Přećiwk zwěsćili
Młodźinski klub župje přistupił
Chrósćicy (KJu/SN). Na wčerawšim posedźenju předsydstwa župy „Michał Hórnik“ w Chrósćicach móžeše županka Zala Cyžowa zastupjerja Serbskopazličanskeho młodźinskeho kluba Ławrjenca Handrika witać. Młodźinski klub bě próstwu stajił wo přistup za jeho 25 čłonow do župy. Po tym zo Handrik dźěławosć młodostnych rozłoži, su jich čłonojo župneho předsydstwa z wjesołosću do swojich rjadow přiwzali. Klětuša župna hłowna zhromadźizna ma to potom hišće wobkrućić. We wčerawšej diskusiji zrodźi so ideja, filmowy wječor jako zhromadny projekt přewjesć.
Hižo w septembru běštej so kubłanska referentka Domowiny Rejzka Wałdźic a regionalna rěčnica Katharina Jurkowa z młodostnymi zetkałoj, zo byštej jim wuměnjenja, zasady a lěpšiny čłonskich cyłkow Domowiny rozjasniłoj.
Młodźinski klub Serbske Pazlicy je třeći ryzy młodźinski klub, kotryž je w minjenymaj lětomaj župje „Michał Hórnik“ přistupił. Kamjenska župa ma aktualnje wjac hač 1 100 čłonow.
Poskitk znowa wotměnjawy
Budyšin (SN/at). Lětuše swójbne popołdnjo Budyskeje župy „Jan Arnošt Smoler“ wotměje so 12. nowembra w Rakečanskej Pawołskej šuli. Termin je chětro bliski. Tohodla njejsu čłonojo župneho předsydstwa na swojim wuradźowanju wčera w Budyskim Serbskim domje jenož dalše wjerški župneje dźěławosće hač do kónca lěta rozjimali, ale so dokładnišo z programom swójbneho popołdnja zaběrali. Kaž rěčnica Domowiny za Budysku kónčinu Sonja Hrjehorjowa zdźěli, budźe znowa wotměnjawy poskitk. Na přikład změja dźěći na jednotliwych stacijach składnosć, spěw nawuknyć, sej nawušniki paslić abo widejowu hru wo Krabaće dožiwić. Popołdnjo wuklinči, z klankodźiwadłowym kruchom.
Čłonojo župneho předsydstwa su tež wo projektach w pěstowarnjach a na zakładnych šulach rěčeli. Regionalna rěčnica měła z wšelakimi pěstowarnjemi kontakt nawjazać z tym, zo by tam bajki čitała. Nimo toho planowachu přitomni hižo adwentne zarjadowanje a dorěčachu sej prěnje ideje za klětuši dźěłowy plan.
Zasłužby wo naš lud hódnje počesćili
Lawreaća Myta Domowiny a Myta Domowiny za dorost su multiplikatorojo w narodnym dźěle
Wědu wo Serbach šěrić a k lěpšemu dorozumjenju mjez serbskimi, němskimi a wukrajnymi zajimcami přinošować. – Z přiběracej zwólniwosću sej přistajeni serbsku rěč přiswojeja a tak so tež němska zjawnosć za naležnosće našeho ludu sensibilizuje. – Z wulkim angažementom so lětsa za wobdźělenje Serbow na zjězdźe katolikow w Lipsku zasadźować. – Być jako městožupan wot 1991 konstanta w tehdy nowozałoženej zhromadnej župje Delnja Łužica. – Towarstwo twori ze zarjadowanjom „Jolka“ mjeztym instancu, kotraž na šěrokim kulturnym polu serbski dorost a na wosebite wašnje wuměnu mjez generacijemi spěchuje.
Stejišća zabrali
Wojerecy (SN/JaW). Prezidij Domowiny je wčera we Wojerecach wjacore stejišća wobjednał. Mjez druhim dwě zbytnej k zwěsćenju přisłušnosće braniborskich komunow k serbskemu sydlenskemu rumej. Třěšny zwjazk potwjerdźi, zo „město Gólišyn (Golßen) a gmejna Delnje Błóta poprawnemu serbskemu sydlenskemu rumej přisłušatej. Mamy tuž zapodaće braniborskeje serbskeje rady, přisłušnosć pruwować, za woprawnjene“, rjekny předsyda Domowiny Dawid Statnik. Mjenowanej stejišći běštej zbytnej z cyłkownje 32, kotrež je župa Delnja Łužica zdźěłała.
Trójna „Sława“ k šěsćdźesaćinam
Tež Taj Mahal w Agrje wopytali
Wot 11. oktobra přebywaše Smjerdźečanska rejwanska skupina zhromadnje z hudźbnikami na turneji w Indiskej. Dźensa připołdnju su so z New Delhija do Łužicy nawróćili.
Smjerdźaca/New Delhi (SN/JaW). Z njeličomnymi pisanymi zaćišćemi su so dźensa připołdnju čłonojo Serbskeje rejwanskeje skupiny Smjerdźaca a hudźbnicy Tomasz Nawka, Steffen Kostorž, Syman Handrik kaž tež Marta Hantušec a jeje bratr Jurij z indiskeho New Delhija do Łužicy nawróćili. To zdźěli dźensa čłon skupiny Stefan Cuška, kotryž bě so jako rejwar na jězbje wobdźělił.
Wot 11. oktobra běchu so rejwarki a rejwarjo kuklturneho ćělesa kaž tež hudźbnicy na mjezynarodnym folklornym a etniskim festiwalu w Indiskej wobdźělili. Woni zastupowachu tam Serbow a běchu tež wot Domowiny na njón delegowani. Serbscy kulturnicy běchu jedna z mnohich narodnych mjeńšinow z wšelakich krajow.
