Z mytowanskej swjatočnosću je so minjeny pjatk wubědźowanje „Krabat – pisaj, basni, moluj“ za dźěći 2. do 4. lětnika a „Krabat 2.0“ za młodostnych na žurli Budyskeho Serbskeho muzeja skónčiło.

Budyšin (SN/CoR). Dorost postaješe minjeny pjatk čiłu atmosferu na połnej žurli muzeja. „Kóždy je dobyćer, wšako smy zhromadnje něšto zdokonjeli“, dźakowaše so předsyda Domowiny Dawid Statnik wšitkim, kotřiž běchu so na kreatiwnym wubědźowanju kołowokoło serbskeho kuzłarja wobdźělili. Třěšny zwjazk bě je składnostnje 100. posmjertnych narodnin Jurja Brězana zhromadnje ze župami Michał Hórnik Kamjenc, Jan Arnošt Smoler Budyšin a Handrij Zejler Wojerecy wupisał. Kuzłać ma tež něšto z wědu činić, rozjasni direktorka Serbskeho muzeja Christina Boguszowa zakładnu mysličku dźěćom, a „wěda je móc, z kotrejž móžeš swět na dobro přeměnić“.