Budyšin (SN/CoR). „Dołho sym za tutym bajkowym domom pytał. Běše dźě Jan Radyserb mój lubowany, njezapomnity wučer, přećel mojeho nana a tež mój nanowski přećel.“ Tak dołho kaž Oto Wićaz njejsu Přećeljo Smolerjec kniharnje minjeny pjatk za ródnym domom basnika Jana Radyserba-Wjele pytali. Na Židowje, při Hrodźiškowych schodach w Budyšinje, hdźež steješe jónu tónle dom, započina lětuše literarne wuchodźowanje towarstwa při najrjeńšim wjedrje w zmysle Ota Wićaza z basnju „Bajka“ Radyserba.