To a tamne (17.04.26)
Dulu złota je muž z hornjeje Bayerskeje w starym trezorje namakał. Złoto bě w tajnym fašku schowane, kotryž so připadnje wočini, jako muž trezor powali. 90lětny wobsedźer bě drje na złoto zabył, jako woclany kamor za runje 15 eurow předa. Nowy wobsedźer jemu złoto bjez wahanja wróći. „Štož mi njesłuša, mi žane wjeselo njewobradźa“, 56lětny rjekny. Ćim bóle so 90lětny wjeseleše: Złoto je 32 000 eurow hódne.
Dalšich 129 skóržbow su dźěći w awstralskim Sydneyju přećiwo bywšemu hladarjej zapodali, kotryž wot lěta 2025 znjewužiwanja dźěći dla w přepytowanskej jatbje sedźi. Dotal wumjetuja jemu wosom padow znjewužiwanja. Nowe skóržby potrjechja zhotowjenje materiala wo znjewužiwanju, filmowanje ludźi bjez jich dowolnosće a splažne znjewužiwanje dźěći. Njeskutki su so po dotalnych přepytowanjach w času mjez 2009 w 2025 w dźěsćowni wotměli.
To a tamne (16.04.26)
Zemrěty hrajer loterije je w Porynsko-Pfalcy w loteriji Eurojackpot wjace hač 700 000 eurow dobył. Muž bě lisćik wupjelnił, potom pak zemrěł. Najebać to wostanje jeho tipowanje płaćiwe, loterijowa towaršnosć Lotto24 zdźěla. Po prawniskim pruwowanju su wudowej 703 600 eurow wupłaćili. W hrě Eurojackpot tipuja hrajerjo pjeć z 50 ličbow kaž tež dwě euroličbje. Loteriju hraja we wjacorych europskich krajach. Dwójce wob tydźeń dobyćerjow zwěsća.
Hoberski nawal mejskich brukow wočakuja lětsa zaso na juhu Hessenskeje. Fachowcy wočakuja 500 milionow zwěrjatow, wosebje wokoło Darmstadta. Šoferojo awtow měli so na to nastajić, zo bruki při ćmičkanju chětro nisko leća a do awtow prasnu. Masowy nawal wotměwa so prawidłownje kóžde štyri lěta. Přičiny su sucha póda a melioracija polow.
To a tamne (15.04.26)
Lochke zemjerženje su fachowcy wčera wječor w regionje Lipsk/Groitzsch zwěsćili. Zemjerženje měješe nisku hódnotu 3,2. Po prěnich wobličenjach geofyzikarjo Freibergskeje Hórnistwoweje akademije z toho wuchadźeja, zo ležeše epicentrum rženja mjez Neukieritzschom, Lucka a Groitzschom. We wobkruhu něhdźe 60 do 70 kilometrow su ludźo třasenje zemje wčera pytnyli.
Sobudźěłaćerjej třěchikryjerskeho zawoda staj wčera popołdnju w hessenskim Altenhagenje třoch muži wobkedźbowałoj, kotřiž so do jězdźidła jeju firmy zadobychu a dźěłowy grat pokradnychu. Třěchikryjerjej měještej z rěbla najlěpši wuhlad. Wonaj dołho njechabłaštaj a spytaštaj skućićelow popadnyć, štož so jimaj tež poradźi. Dweju paduchow staj rjemjeslnikaj zadźeržałoj, doniž policija njepřijědźe.
To a tamne (14.04.26)
50 000 eurow w plyšowym bariku namakała je nižozemska policija w póstowym centrumje na lětanišću Aachen-Maastricht. Njewšědne šowy a druhe spodźiwnosće su zastojnikow pohnuli, sej posyłku bliže wobhladać. Při wotewrjenju namakachu fałdowane bankowki 50 eurow, cyłkownje 50 000 eurow. Nětko pytaja za adresatom. Pjenjezy su sćazali.
Při demonstraciji za w pěsku tčacu wjelrybu w zaliwje kupy Poel w Baltiskim morju je k rozestajenjam z policiju dóšło. Wjacori demonstranća běchu přez płót zalězli, na čož jich policisća wróćo pósłachu. Tež nakładnej awće dyrbještej pod dohladom policije kupu wopušćić. Minjene dny běchu demonstranća wospjet spytali, so k wjelrybje předrěć. Zwěrjo je dźeń a słabše. Přichodny čas drje zahinje. Dalša pomoc nima hižo zmysła, fachowcy měnja.
To a tamne (13.04.26)
Pjasćować přećiwo synej Donalda Trumpa chce Hunter Biden, syn bywšeho prezidenta USA Joewa Bidena. Bój w železnej klětce, kaž je to w USA z wašnjom, chce aktiwist kanala Youtube Andrew Callaghan organizować. Na toho naprašowanje bě 56lětny Hunter Biden rjekł, zo by do klětki stupił, staj-li Trumpowej synaj Eric a Donald Trump jr. k tomu zwólniwaj. Wobaj wšak njejstaj so dotal wuprajiłoj, hač přećiwo Hunterej nastupitaj.
Porjadnje z wodu so popryskajo witaja w Thailandskej nowe lěto. Wot dźensnišeho hač do srjedy móže so kóždemu stać, zo přemokany domoj přińdźe. Při temperaturach wokoło 40 stopnjow wšak tole zlě njeje. Za pryskanje wužiwaja ludźo pisane wodowe pistole, kiž su wšudźe na předań. Prawidłownje je tam tež tójšto turistow. Drohich lětow dla pak je jich lětsa wo wjele mjenje.
To a tamne (10.04.26)
Wjace hač 300 nakupowanskich wozyčkow pokradnył a wikowarjej šrota předał je 58lětny w Mannheimje. Škoda wučinja 70 000 eurow, policija zdźěla. Podhladneho běchu předwčerawšim, srjedu, lepili, jako na parkowanišću nakupowanišća wozyčki do swojeho awta tykaše. Dalše wozyčki bě sej hižo za transport nabok stajił. Policija zwěsći, zo je muž hižo sta wozow spakosćił. Wikowarja, kiž je wozy kupował, njejsu hišće wuslědźili.
Dźěćo je na kromje awtodróhi žona njedaloko Hamburga porodźiła. Wuchowansku słužbu běchu „na wosebite zasadźenje“ na A 23 wołali. Jako wohnjowa wobora dojědźe, běchu lěkarjo a policija hižo na městnje. Wohnjowi wobornicy na kromje jězdnje stejace awto zawěsćichu a při zastaranju maćerje a dźěsća pomhachu. Wobeju dowjezechu do chorownje.
To a tamne (09.04.26)
Fanowu kulturu motorsportoweho wubědźowanišća Sachsenring pola Hohensteina-Ernstthala su do sakskeje krajneje lisćiny imaterialneho kulturneho herbstwa zapisali. Wo tym je ministerka za kulturu a turizm Barbara Klepsch informowała. Sakska chwali sej kulturnu formu, kotraž je tam hižo lětdźesatki typiska a kiž skutkuje daloko za mjezami Sakskeje. Hač Sachsenring tež do cyłoněmskeje lisćiny zapisaja, chcedźa kultusowi ministrojo klětu rozsudźić.
Cyrkej za 99 000 eurow je w Erfurće na předań. Tamniša wosada swj. Ławrjenca poskićuje cyrkej jako hrabnjenčko, nowiny rozprawjeja. We wotpowědnym nawěšku rěka, zo móhli sej předstajić, zo so dom w spirituelnym, kulturnym abo socialnym wobłuku dale wužiwa. Spadowaceje ličby wěriwych dla tam hižo žane Bože słužby njeswjeća.
To a tamne (08.04.26)
Štyrjo astronawća swětnišćoweje měsačkoweje misije Artemis 2 su po puću domoj. Ze swojej kapslu Orion su mjeztym dypk docpěli, hdźež je grawitacija zemje sylniša hač měsačka. W nocy na sobotu ma wobsadka w Pacifiskim oceanje přizemić. Po wjace hač 50 lětach su to prěni astronawća, kotřiž su njedaloko měsačka pobyli. Minjeny štwórtk běchu wotlećeli.
Domjace nadawki w swojej dotalnej formje su po měnjenju zwjazka wučerjow Němskeje wohrožene. Přičina je kumštna inteligenca (KI), kotruž šulerjo dźeń a časćišo wužiwaja. Tež wobšěrniše dźěła we wučbje su přiběrajcy potrjechene. Přichodnje dyrbja so šulerjow dokładnišo prašeć, kak su nadawki spjelnili. Zwonka šule hodźi so mjeztym wšitko z KI zrjadować. Jedna móžnosć je, sej zaso rukopisne dźěła šulerjow žadać, zo bychu jebanstwu zadźěwali.
To a tamne (07.04.26)
Najebać dobyće kołojězby po Flandernskej předwčerawšim, njedźelu, dyrbi dobyćer kolesowarskeho wubědźowanja Tadej Pogačar z prawniskimi konsekwencami ličić: Wón bě zhromadnje z dalšimi wobdźělnikami přez železniski přechod smalił, byrnjež jich čerwjena swěca zastać namołwjała. Statne rěčnistwo pad přepytuje. Profijam hrozy pokuta hač do 5 000 eurow a sćazanje jězbneje dowolnosće – znajmjeńša wosom dnjow.
Dale hač štó do toho su so astronawća swětnišćoweje misije „Artemis 2“ wot zemje wotsalili. W swojej kapsli „Orion“ su štyrjo wobdźělnicy lěta 1970 nastajeny rekord misije „Apollo 13“ přewinyli a so wjac hač 400 171 kilometrow wot zemje zdalili. Mjeztym je grawitacija měsačka sylniša hač přićahliwosć zemje. Astronawća běchu štwórtk wotlećeli.
To a tamne (02.04.26)
Socialistiska nowina nd (hač do 2022 Neues Deutschland) wot wčerawšeho hižo wšědny dźeń w ćišćanej formje njewuchadźa. Jenož kónctydźenske wudaće so hišće na papjerje produkuje. Něhdyši centralny organ SED (wot 1946) měješe 1989 hišće 1,2 milionaj abonentow, tuchwilu je jich 12 000. Wudawaćel je nd.drustwo. Wutoru su so z titulom „Tschüss Papier, HALLO PIXEL“ ze wšědnym ćišćanym wudaćom rozžohnowali.
Tři hodźiny w sněze za psom pytali su pomocnicy hórskeje słužby njedaloko Berchtesgadena. Na kóncu móžachu zwěrjo njezranjene zaso jeho wobsedźerce přepodać. Wona bě ze sněhakami ze swojim złotym labradorom na zasněženych horach po puću, jako so pos z nahłeje skały do hłubiny suny. Žona njemóžeše jeho hižo namakać, tuž zawoła hórsku słužbu na pomoc.
