Předsydstwo župy Delnja Łužica je na swojim wčerawšim wuradźowanju w Choćebuskim Serbskim domje wobzamknyło, swoju dźěławosć hišće efektiwnišu sčinić.

Choćebuz (SN/mb). Kaž ze zdźělenki regionalneje rěčnicy Heike Apeltoweje wuchadźa, chcedźa strukturu dźěła načolneho gremija našeje narodneje organizacije w Braniborskej polěpšić. Kaž Apeltowa našemu wječornikej na naprašowanje wobkrući, wo tym rozmysluja, wuši kruh runja prezidijej w zwjazkowym předsydstwje Domowiny wutworić, kotryž měł so w přichodźe husćišo zetkawać. Wulke koło 13 čłonow župneho předsydstwa móhło so po tutym modelu štyri króć wob lěto schadźować. Zo bychu to konkretnje zrealizowali, chcedźa nachwilny dźěłowy wuběrk załožić, kiž namjety za změny wustawkow zdźěła a klětu na hłownej župnej zhromadźiznje jako naćisk k wobzamknjenju předpołoži. Zajimcy ze župneho předsydstwa za tajki wuběrk su nětko přeprošeni, so pola Heike Apeltoweje přizjewić.