołał. To bě trěbne, dokelž je Budyska měšćanska rada wobzamknyła, přiradu za serbske naležnosće wutworić. Dotalny dźěłowy kruh přeměni so do přirady.
Wuměna nazhonjenjow wažna
Zhorjelska Domowinska župa Jakub Lorenc-Zalěski ma tuchwilu dohromady 500 čłonow, kotřiž su w šěsć Domowinskich skupinach kaž tež w dźewjeć zapisanych a w pjeć njezapisanych towarstwach aktiwni.
Slepo (SN/MiP). Prezencu a akceptancu serbšćiny w regionje šěrić – to ma županka Diana Maticowa za wažny nadawk w župje Jakub Lorenc-Zalěski. Jara spomóžnje w tutym zmysle skutkowałoj staj w lěće 2024 docent serbšćiny Marek Krawc z rěčnym kursom w Slepom w nadawku Rěčneho centruma Witaj (RCW) kaž tež rěčna motiwatorka projekta ZARI Juliana Kaulfürstowa, kotraž je mnoho serbskich zarjadowanjow w regionje nastorčiła a organizowała.
Loni woswjećichu w župje hnydom dwě róčnicy Slepjanskeju wótčincow: 150. posmjertne narodniny Slepjanskeho spisowaćela Jakuba-Lorenca-Zalěskeho a 125. posmjertne narodniny Pawoła Lejnika, prěnjeho předsydu župy Běła Woda. W juliju su na swjatočnym wopominanskim zarjadowanju pomnik za njeju poswjećili.
