Na hospodarski forum Domowiny
Budyšin (SN). Domowina přeprošuje na fachowy forum hospodarstwa, kiž wotměje so póndźelu, 10. nowembra, w Krabatowym młynje w Čornym Chołmcu. Tam nochcedźa so jenož hospodarskim syćam we Łužicy wěnować, ale tež cyle konkretnym temam kaž: „Serbska kuchnja a regionalne speciality – kotry wliw ma serbska kuchnja na regionalnu identitu we Łužicy?“ Nimo toho steji předstajenje wuslědkow aktualneho woprašowanja „Łužiskeho monitora“ na dnjowym porjedźe. W tutym zwisku póńdźe wo móžny wliw serbšćiny na hospodarstwo a wo lěpšiny dwurěčnosće.
Dobywanju dorosta słuža powołanske wiki na Serbskej wyšej šuli w Ralbicach. Wo swojich dotalnych nazhonjenjach chcedźa hosćom foruma rozprawjeć. Do programa słuša tež wulkoprojekt Domowiny we wobłuku spěchowanja změny strukturow za serbšćinu a regionalnu identitu ZARI, kiž intensiwny rěčny kurs Domoj předstaji. Wjeršk foruma budźe spožčenje serbskeho Myta za hospodarstwo. Tomu so wólna wuměna přizamknje. Přizjewjenja za forum přijimuja hač do 5.11. pod
Lěto połne wjerškow
Malešecy (SN). Dźesać dźěći Malešanskeje Witaj-pěstowarnje pod nawodom Carolin Jurkoweje je srjedu popołdnju hłownu zhromadźiznu tamnišeje Domowinskeje skupiny ze serbskim a němskim spěwanjom zahajiło. W swojej rozprawje bilancowaše předsydka skupiny Maritta Schneider po tym radźeny 800lětny jubilej wsy. Na nim měješe Domowinska skupina Malešecy wulki podźěl, wšako je so předsydstwo wo serbske poskitki w hosćenu „Wódny muž“ starało. Předsydka chwaleše sej zhromadne spěwanje chórow, kotrež su tři serbske chóry wobohaćili. Zdobom wuzběhny wona nalětni koncert, kotryž bě 1. Serbska kulturna brigada z přewšo pozitiwnym wothłosom wuhotowała.
Zajim je tež čitanje z knihi „Malešecy před 200 lětami“ zbudźiło. Klětu chcedźa 31. meje koncert w cyrkwi zarjadować. Domowinska skupina Malešecy ma 25 čłonow. Lětsa stej so skupinje dwě nowej čłonce přidružiłoj. Kóžde lěto požadaja so wo skupinske spěchowanje, kiž Domowina swojim čłonskim towarstwam přewostaja, kaž regionalna rěčnica Katja Liznarjec w swojej zdźělence informuje.
Na slědach swojich potomnikow
Statnik: Rozsud zwjazkoweje rady historiski
Nowy Miłoraz (SN/mb). W Slepjanskich kónčinach je dźakowano inowatiwnemu wučerjej Marekej Krawcej dale a wjac ludźi, kotřiž serbsce wuknu: Tuchwilu je jich 40 wuknjacych w šěsć kursach. Wulki dźěl wobdźělnikow su wučerjo a pěstowarki. Kaž županka župy „Jakub Lorenc-Zalěski“ Diana Maticowa na posedźenju zwjazkoweho předsydstwa (ZP) Domowiny zašły pjatk w Nowym Miłorazu praji, zamóže Krawc ludźi za serbšćinu tež zwonka powołanskich winowatosćow zahorić. Tomu tohorunja rěčna motiwatorka Juliana Kaulfürstowa přinošuje, kotraž ma tež posrědkowanje slepjanšćiny na starosći.
Maticowa pak přizna, zo je rěč w gremijach, towarstwach a skupinach wšědny dźeń jenož zrědka słyšeć. Na prašenje Aleny Hiccyneje, kak móhli tomu praktisce wotpomhać, doda Maticowa, kotraž na wšě prašenja němsce wotmołwješe, zo jim ideje pobrachuja, kak serbšćinu bóle we wšědnym žiwjenju zakótwić. Nadźijeja pak so, zo so to změni. Župje přisłuša 525 čłonow a 15 towarstwow. Klětuši wjeršk budźe 10. mjezynarodny festiwal dudakow wot 19. do 21. junija.
Župa: Nazymu wjele wjerškow
Wojerecy (SN/mb). Čłonojo předsydstwa župy „Handrij Zejler“ Wojerecy su na wčerawšim posedźenju tež njedawnu krajnu domchowanku w měsće wuhódnoćili. Zwjeselaca běše wusahowaca prezenca Serbow dźakowano župje. Tak bě mjez 39 prezentacijemi w swjedźenskim ćahu 18 ze serbskej tematiku. Tule su, kaž županka Gabriela Linakowa na naprašowanje zdźěli, přesadźili, zo bě na taflach z wopisanjom předstajenych wobrazow tež serbšćina widźeć. Joachim Glücklich raznje kritizowaše, zo pobrachowaše naša rěč we wabjenju a programowych zešiwkach, štož je njedostatk zarjadowarja-města. Kritice so čłonojo předsydstwa přizamknychu. Ćim rjeńšo běše, zo je telko serbskich skupin na jewišću cyły kónc tydźenja wustupiło.
Domchowanka w Ptačecach budźe 12. oktobra. Za nazymski koncert 19. oktobra popołdnju na žurli „zeleneho wěnca“ w Ćisku su sej chór „Lipa“ a „Lipki“ přeprosyli. W starej šuli w Židźinom so 16. nowembra lětuše popołdnjo za swójby wotměje. A 21. nowembra wobdźěli so župa na projekće Kufy „Hoywoj čita na njezwučenych městnach“.
80lětne wobstaće Domowinskeje skupiny woswjećili
Trjebin (SN). Na wulki wjeršk sobotu w Trjebinje bě tež předsyda Domowiny Dawid Statnik přichwatał. Tamniša Domowinska skupina swjećeše z mnohimi hosćimi zbliska a zdaloka 80 lět wobstaća a swěrneje dźěławosće na dobro Serbstwa a jeho prezency we wšědnym žiwjenju cyłeho regiona. Zbožopřeća gmejny Trjebin je na swjedźenskim zarjadowanju wjesnjanosta Robert Sprejz sposrědkował. Tež županka župy Jakub Lorenc-Zalěski Diana Maticowa a społnomócnjena Zhorjelskeho wokrjesa za serbske naležnosće Kati Strukowa skutkownosć aktiwneje bazy třěšneho zwjazka z gratulaciju hódnoćeštej. Mnozy zastupjerjo župje přisłušacych towarstwow a dalši hosćo so tomu přizamknychu.
Prezidij so na wjerški hotuje
Budyšin (SN). Prezidij Domowiny je na wčerawšim wuradźowanju w Budyšinje přichodne zjawne posedźenje zwjazkoweho předsydstwa (ZP) přihotował, kotrež so pjatk, 26. septembra, w 18.30 hodź. w Nowym Miłorazu wotměje. Na spočatku posedźenja chce županka Diana Maticowa wo aktualnosćach ze župy Jakub Lorenc-Zalěski rozprawjeć. Temje ZP budźetej tež wotličenje hospodarskeho plana 2024 kaž tež plan za lěto 2026. Nimo toho změje ZP nadawk na starosći, dalšich čłonow swojich wuběrkow pomjenować. Zdobom chcedźa dalšeju čłonow do prezidija powołać, kotrajž mataj po wustawkach Domowiny nimo předsydy a městopředsydow gremijej přisłušeć. So wě, zo maja čłonojo Domowiny a hosćo zaso móžnosć, ZP k serbskim naležnosćam so prašeć.
Tež na lětuši kongres třěšneho zwjazka europskich narodnosćow FUEN 23. do 26.10. oktobra w Bozenje su so čłonojo prezidij přihotowali. Mjez druhim zaběrachu so z naćiskom mjeńšinoweho manifesta a kwalifikowanjom zapodatych rezolucijow, kotrež budu wobstatk hłowneje zhromadźizny FUEN.
Předsydstwo župy w Stróži
Stróža (SN). Čłonojo župneho předsydstwa „Jan Arnošt Smoler“ Budyšin schadźowachu so wčera popołdnju w šulskim muzeju „Korla Awgust Kocor“ w Stróži. Kaž regionalna rěčnica Katja Liznarjec informuje, chcychu wjac wo dźěle čłonskeho towarstwa župy zhonić. Předsydka towarstwa Radiška, Jana Pětrowa, rozprawješe wo skutkowanju towarstwa. Nimo swójskich zarjadowanjow kaž přednoškow a wustajeńcow w domje podpěruja wiki přirody při organizaciji. Při tym su wosebje za serbski program zamołwići.
Šulerjam zakładneje šule z Malešec poskićuja cyłodnjowski poskitk wo temje zahroda. Samo drastu swjateje Borbory su sebi za adwent spřihotowali. Čłon towarstwa Sieghard Kosel rysowaše, kak je so serbšćina poněčim ze wsy zhubiła. Kóždy ma na to dźiwać, zo so rěč z jadrowych serbskich kónčinach njezhubi.
Serbski sejm: Termin za skóržbu přećiwo załožbje
Njebjelčicy (SN/mb). Prěnju dobru powěsć měješe Aneta Zahrodnikowa, zapósłanča Serbskeho sejma a předsydka jeho spěchowanskeho towarstwa Smy z.t., hižo do připołdnišeje přestawki sobotnišeho posedźenja gremija: Skónčnje je Drježdźanske zarjadniske sudnistwo termin za jednanje wo skóržbje přećiwo Załožbje za serbski lud (SN su rozprawjeli) wozjewiło: Tute budźe wutoru, 18. nowembra, w 9.15 hodź. Skóržba měri so přećiwo rozsudej załožby, Serbskemu sejmej institucionelne spěchowanje zapowědźić. Sejmarjo chcedźa znajmjeńša podpěru za wutworjenje jednaćelnje dóstać, kotraž by čestnohamtskim zapósłancam poboku była.
Serbski sejm: Styki do Syriskeje
Njebjelčicy (SN/mb). Na swojim přichodnym zjawnym posedźenju sobotu wot 10 hodź. w Njebjelčanskej Bjesadźe zaběra so Serbski sejm mjez druhim z wobsadźenjom prezidija a kónčnej rozprawu dźěłoweje skupiny „Korporacija zjawneho prawa“. Něhdyši wjesnjanosta Njebjelčic a zapósłanc Serbskeho sejma Tomaš Čornak, kotryž so we wonkownym wuběrku za styki do wukraja angažuje, wo wosebitosći termina informuje: Tak přednošuje Chris Kunig, čłon iniciatiwy za demokratiski konfederalizm, wo towaršnostnym zrěčenju demokratiskeho samozarjadnistwa regiona sewjerneje a wuchodneje Syriskeje. Region je přikład za runostajenje narodow, rěčow a tež žonow, muži, młodych a starych ludźi (SN su rozprawjeli). Berlinske zastupnistwo regiona Serbski sejm hižo dołho podpěruje a pěstuje solidarisku wuměnu ze Serbami. Čornak sej tež partnerstwa mjez ludźimi z Łužicy a ze syriskeho regiona (kurdisce: Rojava) přeje.
Zajimcy su wutrobnje přeprošeni, wuradźowanje Serbskeho sejma sćěhować. Dnjowy porjad je na internetnej stronje gremija zjawnje přistupny.
