Na prěnim rjadnym posedźenju zwjazkoweho předsydstwa tuteje wólbneje periody we Wojerecach witachu jako hosćow tamnišu županku Gabrielu Linakowu a direktora Załožby za serbski lud Jana Budarja.

Wojerecy (SN/mb). Wot lěta 2013 busowe zastanišća w měšćanskich busach Wojerec serbsce a němsce připowěduja. Projekt je Werner Sroka iniciěrował. Tež dźěławosć rěčneje motiwatorki ZARI, Marije Šołćic, sej županka župy „Handrij Zejler“ jara chwali. Zdobom wuběhny, zo nochcedźa so Serbja we Wojerowskich kónčinach na folkloru zredukować dać, ale zo ma swójska rěč bytostny wuznam.

Při ponowjenju Łužiskeje kupjele pak su zamołwići nutřka a wonka na serbšćinu zabyli. Tuchwilu z nimi wo tym jednaja, zo znajmjeńša na fasadźe tež serbske mjeno připrawja, wotpowědujo z tym zakonjej. Kritisce widźi županka, zo serbšćina po 4. lětniku we Wojerecach přeco hišće na žanym kubłanišću regularny předmjet njeje.