To a tamne (26.06.24)
Wobchod luksusoweje marki Chanel wurubić chcyli su njeznaći minjenju nóc na Berlinskim Kurfürstendammje w zapadnym dźělu města. Po mjeztym hižo zwučenym wašnju zajědźechu z awtom z wotmachom do wukładneho wokna. Při tym so škleńca wokna a wšelake twory we wobchodźe zničichu. Po prěnich dopóznaćach policije pak su skućićeljo bjez rubizny ćeknyli. Stajnje zaso tam rubježnicy na tute wašnje spytaja, wobchody dosć drohich wudźěłkow wurubić.
Zabłudźeneho šotiskeho turista wuchowali su španiscy policisća w horach kupy Teneriffa. 19lětny dowolnik bě so minjeny pjatk samlutki na naročne pućowanje po horach kupy před zapadnym pobrjohom Afriki podał. Jako so wón po hodźinach njenawróći, wołachu hórsku słužbu. Pomocnicy dospołnje wučerpaneho, ale stroweho muža w skałach namakachu.
To a tamne (25.06.24)
„Najwohidniši psyk swěta“ je mały pekinesa z mjenom „Wild Thang“. Wosom lět stare zwěrjo je sej titul minjeny pjatk při wubědźowanju w kaliforniskim Petaluma zdobył. Dotal bě pos stajnje druhe město wobsadźił. Wobsedźerce přepodachu za titul myto 5 000 dolarow (4 600 eurow). Wona apeluje, zo njeńdźe wo to, wohidne zwěrjo wusměšować, ale skerje wo to, lubozne a rjane stronki njewšědneho psa wuslědźić a sej wažić.
Za wubědźowanja olympiskich hrow w Parisu přeco hišće njekmana je kwalita wody rěki Seine wosrjedź francoskeje stolicy. Tole zdźěla měšćanske zarjadnistwo. Wina su spadki minjenych tydźenjow, kotrež su wysoku koncentraciju fekalnych bakterijow zawinowali. Najebać to su sej zamołwići wěsći, zo so kwalita wody hač k zahajenju sportoweho wjerška 26. julija tola hišće polěpši.
To a tamne (24.06.24)
Naduwanja dla su policajskeho šefa britiskeho hrabinstwa Northamptonshire pušćili, dokelž bě wón swój žiwjenjoběh chětro chroble porjeńšił. Tak muž twjerdźeše, zo bě we wójnje wo Falklandske kupy přećiwo Argentinskej wojował, byrnjež to runje 15 lět stary był. Pječa je tež na sławnej marinowej akademiji studował: tam pak běchu jeho wotpokazali. Naduwak bě wot lěta 2018 policajski šef. Nětko njesmě so muž ženje wjace do policajskeje słužby nawróćić.
Regal drogerijoweho wobchoda za swój wačok znjewužiwał je muž na Dortmundskim dwórnišću, po tym zo njebě žadyn kašćik k zamknjenju wjace namakał. Sobudźěłaćerjo alarmowachu wačoka dla policiju, kotraž přijědźe z fachowcami za znješkódnjenje bombow. Dźěl dwórnišća zawrěchu. Muž dyrbi nětko z chětro drohej chłostanku ličić.
To a tamne (21.06.24)
26 000 eurow w ručnej tobole ležo wostajił je 20lětny na wustupje awtodróhoweho wotpočnišća w Hornjej Bayerskej. Při wšěm měješe wulke zbožo: Sprawny namakar je tobołu sobudźěłaćerjej tankownje wotedał. Tón zawoła wulkeje sumy pjenjez dla policiju. Jako so 20lětny po hodźinje nawróći, móžachu jemu pjenjezy přepodać. Młody muž bě po puću k wikowarjej po nowe awto a bě na pjenjezy cyle rozpjeršeny prosće zabył.
Policiji dźěło chětro wolóžił je paduch w Nürnbergu. Jako chcyše awtomatisku kameru při cuzym domje wotšrubować, jeho nastroj filmowaše a zdobom wobsedźerja alarmowaše. Tón móžeše tež po padustwje z pomocu nawigacije hišće zwěsćić, hdźe kamera runje je. Zastojnicy muža wosrjedź města zajachu. Kameru měješe 35lětny paduch hišće při sebi. „To bě jara komfortabelne“, policija piše.
To a tamne (20.06.24)
Skóncowany helikopter wuchowanskeje słužby je wčera awtodróhu A2 pola Castropa-Rauxela w Sewjerorynsko-Westfalskej wjacore hodźiny blokował. Mašina bě po wobchadnym njezbožu popołdnju na awtodróze přizemiła. Techniski defekt pak wotlětej helikoptera zadźěwaše. Hakle po tym, zo běchu přiwołani specialisća škodu porjedźili, móžeše mašina wječor zaso wotlećeć.
Z oranžowej barbu popryskali su klimowi aktiwisća swětoznaty kamjentny monument Stonehenge we Wulkej Britaniskej. Skupina Just Stop Oil je widejo wozjewiła, na kotrymž so dwě wosobje kamjentnemu kruhej bližitej a barbu na njón pryskatej. Demonstranća žadaja sej wot britiskeho knježerstwa pisomne přilubjenje, zo wot lěta 2030 žane fosilne paliwa wjace njewužiwa. Britiski premier Sunak mjenowaše aktiwistow „wandalow“.
To a tamne (19.06.24)
Rój pčołkow w Stuttgartskim koparskim stadionje je – krótko do hry němskeje wubranki přećiwo Madźarskej – njeměr zbudźił. Fachowcy wohnjoweje wobory dyrbjachu pčołki popadnyć, kotrež při digitalnej wabjenskej sćěnje hnězdźachu. Wohnjowi wobornicy wzachu rój sobu, po tym zo běchu dźěl wabjenskeje sćěny wottwarili. W meji běchu pčołki hižo raz do koparskeje hry podobne zasadźenje wobornikow w Stuttgarće zawinowali.
Jasne dobyće němskeje koparskeje wubranki dźensa přećiwo Madźarskej je mórska lawica Sissi w Lipšćanskim zwěrjencu wěsćiła. Sissi dyrbješe so rozsudźić, do kotreho sudobja wona bul ćisnje, do madźarskeho abo do němskeho. „Bjez wahanja“ lawica bul do němskeho bowa transportowaše. Němska hraje dźensa wječor. Prěnju hru přećiwo Šotiskej bě wona „njerozsudnje“ wěsćiła.
To a tamne (18.06.24)
„Chaotiske poměry“ wokoło hry Jendźelskeje přećiwo Serbiskej na europskich koparskich mišterstwach w Gelsenkirchenje zamołwitych zaběra. Mjeztym zo rěča zamołwići města wo pozitiwnej bilancy, kritizuje zwjazk jendźelskich fanow FSA njeznjesliwe poměry nastupajo transport jendźelskich přiwisnikow. Tak dyrbjach pječa po hrě tři hodźiny na bus čakać. Město šwika zadźerženje jendźelskich fanow, kotrež su busy wobškodźili a wospjet nuzowe borzdźidło wužiwali.
Policista do nohi kusnyła je wopita žona w Nürnbergu. Na lětanišću nochcychu pjanu 43lětnu do lětadła do Londona pušćić, na čož wona chětro agresiwnje reagowaše. Policisća ju sputachu a sobu wzachu. Na policajskej straži so wona dale wobaraše a policista kusny. Druheho zastojnika wona drapny. Nětko přećiwo njej ranjenja ćěła dla přepytuja.
To a tamne (17.06.24)
Awto rentnarjow rubił je muž wčera we Werdauwje w Šwikawskim wokrjesu. Wobaj chcyštaj wóz njedaloko tankownje samaj wurjedźić, jako so njeznaty za wodźidło awta sydny a wotjědźe. 70lětny podarmo spytaše, paducha zadźeržeć. Při tym so starc snadnje zrani. Policija paducha krótko na to njedaloko starownje lepi, hdźež awto steješe. 48lětny bě wopity. Wón dyrbi so rubježneho padustwa a dalšich přeńdźenjow dla zamołwić.
Grilowaneho krokodila zesłodźeć dali su sej wobydlerjo gmejny Bulla na sewjeru Awstralskeje, hdźež bydla prawobydlerjo Aborigine. Krokodil bě so stajnje zaso dźěćom a psam bližił a wulki njeměr zbudźił. Skónčnje ze zamołwitymi wobzamknychu, 3,63 metrow dołhi krokodil zatřělić. Po wašnju prawobydlerjow sydaše potom krokodilowa poliwka a grilowane mjaso w bananowych łopjenach.
To a tamne (14.06.24)
Njerozsudnu koparsku hru Němskeje přećiwo Šotiskej dźensa wječor w Mnichowje wěsći mórska lawica Hilla w Lipšćanskim zwěrjencu. Lawica hraješe sej z bulomaj w němskich a šotiskich barbach we wodowym basenku a suny wobaj do wrotow, najprjedy šotiski, po tym tež němski. To rěka, zo Šotiska prěnje wrota třěli a Němska pozdźišo wuruna.
Z kolesom hač k najsewjernišemu dypkej Europy w Norwegskej dojěłoj stej sotře ze Smolinow Traina a Phelia Müller wčera rano. Na wšěch 2 650 kilometrow stej žonje zmištrowałoj, na kolesu a zdźěla pěši. Startowałoj běštej w Schleswigsko-Holsteinskej na specialnym kolesu za zbrašenych. Na nim móžeštej sotře w starobje 22 a 24 lět zhromadnje sedźeć. Wšědnje jědźeštej něhdźe 80 kilometrow, wšelake wotrězki zmištrowaštej pěši. Za čaru trjebaštej cyłkownje 35 dnjow.
To a tamne (13.06.24)
Płomjenja w sawnje su 20lětneho w Henningsdorfje we wokrjesu Hornja Habola zranili. Muž bě předwčerawšim, wutoru, w sawnje koncentrat wšelakich eteriskich wolijow na horce kamjenje kidał, bjez toho, zo by je do toho z wodu měšał. Na to bě so naliwk zapalił. Zranjeneho muža dowjezechu do chorownje.
Sta kilogramow drogow je policija pola wulkowikowarja sadu a zeleniny w Groß Kreutzu w Podstupimskim wokrjesu sćazała. Po prěnim trochowanju jedna so wo 450 kilogramow. Drogi ležachu w małych pakćikach mjez bananami. Sobudźěłaćerjej běchu podhladne pakety napadnyli. Namakanka njeje prěnja w zawodźe. Loni w septembru běchu 500 kilogramow kokaina na samsne wašnje namakali. Drogowe cwólby we łaćonskej Americe wužiwaja transport zeleniny, zo bychu drogi do Europy dowjezli.
