Budyšin (SN). Dwójce wob lěto – raz nalěto, raz nazymu – přeproša předsyda Domowiny na wuradźowanje ze župankami a županami, předsydkami a předsydami čłonskich towarstwow kaž tež ze zastupjerkami a zastupjerjemi zarjada třěšneho zwjazka. Ćežišćo wčerawšeho zetkanja w Budyskim Serbskim domje bě planowane nowowusměrjenje Domowiny nastupajo jeje zjawne wustupowanje. Nawodnica­ za wizuelnu komunikaciju a design Veronika Bjarš předstaji wuslědki dźěłarničkow wo „wonkownym wobrazu Domowiny“, kotrež je zarjad Domowiny ze wšelakimi skupinami přewjedł. Hłowne prašenje bě: Kak předstajimy Domowinu a serbski lud? Měnjenje je pola wšitkich podobne: Wobdźěleni chcedźa so wšelako zwobraznić. Serbske barby, tradicije, stawizny a nic naposledk serbska rěč maja w tym zwisku prezentne być, wobmjezowanje ryzy na folkloru měło so wobeńć. Přikładnje předstaji wona naćisk noweje internetneje strony Domowiny. Zaměr noweho designa je spo­srědkować kompaktnje zakładne informacije kołowokoło Serbstwa a zmóžnić zajimcam, so jednorje mjez sobu skontaktować.