To a tamne (28.11.25)
Tójšto škody zawostajił je trawu syčacy roboter „Robby“ na dotal zelenym hrajnišću sportoweho towarstwa we wuchodofriziskim Aurichu. Roboter bě so w nocy při dešćikojtym wjedrje do dźěła dał. Při tym zawostajichu kolesa nastroja hłuboke brózdy na mokrym trawniku. Skónčnje wosta jězdźidło w błóće tčace. Planowane koparske hry dyrbjachu wotprajić. W nalěću chcedźa škody wuporjedźić. Hižo nětko pak dožiwjeja tam wjele zajima medijow a pomocliwosć ludźi.
Planowane ekspedicije na měsačk astronawtow Alexandera Gersta a Matthiasa Maurera hižo nětko zahorjeja. Wobaj staj sej wěstaj, zo chowa měsačk hišće tójšto potajnstwow a zo je wažny za wotwobaranje asteroidow a za škit klimy. W rańšim magacinje sćelaka ZDF rěčeštaj wobaj wo „nowej dobje“ na měsačku.
To a tamne (27.11.25)
Fanojo młodźinskeje serje „Maxton Hall“ dyrbja sej nowe wulětnišćo pytać. Planowane wotewrjenje hrodu Marienburg južnje Hannovera prěnjej kóncaj tydźenja adwenta su cofnyli. Stary a rozpadany hród je kulisa serije, kotraž ma wjele přiwisnikow. Minjeny kónc tydźenja běchu hród dwaj dnjej zjawnosći spřistupnili. Nawal pak bě tak hoberski, zo su wustróžani zamołwići nětko rozsudźili, zo nikoho wjace do hrodu njepušća.
Bližaceho so silwesterskeho praskanja dla dźěłarnistwo policije hižo nětko na masiwne ćeže pokazuje, dokelž je přemało personala. Zamołwići w policajskich direkcijach su zadwělowani, rjekny předsyda dźěłarnistwa Jochen Kopelke. Tak wočakuja zaso trašawki, namócne skupiny a zaměrne akcije přećiwo policistam. Přiběrace mnóstwo rozbuchadłow policistow wosebje starosća.
To a tamne (26.11.25)
Jědojty płun fosfin su w Istanbulu w hotelowej stwě zemrěteje Hamburgskeje swójby našli. Maćiznu su na meblach kaž tež na trjenjach hotela zwěsćili. Hač je płun smjerć swójby woprawdźe zawinował, njeje přiwšěm hišće dopokazane. Přećiwo škódnikam zasadźuja často aluminiumowy fosfit. W zwisku z włóžnotu powětra wuwiwa so jědojty fosfin. Zo je so swójba z jědźu zajědojćiła, fachowcy mjeztym wuzamkuja.
Wopačne zapodaće do nawigaciskeho nastroja je w Bayerskej zasadźenje policije zawinowało. Dźěłaćer z Durinskeje chcyše po bencin jěć. Přez misnjenje pak njewodźeše jeho nawi do dźewjeć kilometrow zdaleneho Neukirchena pola Sulzbacha, ale do 116 kilometrow zdaleneho Neukirchena w Čornym lěsu. Dokelž bě tež aku jeho telefona prózdny, wołachu kolegojo policiju. Hakle po pjeć hodźinach tu 58lětny zaso bě.
To a tamne (25.11.25)
Dohodowna atmosfera zaćehnje tele dny tež do Běłeho domu we Washingtonje. First Lady Melania Trump je wčera we wobłuku małeje swjatočnosće hodowny štom witała, kotryž přiwjezechu z konjacym zapřahom. Swoje městno změje wón w tak mjenowanym módrym salonje Běłeho domu. Mjeztym hotuja so w USA na swjedźeń swójby Thanksgiving, na kotrymž jědźa tradicionalnje trutaka.
Chětro młodaj šoferaj wosoboweho awta staj policistam na parkowanišću kupnicy w delnjosakskim Bramsche napadnyłoj. Jako chcychu zastojnicy jeju kontrolować, spěšnje wotjědźeštaj. Honjeńca wjedźeše přez wjacore wjeski, doniž hólčecaj njezastaštaj. Sobujěducy ćekny, nawróći pak so zhromadnje z maćerju. Wón bě hakle 13 lět. Šofer z 15 lětami wězo hišće jězbnu dowolnosć njeměješe. Jemu hrozy pokuta. Nichtó so njezrani.
To a tamne (24.11.25)
Dwójce přez wjerch je so paduch do wupožčowarnje hrow w hessenskim Schönecku přełamał. 34lětny bě so we wobchodźe schował, jako sobudźěłaćerjo wječor durje zamknychu. W nocy pokradny wón pjenjezy z kasy a zminy so přez wjerch. Při tym pak so přełama. Na to zalěze znowa do mjezywjercha a so tam chowaše, doniž njebě policija padustwo doprotokolowała. Popołdnju so sobudźěłaćerjo njemało stróžichu, jako paduch znowa z wjercha do wobchoda padny. Tónkróć jeho policija zaja.
Pomjerznjeny dešćik je lětanišćo Köln/Bonn wčera popołdnju nachwilnje zlemił. Čara za wotlět a přizemjenje lětadłow bě zalodźena. Sobudźěłaćerjo dyrbjachu lód wotstronić, štož zawinowaše zapozdźenja. Tež na druhich lětanišćach mějachu ćeže, jako dešć na zmjerznjenu zemju padaše.
To a tamne (21.11.25)
Dźiwny smjerd wobydlerjow gmejny Karlstein nad Mohanom w delnjej Frankskej hižo dwě lěće zaběra, bjez toho zo bychu wuslědźili, wotkal wón přichadźa. Za někotrych smjerdźi za spalenym kablom, druzy tukaja na syrik. Někotři scyła ničo nječuja. Wohnjowa wobora ničo namakała njeje. Škódne maćizny w powětře tohorunja zwěsćili njejsu. Wjesnjanosta ludźi nětko prosy, smjerd protokolować a daty gmejnje přewostajić.
Tradicionalny nalěpk wignety za wužiwanje awstriskeje awtodróhi wotstronja. Wot 1. decembra 2026 změja tam jenož hišće digitalnu wignetu. Tole je narodna rada wobzamknyła. „Žadyn nalěpk, žane kóšty za rozesłanje, žadyn riziko falšowanja“, we Wienje zdźělichu. Wignetu kupić móža ludźo internetnje abo w tankownjach, kioskach a při mjezy. 2026 płaći wona mjez 9,60 a 106,80 eurow.
To a tamne (20.11.25)
Chemiski srědk přećiwo šćónam je smjerć Hamburgskeje swójby w dowolu w Turkowskej zawinował. Toho su sej fachowcy wěsći. Swójba bě so při recepciji hotela w Istanbulu šćónow we łožach dla hóršiła. Na to běchu sobudźěłaćerjo w stwě swójby chemiske srědki přećiwo škódnikam zasadźili. Čehodla je so swójba hižo po dobrej hodźinje do hotela nawróćiła, byrnjež cyły dźeń čakać dyrbjała, njeje znate. Smjerć swójby drje je aluminijowy fosfit zawinował.
Na wšěch 236,4 miliony dolarow je mólba rakuskeho molerja Gustava Klimta při přesadźowanju w New Yorku wunjesła. Mólba „Portrait of Elisabeth Lederer“ je druhi najdróši wobraz scyła, kiž su hdy při awkciji předali. Najdróša twórba je wobraz Leonarda da Vincija „Salvator Mundi“, kotryž bě lěta 2017 nic mjenje hač 450,3 miliony dolarow wunjesł.
To a tamne (18.11.25)
Po smjerći maćerje a dweju dźěsći je wčera wječor tež nan Hamburgskeje swójby, kiž bě w Turkowskej na dowolu, zemrěł. Wón wudycha w jednej z Istanbulskich chorownjow. Zamołwići tukaja, zo je so swójba ze žiwidłami zajědojćiła. Runočasnje pak maja tež pokiwy na zajědojćenje z chemikalijemi, kotrež bě hotel přećiwo škódnikam zasadźił. Mjeztym su jědnaće podhladnych zajeli.
Swójski wobraz staj šibałcaj w swětosławnym muzeju Louvre w Parisu njedaloko „Mony Lisy“ Leonarda da Vincija zaměstniłoj. Wobrazowy ramik wobsteješe z lego-klockow, kotrež njeběchu při wěstotnej kontroli při zachodźe napadnyli. Byrnjež žana škoda njenastała, chce Louvre prawnisce přećiwo mužomaj postupować.
To a tamne (17.11.25)
Po tym zo su mać a jeje dźěsći z Hamburga w dowolu w Turkowskej zemrěli, bu nětko w Istanbulu tež pjekar zajaty, kotryž je we wobchodźe njedaloko hotela swójby dźěłał. Z tym je ličba zajatych na wosom stupała. Po informacijach justicneho ministerstwa jedna so wo wikowarjow ze słódkosćemi, z pjelnjenymi zakłapnicami a z jědźemi z črjewa ćelatow. Zamołwići z toho wuchadźeja, zo běchu so turisća z Němskeje z jědźu zajědojćili. Nan swójby je hišće w chorowni.
Smjertnych nadpadow mjedwjedźow dla je Japanska hońtwu na tute rubježne zwěrjata zahajiła. Dokelž dosć nazhonitych hajnikow nimaja, chcedźa bywšich policistow a powołanskich wojakow pohnuć, hońtwjerske pruwowanje złožić. Mjeztym su samo kruty zakoń wo brónjach změnili. Wot apryla su mjedwjedźe znajmjeńša 13 ludźi morili.
To a tamne (14.11.25)
Pjenjezy pokradnył a dźěl zaso wróćił je paduch w hornjofrankskim Wunsiedelu. Dotal njeznaty bě 71lětneho prosył, jemu pjenjezy měnić. Jako muž swoju móšeń wočini, paduch spěšnje do njeje hrabny a 70 eurow wućahny. Starc za nim běžeše a sej pjenjezy wróćo žadaše. Na to paduch pozasta, jemu 20 eurow do ruki stłóči a so zminy. Policija za skućićelom pyta a prosy swědkow wo pomoc.
Na wšěch 500 kilogramow kokaina w kistach bananow je policija w Lübecku a susodnych wokrjesach namakała. Drogi běchu mjez bananami schowane, kotrež mějachu wjacore wobchody wulkeho wikowarja žiwidłow dóstać. Prěnje pakćiki přistajeni wuhladachu, jako jim spedicija banany přiwjeze. Minjeny čas běchu stajnje zaso wulke mnóstwa drogow namakali, kotrež wikowarjo z łaćonskeje Ameriki po tutym puću do Europy pašuja.
