To a tamne (11.12.25)
Tysacy kokošow su při wobchadnym njezbožu na awtodróze A36 w Smolinach twochnyli. Kury běhaja njedaloko Quedlinburga po awtodróze, nadróžna słužba w Magdeburgu zdźěla. Do toho bě so pjeriznu transportowace nakładne awto z dotal njeznateje přičiny powaliło a 15 tonow ćežke wjezwo zhubiło. Sobudźěłaćerjo weterinarneho zarjada nětko spytaja, kokoše zaso popadnyć.
Na wšěch 200 000 litrow zemskeho wolija je w Braniborskej po njezbožu wuběžało. Tole sta so při přihotowanju planowaneho testa wěstoty wolijowoda. Sabotažu wohnjowa wobora wuzamkuje. Wolij bě w klumpowej staciji njedaloko Gamzowa na sewjeru zwjazkoweho kraja z małeje dźěry pod wulkim ćišćom wjele metrow do wysokosće wutřělił. Z wosebitymi awtami nětko spytaja, wolij wot łuki wotsrěbać.
To a tamne (10.12.25)
Wužiwanje socialnych medijow wot młodostnych pod 16 lětami je Awstralska zakazała – jako prěni kraj swěta. Potrjecheni njesmědźa žane swójske konta na platformach wulkich socialnych syćow wobsedźeć. Měnjene su wosebje Instagram, Tiktok, Snapchat, Facebook a Youtube. Předewzaća dyrbja starobu wužiwarjow pruwować. Hewak hroža wysoke pokuty. Wuwzate su komunikaciske słužby kaž Whatsapp, mejlki abo internetne hry.
Njepřemyslene wuprajenja Brigitty Macron zbudźa w Francoskej diskusije a so w interneće rozšěrjeja. Mandźelska francoskeho prezidenta bě skupinu feministiskich aktiwistkow „mazane šlimpy“ mjenowała. Zakuklene feministki běchu wustup komikarja Aryja Abittana přetorhnyli, wumjetujo jemu wumocowanje žonow. Macron nětko spyta, wuprajenja jako ryzy kritiku złahodnić.
To a tamne (09.12.25)
Njeluba překwapjenka na swjedźenju swjateho Mikławša w braniborskim Wikowje (Elsterwerda): Wobsedźer bydlenja dyrbješe sobotu wječor zwěsćić, zo su njeznaći z jeho bydlenja myjadło a cyłu kupansku wanju pokradnyli. Paduši běchu při tym durje bydlenja chětro wobškodźili a tež dalše wěcy pokradnyli. Što z myjadłom a wanju chcedźa, policija nětko přepytuje.
Na wšěch 130 hodownych štomow su paduši z mobilneho předawanišća w Choćebuzu pokradnyli. Sobudźěłaćerjo njeskutk wčera rano zwěsćichu a policiju informowachu. Prawdźepodobnje běchu so paduši kónc tydźenja do předawanišća zadobyli. Policija njeskutk přepytuje. Cyłkownu hódnotu rubizny trochuja na wjace hač 4 000 eurow. Kriminalna policija tuka, zo spytaja paduši hodowne štomy na prowizoriskim stejnišću za tunju płaćiznu předać.
To a tamne (08.12.25)
Hoberska žołma je na kupje Teneriffa třoch turistow moriła a dalšich třoch zraniła. Za dalšej wosobu hišće pytaja. Ludźo běchu w přirodnym płuwanskim basenku na zapadźe španiskeje dowoloweje kupy, jako jich žołma do morja storhny. Po dotalnych informacijach pomocneje słužby běchu mjez woporami turisća z Italskeje a Słowakskeje. Hakle před měsacom mějachu tam podobne njezbožo.
Moderator Thomas Gottschalk je so na swój publikum wobroćił, po tym zo je so schorjenja na raka dla z telewizy wróćo sćahnył. Přichodne měsacy chce so wón dospołnje swojemu wustrowjenju wěnować. „Wěm, zo tole rozumiće a zo maće to za prawje.“ Dale piše 75lětny internetnje: „Njezawěram durje dospołnje. Spušćam so na to, zo wostanjeće mi swěrni kaž minjene 40 lět. Planuju kaž mój přećel terminator: Nawróću so!!!“
To a tamne (05.12.25)
Na wšěch 59 kuskow butry je policija we wačoku třoch paduchow w Podstupimje namakała. Trójka bě nimale 15 kilogramow butry do wačoka tyknyła a so z kupnicy zminyła. Kedźbliwy kupc bě tole wobkedźbował. Přiwołana policija skućićelow njedaloko kupnicy zaja. Mužojo su policiji druhich padustwow dla derje znaći. Nětko ma sudnik rozsudźić, hač dyrbja do jastwa. Što cwólba z telko butru chcyše, njeje znate.
Ćeknjenu kruwu su po wjacorych měsacach błudźenja na brjoze jězora w hornjej Bayerskej popadnyli. Arielle, kaž ju pomocnicy mjenuja, je mjeztym na statoku organizacije za škit zwěrjatow. Kruwa bě před poł lětom z pastwy ćeknyła a žiworješe na kromje jězora. Wšitke pospyty, skoćo popadnyć, běchu zwrěšćili. Tuž ju nětko z třělbu pohłušichu. Zamołwići so bojachu, zo wona zymu njepřetraje.
To a tamne (04.12.25)
Wopity šup zbudźa w USA zadźiwanje a tójšto posměwka. Zwěrjo bě so do wobchoda alkoholiskich napojow w staće Virginia na wuchodźe kraja zadobyło a regale přeslědźiło. Při tym so bleša palenca rozbi. Rozlaty palenc je šupej prawdźepodobnje słodźał. Přistajena namaka wopojene zwěrjo na brjuše ležace na nuzniku wobchoda. Sobudźěłaćerjo organizacije za škit zwěrjatow dowjezechu jeho do zwěrjatownje a pozdźišo do lěsa.
Paducha z bydlenja wućěriła je žona we wjaceswójbnym domje w sewjerorynsko-westfalskim Neussu. Žona bě so wokoło 18 hodź. lehnyła, jako spodźiwne zwuki w bydlenju zasłyša. Na to widźeše paducha přez wobłoženje balkona lězć. 57lětna so do njeho da a jeho storkaše, na čož so muž přez balkon zaso zminy. Policija prosy, zo ju ludźo w tajkim strašnym padźe zawołaja a na nju dočakaja.
To a tamne (03.12.25)
Po wšěm swěće jědźa dźěći dale a wjace sylnje předźěłane žiwidła ze strašnymi sćěhami za strowotu, wuwiće a duchowne derjeměće. Tole je wuslědk přepytowanja Unicef. Nastork bě rozprawa lěkarskeho fachoweho časopisa The Lancet, kotraž strowotniske strachi industrielnje předźěłanych žiwidłow za młodostnych naliči. Měnjene su słódke napoje, chipsy, fast food, pizza a słódkosće.
Na jednoreho wobydlerja degraděrowany bywši britiski princ Andrew njedóstanje wotškódnjenje, dokelž dyrbješe swoje luksusowe bydlenje w hrodźe Windsor wopušćić. Tole su fachowcy za imobilije zwěsćili. Kral Charles III. bě wukazał, zo dyrbi Andrew z hroda wućahnyć, dokelž je do afery wokoło seksualneho złóstnika Jeffreyja Epsteina zapřijaty. Nimo toho dyrbješe wšitke titule a priwilegije wotedać.
To a tamne (02.12.25)
Na raka schorjeny moderator Thomas Gottschalk njeje po słowach swojeje žony Kariny k lěkarjej hić chcył. Spočatk julija je jej switało, zo z jeje mužom něšto njetrjechi. „Thomas bě přiběrajcy měrny a blědy a dyrbješe často na nuznik. Tajkeho jeho njeznajach.“ W Mnichowskej chorowni raka zwěsćichu a Gottschalka hnydom operowachu. 75lětny bě nowinarjam njedawno přeradźił, zo je chory. Nětko čaka zhromadnje ze žonu na wuslědk dalšich přepytowanjow.
Skupinu třoch padušnicow je policija w sewjerorynsko-westfalskim Hammje lepiła. Swědkojo běchu wobkedźbowali, kak žony při durjach susodneho domu klinkaja a po tym do zahrody du. Jako policija dojědźe, spytachu žony přez płót ćeknyć, čemuž zastojnicy zadźěwachu. Padušnicy běchu 14, 16 a 24 lět stare. Posleńca – zadnje durje domu – bě wobškodźena.
To a tamne (01.12.25)
Hokejowy turněr na běrowowych stólcach su zaso w Bremenje přewjedli. Něhdźe 500 sportowcow je so kónc tydźenja na tym wobdźěliło. Nastał bě event skerje připadnje: Mějićel wobchoda za běrowowe stólcy chcyše zawodnu adwentničku ze skurilnym wubědźowanjom womłodźić. Mjeztym přichadźeja na wubědźowanje mustwa ze wšeje Němskeje z fanami, bubnarjemi a rejwarkami.
Łuskača, tak wulkeho kaž čłowjek, je njeznaty skućićel w šotiskim Edinburghu před hosćencom pokradnył. Wobrazy stražowanskeje kamery pokazuja, kak z kolesom nimo jěducy zakukleny muž dwaj metraj wysoku a nic runje lochku postawu hrabnje a z njej wotjědźe. Při tym by wón bjezmała padnył. W socialnych medijach so nad kurioznym podawkom směja. Što paduch z tysac eurow drohej postawu chce, njewědźa.
To a tamne (28.11.25)
Tójšto škody zawostajił je trawu syčacy roboter „Robby“ na dotal zelenym hrajnišću sportoweho towarstwa we wuchodofriziskim Aurichu. Roboter bě so w nocy při dešćikojtym wjedrje do dźěła dał. Při tym zawostajichu kolesa nastroja hłuboke brózdy na mokrym trawniku. Skónčnje wosta jězdźidło w błóće tčace. Planowane koparske hry dyrbjachu wotprajić. W nalěću chcedźa škody wuporjedźić. Hižo nětko pak dožiwjeja tam wjele zajima medijow a pomocliwosć ludźi.
Planowane ekspedicije na měsačk astronawtow Alexandera Gersta a Matthiasa Maurera hižo nětko zahorjeja. Wobaj staj sej wěstaj, zo chowa měsačk hišće tójšto potajnstwow a zo je wažny za wotwobaranje asteroidow a za škit klimy. W rańšim magacinje sćelaka ZDF rěčeštaj wobaj wo „nowej dobje“ na měsačku.
