To a tamne (16.06.22)

štwórtk, 16. junija 2022 spisane wot:

We wopačnym płuwanskim basenku je so młodostny w hornjej Bayerskej wochłódźił. Susod je 16lětneho při kupanju wobkedźbował a policiji informował. ­Jako zastojnicy přijědźechu, teenager twochny, swoje koleso wostaji stejo. Po­licajski helikopter, kiž bě druheho za­sadźenja dla připadnje w bliskosći, 16lětneho krótko po tym wuhlada. Policisća jeho zajachu. Kupanje wunjese jemu skóržbu ranjenja domjaceho měra dla.

Na wšě 70 porow je w afghaniskej stolicy Kabulu runočasnje kwas swjećiło. Do­broćelska organizacija bě swjedźeń organizowała. Kraj ćerpi pod ćežkej hospodarskej krizu. Mnozy njemóža sej tra­dicionalnje wulke a drohe swjatočnosće wjace dowolić. Splažne poćahi zwonka mandźelstwa pak njejsu w muslimskim kraju dowolene. Talibanojo su po přewzaću mocy chłostanja za to přiwótřili.

To a tamne (15.06.22)

srjeda, 15. junija 2022 spisane wot:

Ze solarnej energiju wobhospodarjeny mobilny dom šwicarskich slědźerjow je po puću po wšěm swěće a je wčera w badensko-württembergskim Reutlingenje pozastał. Wonkownje mjetelčce napo­dobnjeny futuristiski dom je dospołnje ze solarnymi panelemi wuhotowany. W 30 kwadratnych metrow wulkim domje je kuchnja, toaleta a duša. Tura domu po swěće ma so 2025 w Parisu skónčić.

Darmotne piwo hač do kónca žiwjenja – za zawjazanje noweho lodohokejoweho trenarja Barryja Trotza za mustwo Winnipeg Jets w USA je lokalna piwarnja zwólniwa so sylnje angažować. Po njewočakowanym wotchadźe dotalneho trenarja loni w decembru chce piwarnja ze swojim poskitkom noweho trenarja Trotza přeswědčić, kak w lokalnym sportowym wusyłanju připowědźi.

To a tamne (14.06.22)

wutora, 14. junija 2022 spisane wot:

Paducha diesela zajała je policija w hessenskim Diethölztalu. 36lětny bě 160 litrow diesela tankował a prosće wotjěł, bjez toho zo by zapłaćił. Na ćěkancy ignorowaše čerwjenu amplu a zrazy do awta 78lětneho. Paduch na to pěši ćěkaše. Zastojnicy pak jeho dosahnychu. Po tym so wukopa, zo steješe 36lětny pod wliwom alkohola a drogow. Jězbnu dowolnosć tež njeměješe. Připrawjene znamješko k tutomu awtu njesłušeše. Policija trochuje wěcnu škodu na 20 000 eurow. Muž dyrbi nětko z wjacorymi chłostanskimi jednanjemi ličić, policija zdźěli.

Stadło wowcow je konja zapřaha w Glauchauwje w Zwickauskim wokrjesu wustróžiło. Kóń smaleše na to dale a běžeše po skłoninje. Zapřah so skónčnje zwróći. 65lětny pohonč so při tym zrani. 33lětna susodka na zapřahu móžeše w poslednim wokomiku wotskočić.

To a tamne (13.06.22)

póndźela, 13. junija 2022 spisane wot:

Płuwanski marathon na 1 200 kilometrow w Rynje je zahajeny. Joseph Heß z Kamjenicy je sobotu rano do jězora njedaloko šwicarskeho Tujetscha zalězł, kiž maja za žórło rěki. 34lětny chce čaru hač do Rotterdama za 25 dnjow zmištrować a wšědnje hač do dźesać hodźin płuwać. Wjacori kanuća jeho přewodźeja a akciju za dokumentarny film nahrawaja.

Italscy a grjekscy cłownicy su štyrjoch Britow w grjekskim přistawnym měsće Thessaloniki z cyłkownje 300 kilogramami kokaina w hódnoće dźesać milionow eurow lepili a zajeli. Wopojny jěd bě w 260 paketach schowany. Po prěnich dopóznaćach přisłušeja zajeći w starobje 38 do 52 lět kriminelnej organizaciji na Balkanje. Při přepytowanju luksusoweho domu namakachu policisća dalše drogi, pistolu, municiju, wjele pjenjez a wjacore mobilne telefony.

To a tamne (10.06.22)

pjatk, 10. junija 2022 spisane wot:

Francoscy cłownicy su dweju Němcow při zapućowanju do Španiskeje zadźerželi a při kontroli w transporteru štyri aligatory namakali. Přiwołany fachowc za škit zwěrjatow zwěsći, zo jedna so wo družinu aligatorow, za kotruž płaća krute postajenja při mjezach. Dokelž Němcaj žanežkuli dokumenty za zwěrjata njeměještaj, jeju zajachu. Krokodile dowjezechu do zwěrjenca. Zwotkal mužej zwěrjata měještaj a dokal chcyštaj njebu znate.

Borisa Johnsona jako croissant móža sej wobydlerjo Kijewa słodźeć dać. W kofejowni Zavartailo mějachu ideju, so britiskemu premierministrej za wojersku pomoc Wulkeje Britaniskeje k zakitowanju Ukrainy přećiwo Ruskej inwaziji dźakować. Z baiserom a kulku lodu garněrowany croissant „Boris Johnsonjuk“ ma swojoraznu frizuru britiskeho politikarja napodobnić a so derje předawa.

To a tamne (09.06.22)

štwórtk, 09. junija 2022 spisane wot:

„Pomhajće! Smy nadpadnjeni“ – z tutym tekstom na displayju je bus po badiskim Endingenje po puću był. Wjacori šoferojo policiju wo tym informowachu. Po tym zo běchu zastojnicy bus zadźerželi, zwěsćichu, zo je šofer busa powěsć mylnje aktiwizował. Po informacijach policije ma najwjace busow za nuzowy pad knefl, kotryž ćichi alarm zawinuje.

Powostanki hoberskeho dinosawriera su slědźerjo na britiskej kupje Isle of Wight namakali. Je to jedyn z najwjetšich hdy w Europje namakanych rubježnych dinosawrierow scyła. Wón bě dlěši hač dźesać metrow. Namakane fosilije – kosće pónoje a rjapa – pochadźeja wot dwunohateho dinosawriera z hłowu krokodila. Namakanka podpěruje hypotezu, zo pochadźa „Spinosawrus“ ze zapadneje Europy. Z pomocu wědomostnych metodow chcedźa nětko starobu zwěrjeća zwěsćić.

To a tamne (08.06.22)

srjeda, 08. junija 2022 spisane wot:

W šnórce wudy zašmjatana pašturlica (Mäusebussard) je w sewjerorynsko-westfalskim Neussu zasadźenje wohnjoweje wobory zawinowała. Ptak bě so we wudźenskej nići nad rěku Erft zamotał a njemóžeše so sam wuswobodźić. Šnóra wisaše w štomje. Wohnjowi wobornicy pašturlicu ze sakom popadnychu a ze šnóry wuswobodźichu.

Wjace hač sto šulerjow a wučerjow z Němskeje su w awstriskim Kleinwalserskim dole z hórskeje nuzy wuchować dyrbjeli. Młodostni w starobje dwanaće do 14 lět z Ludwigshafenskeje kónčiny běchu na hórskej šćežce po puću, kotraž jich techniskim móžnosćam a ćělnym kmanosćam scyła njewotpowědowaše. Jako mjez nimi panika wudyri, wučer hórsku słužbu zazwoni. Ta cyłkownje 107 wosobow z helikopteromaj wuchowa. Dwaj šulerjej so zraništaj.

To a tamne (07.06.22)

wutora, 07. junija 2022 spisane wot:

Psyk sankoweho zapřaha, kiž bě so při wubědźowanju Iditarod w Alasce nadobo zhubił, je po třoch měsacach zaso pola swojeho wobsedźerja. Tón dźakuje so wšěm, kiž su při pytanju pomhali. Tři lěta stary Husky bě so 13. měrca w małym sydlišću Ruby zminył, jednej z etapow 1 800 kilometrow dołheje čary. Tydźenje dołho podarmo za nim pytachu. Kónc meje wobydlerjo wotležaneje wsy psa wuhladachu a z picu přiwabichu.

Za jenož 25 dnjow chce Joseph Heß z Kamjenicy Ryn přepłuwać, wot žórła hač k wuliwej, zo by nowy rekord nastajił. „Prudy w rěce su jara strašne“, rjekny 34lětny. K tomu přińdźe sylny wobchad łódźow a zanjerodźenje wody. Sobotu chce Heß w Šwicarskej do Ryna zalězć a wšědnje wosom do dźesać hodźin płuwać. 6. julija chce wón płuwajo wuliw ryna w Rotterdamje docpěć.

To a tamne (03.06.22)

pjatk, 03. junija 2022 spisane wot:

Samsny dźeń dźěćo porodźiłoj stej sotře-dwójnikaj w Israelu. 31lětnej běštej wutoru do chorownje přišłoj, dokelž so porod bližeše a stej samsny dźeń syna porodźiłoj. Za wobě žonje bě to štwórte dźěćo, kóžda z njeju ma hižo dwě dźowce a syna. Wobě sotře ležitej nětko w sam­s­nej stwě w porodowej chorowni.

Ničeji kenguru zaběra ludźi we Wegbergu w Heinsbergskim wokrjesu njedaloko nižozemskeje mjezy. Policija prosy wobsedźerja, so spěšnje přizjewić. Roznošowar nowin bě zwěrjo minjenu njedźelu wuhladał, jako po dróze skakaše. Policija njemóže sej rozkłasć, zwotkel kenguru přińdźe, wšako nimaja tam daloko a šěroko zwěrjency abo parki dźiwiny. Póndźelu su wobydlerjo kenguru znowa wuhladali a fotografowali. Zwěrjo pak je so w bliskim lěsu zminyło. Tam pak po­darmo za nim pytachu.

To a tamne (02.06.22)

štwórtk, 02. junija 2022 spisane wot:

Wulki kenguru je so w Awstralskej wo­srjedź dróhi do muža dał a je šěsć mjeńšin z nim wojował. Při tym so muž snadnje zrani. Zwěrjo bě psy 59lětneho na toho ležownosći atakowało. Na to hrabny sej muž retl a chcyše kenguruwa wućěrić. Tón pak do muža kopaše a biješe a jemu do porsta kusny. Po njeskónčnych šěsć mjeńšinach so zwěrjo skónčnje wotsali. Muž jemu ani zły njeje: „Smy swoje sydlišća na jich kraju twarili“, wón rjekny. Nawuknył při wšěm je, zo móže kenguru chětro njemdry a agresiwny być.

Za padustwo su so paduši w Nottulnje pola Münstera zamołwili. Tući běchu so do předawanskeje budki za truskalcy zadobyli a marmeladu a sekt spakosćili. Dwaj dnjej pozdźišo tu rubizna zaso bě, wobsedźerka zdźěli. Připołoženy bě papjerka ze zamołwjenjom za „hłuposć“. Policija pyta nětko za swědkami.

Serbska debata

nowostki LND