To a tamne (19.06.24)
Rój pčołkow w Stuttgartskim koparskim stadionje je – krótko do hry němskeje wubranki přećiwo Madźarskej – njeměr zbudźił. Fachowcy wohnjoweje wobory dyrbjachu pčołki popadnyć, kotrež při digitalnej wabjenskej sćěnje hnězdźachu. Wohnjowi wobornicy wzachu rój sobu, po tym zo běchu dźěl wabjenskeje sćěny wottwarili. W meji běchu pčołki hižo raz do koparskeje hry podobne zasadźenje wobornikow w Stuttgarće zawinowali.
Jasne dobyće němskeje koparskeje wubranki dźensa přećiwo Madźarskej je mórska lawica Sissi w Lipšćanskim zwěrjencu wěsćiła. Sissi dyrbješe so rozsudźić, do kotreho sudobja wona bul ćisnje, do madźarskeho abo do němskeho. „Bjez wahanja“ lawica bul do němskeho bowa transportowaše. Němska hraje dźensa wječor. Prěnju hru přećiwo Šotiskej bě wona „njerozsudnje“ wěsćiła.
To a tamne (18.06.24)
„Chaotiske poměry“ wokoło hry Jendźelskeje přećiwo Serbiskej na europskich koparskich mišterstwach w Gelsenkirchenje zamołwitych zaběra. Mjeztym zo rěča zamołwići města wo pozitiwnej bilancy, kritizuje zwjazk jendźelskich fanow FSA njeznjesliwe poměry nastupajo transport jendźelskich přiwisnikow. Tak dyrbjach pječa po hrě tři hodźiny na bus čakać. Město šwika zadźerženje jendźelskich fanow, kotrež su busy wobškodźili a wospjet nuzowe borzdźidło wužiwali.
Policista do nohi kusnyła je wopita žona w Nürnbergu. Na lětanišću nochcychu pjanu 43lětnu do lětadła do Londona pušćić, na čož wona chětro agresiwnje reagowaše. Policisća ju sputachu a sobu wzachu. Na policajskej straži so wona dale wobaraše a policista kusny. Druheho zastojnika wona drapny. Nětko přećiwo njej ranjenja ćěła dla přepytuja.
To a tamne (17.06.24)
Awto rentnarjow rubił je muž wčera we Werdauwje w Šwikawskim wokrjesu. Wobaj chcyštaj wóz njedaloko tankownje samaj wurjedźić, jako so njeznaty za wodźidło awta sydny a wotjědźe. 70lětny podarmo spytaše, paducha zadźeržeć. Při tym so starc snadnje zrani. Policija paducha krótko na to njedaloko starownje lepi, hdźež awto steješe. 48lětny bě wopity. Wón dyrbi so rubježneho padustwa a dalšich přeńdźenjow dla zamołwić.
Grilowaneho krokodila zesłodźeć dali su sej wobydlerjo gmejny Bulla na sewjeru Awstralskeje, hdźež bydla prawobydlerjo Aborigine. Krokodil bě so stajnje zaso dźěćom a psam bližił a wulki njeměr zbudźił. Skónčnje ze zamołwitymi wobzamknychu, 3,63 metrow dołhi krokodil zatřělić. Po wašnju prawobydlerjow sydaše potom krokodilowa poliwka a grilowane mjaso w bananowych łopjenach.
To a tamne (14.06.24)
Njerozsudnu koparsku hru Němskeje přećiwo Šotiskej dźensa wječor w Mnichowje wěsći mórska lawica Hilla w Lipšćanskim zwěrjencu. Lawica hraješe sej z bulomaj w němskich a šotiskich barbach we wodowym basenku a suny wobaj do wrotow, najprjedy šotiski, po tym tež němski. To rěka, zo Šotiska prěnje wrota třěli a Němska pozdźišo wuruna.
Z kolesom hač k najsewjernišemu dypkej Europy w Norwegskej dojěłoj stej sotře ze Smolinow Traina a Phelia Müller wčera rano. Na wšěch 2 650 kilometrow stej žonje zmištrowałoj, na kolesu a zdźěla pěši. Startowałoj běštej w Schleswigsko-Holsteinskej na specialnym kolesu za zbrašenych. Na nim móžeštej sotře w starobje 22 a 24 lět zhromadnje sedźeć. Wšědnje jědźeštej něhdźe 80 kilometrow, wšelake wotrězki zmištrowaštej pěši. Za čaru trjebaštej cyłkownje 35 dnjow.
To a tamne (13.06.24)
Płomjenja w sawnje su 20lětneho w Henningsdorfje we wokrjesu Hornja Habola zranili. Muž bě předwčerawšim, wutoru, w sawnje koncentrat wšelakich eteriskich wolijow na horce kamjenje kidał, bjez toho, zo by je do toho z wodu měšał. Na to bě so naliwk zapalił. Zranjeneho muža dowjezechu do chorownje.
Sta kilogramow drogow je policija pola wulkowikowarja sadu a zeleniny w Groß Kreutzu w Podstupimskim wokrjesu sćazała. Po prěnim trochowanju jedna so wo 450 kilogramow. Drogi ležachu w małych pakćikach mjez bananami. Sobudźěłaćerjej běchu podhladne pakety napadnyli. Namakanka njeje prěnja w zawodźe. Loni w septembru běchu 500 kilogramow kokaina na samsne wašnje namakali. Drogowe cwólby we łaćonskej Americe wužiwaja transport zeleniny, zo bychu drogi do Europy dowjezli.
To a tamne (12.06.24)
Mórske lawy w Lipšćanskim zwěrjencu změja přichodne dny wjele dźěła: Dokelž sej rady z bulemi hrajkaja, zasadźuja tam zwěrjata jako orakl za hry němskeje narodneje koparskeje wubranki při europskim koparskim mišterstwje. Prěni orakl planuja jutře, dźeń do zahajenskeje hry Němskeje přećiwo Šotiskej w Mnichowje. Tež w Kamjenicy prašeja so wobydlerjow zwěrjenca za wuslědkami.
Myjernju awtow zešrotował je muž ze swojim awtom w hessenskej stolicy Wiesbadenje. Do toho bě sej šofer nohu při pedalu płuna zatłusnył. Na to prasny awto do wjacorych nastrojow, wobškodźi elektroniku a přełama skónčnje wrota na kóncu myjernje. Muž wosta njezranjeny. Awto wosta hakle při zawěrje stejo. Muž rjekny, zo njemóžeše zatłusnjeneje nohi dla borzdźić. Awto je dospołnje skóncowane, škoda w myjerni je hoberska.
To a tamne (11.06.24)
Z kolesowej eskortu policije je młody muž w Augsburgu tola hišće dypkownje k wěrowanju na stawnistwo dojěł. Muž bě do toho w měsće parkował. Jako chcyše dale jěć, běchu dróhi demonstracije Christopher Street Day dla zaraćene a ćah ludźi hižo zahajeny. W swojej nuzy wobroći so muž na policiju. Ta pósła dweju zastojnikow na kolesu, kotrajž muža ze zawrjeneho pasma přewodźeštaj, tak zo bě nawoženja dypkownje k wěrowanju.
Chětro wopity šofer wosoboweho awta je w Berlinje-Weddingu hnydom tři parkowace awta wobškodźił, po tym zo bě kontrolu nad swojim jězdźidłom zhubił. Awto so skónčnje přećisny a wosta na třěše ležo. Zranjeneho 45lětneho dowjezechu do chorownje. Při protokolowanju njezboža zastojnikam wóń alkohola napadny. Na to su zawinowarjej krej brali. Wěcna škoda zražkow njeje hišće znata.
To a tamne (10.06.24)
Najwjetšu Božu słužbu motorskich su wčera w Hamburgu swjećili. Něhdźe 3 000 ludźi ze swojimi mašinami su wosrjedź města zličili. Minjene lěta bě wjace hac 20 000 wobdźělnikow přišło. Lětsa pak dyrbjachu twarskich dźěłow na awtodróze 7 dla tradicionalny korso motorskich po měsće wotprajić. Tuž bě mjenje ludźi přišło. Božu słužbu motorskich swjeća w Hamburgu wot 1980tych lět.
Ćeknjena kruwa je w badensko-württembergskim Balingenje za kolesowarjom hač na toho ležownosć běžała. Jako muž do pincy dźěše, kruwa jemu tež po schodach slědowaše. Přiwołana policija zwěsći, zo steji zwěrjo přeco hišće w pincy. Do toho bě wona po šulskim dworje błudźiła. Wobsedźer móžeše howjado přeswědčić, pincu wopušćić a na připowěšak zalězć. Načinjenu škodu w pincy trochuja na wjacore sta eurow.
To a tamne (07.06.24)
Z Trabantom 601 po Americe pućować chce Berlinjan Jan-Erik Nord. Awto su mjeztym z łódźu do USA dowjezli. Wopytać chce 42lětny na swojej 6 000 kilometrow dołhej jězbje města kaž Detroit, Chicago a Las Vegas kaž tež narodny park Yellowstone. Při sebi ma barika štyrilětneje holcy ze Šwikawy, kotraž je na rědku chorosć schorjeła. Za nju chce pjenjezy zběrać, zo móhła drohe lěkowanje zapłaćić.
Najlěpši młodźi matematikarjo Němskeje zetkaja so kónc tydźenja w Flensburgu na cyłoněmsku 63. olympiadu matematiki. Něhdźe 200 šulerjow ze wšeje Němskeje dyrbi swoje kmanosće w štyri hodźiny trajacych klawsurach dopokazać. Młodostni běchu so we wurisanjach wjace hač 200 000 šulerjow lětnikow 3 do 13 kwalifikowali. Najlěpši z nich smědźa so za Mjezynarodnu olympiadu matematiki přizjewić.
To a tamne (06.06.24)
Njewšědna serija wobchadnych njezbožow zaběra policiju w Čěskej. Tam je šofer nakładneho awta na awtodróze D 1 pola Brna do cyłkownje dźewjeć awtow zrazył. Po tym wostaji zawinowar njezbožow swoje awto stejo a ćekny pěši. W susodnej wsy Rebešovice hrabny sej muž cuze awto a zawinowa z nim dalše wobchadne njezbožo. Test policije na drogi bě pozitiwny. Podhladneho dowjezechu do chorownje. Awtodróha bě rumowanja dla dlěši čas zawrjena.
Z awtom maćerje je šěsćlětny hólc w jednej z Augsburgskich pěstowarnjow w Bayerskej do murje prasnył. 38lětna mać bě hólca w pěstowarni wotewzała a w awće zwěsćiła, zo nachribjetnik dźěsća pobrachuje. Jako so skrótka do pěstowarnje wróći, sydny so hólc za wodźidło a wotjědźe. Nichtó so njezrani. Škoda na awće a twarjenju wučinja 10 000 eurow.
