90 swětowych rekordow su Němcy w nachilacym so lěće certifikować dali, kaž rjekny to Olaf Kuchenbecker, najwyši sudnik při Instituće rekordow w Němskej, powěsćerni dpa. Mjez druhim su w bobby-carje dróhu ze spěšnosću 106 km/h dele smalili. Dale bu wěža w porynsko-pfalcskim Gau-Weinheimje jako najkřiwiša swěta do rekordneje knihi zapisana. Wona je wo 5,4277 stopnjow nachilena.
Rumpodich, Bože dźěćo a Mikławš su lětsa w sydom hodownych póstowych filialach Němskeho pósta nimale 633 900 hodownych listow dóstali. Loni bě jich 648 850. Rěčnica pósta ma za přičinu nišeje ličby posyłkow, zo su 2021 za čas koronoweho lockdowna powšitkownje hišće wjace listow pisali hač nětko. Na prěnim městnje přećow steješe strowota.
Prěni hodowny dźeń je defektny błyskač w Berlinje błudny hrał. Připrawa nětko zaso regularnje dźěła, zawčerawšim policija zdźěli. Přičina za permanentnje čerwjenje błyskace swětło na Frankfurtskej aleji bě krótkospjeće. Prawdźepodobnje bě woda do błyskača běžała a zmylk zawinowała. Stacionarna připrawa w Berlinje-Lichtenbergu bě zašłu njedźelu wječor wokoło 22.30 hodź. napadnyła, dokelž so permanentnje a njewotwisnje wot spěšnosće jězdźidłow błyskaše. Dokelž reparatura hnydom móžna njebě, dyrbjachu ju zastojnicy nachwilnje pokryć.
Wćipnosći 70lětnjeje žony ma so młody muž w Lübecku dźakować. Tak móžeše wón patoržicu tola wo ruku swojeje přećelki prosyć. Wuměnkarka bě mjenujcy tyzku z pjeršćenjomaj namakała, wočiniła a to policiji přizjewiła. Kaž so wukopa, je tyzka do toho z dźěćaceho wozyčka padnyła. Muž bě so tohorunja pola policije přizjewił. Zastojnicy sposrědkowachu jemu kontakt k žonje. Hač budźe 70lětna na kwas přeprošena, njeje znate.
Po tym, zo buštej dwě ćěle na Medicinskej wysokej šuli Hannover zaměnjenej, su mylnje muslima spopjelili. „MHH zaměnjenje wobžaruje, naša sobuželnosć płaći přiwuznym“, zdźěli rěčnik medicinskeho wukubłanišća minjeny pjatk. Palne chowanje je w islamskim pochowanskim ritusu dospołny tabu. Policija je informowana. Ćěło turkowskeho staćana běchu pjatk tydźenja w krematoriju spalili.
Kruwa je minjeny štwórtk w Bukecach z pastwy ćeknyła. Pasanća, kotřiž zwěrjo na zwjazkowej dróze B6 wuhladachu, wołachu policiju. Jako zastojnicy přijědźechu, kruwa ćekny a zadoby so do bliskeho Nowokoporčanskeho hata. Prjedy hač móžeše wohnjowa wobora zwěrjo wuchować, wuswobodźi so a ćěrješe do susodneho lěsa. Z pomocu hajnikow bur za kruwu pytaše. Hač mějachu wuspěch, znate njeje.
Wysoka inflacija so na płaćiznu klasiskeje hodowneje jědźe wuskutkuje. Po wobličenjach Instituta němskeho hospodarstwa (IW) w swójbach k swjedźenjej kisałe běrny z kołbaskami sydaja. Přerěznje budu za to lětsa wo 23,4 procenty wjace zapłaćić dyrbjeć. W někotrych regionach je so klasikar samo wo nimale 30 procentow podróšił, wčera hospodarscy fachowcy rozprawjachu. Štóž chce mjenje pjenjez za běrnjacu solotej wudać, dyrbjał so majonezy wzdać a wariantu z kisałom a wolijom přihotować, institut poruča.
Štó je zawčerawšim pjeć milionow eurow w loće dobył? Tele prašenje zaběra tuchwilu statnu loteriju. Cedlku z ličbami je wosoba anonymnje w Hornjej Bayerskej wotedała. Dobyćerjej přisteji 5 018 021 eurow. Nanajpozdźišo hač do kónca lěta 2025 ma dobyćer chwile swoju kwitowanku zapodać.
Jězbna hodźina w Nižozemskej skónči so z přesćěhanjom a wulkej wěcnej škodu. Wina na tym pak njebě jězbna šulerka. 29lětny jězbny wučer chcyše so kontroli policije wuwinyć a je z awtom, w kotrymž šulerka sedźeše, ćeknył. Při tym zrazy do wjacorych awtow, při čimž so šulerka snadnje zrani. Policija na to tuka, zo bě muž alkohol abo drogi brał. Nětko su jemu zastojnicy jězbnu dowolnosć sćazali, tak zo jako jězbny wučer wjace dźěłać njemóže.
Póštowy zarjad Mikławša w posaarskim St. Nikolaus je hižo na 27 000 listow dźěći ze wšeho swěta wotmołwił. Ličba je trochu wyša hač bě to loni w samsnym času. Mjez listami bě wjele wot ukrainskich dźěći. Wjetšina dźěći sej lětsa přeje měr a běłe hody. Dalše přeća su strowota za swójbu, přećelow a wšitkich ludźi. Hišće hač do 24. decembra je wosebity póštowy zarjad wotewrjeny.