To a tamne (12.06.23)
Dźiwje swinjo w basenku na priwatnej ležownosći w Neuenhagenje pola Berlina je zasadźenje policije a wohnjoweje wobory zawinowało. Wobydlerjo běchu zwěrjo sobotu rano w poolu wuhladali. Něhdźe 40 kilogramow ćežke zwěrjo bě prawdźepodobnje za wochłódźenjom pytało, njemóžeše pak wjace z basenka wulězć. Wobornicy wodu wotpušćichu a swinjo z pasami wućahnychu. Zwěrjo bě po wuchowanju chětru wučerpane a so bórze na to w bliskim lěsu zminy.
Hara motorowych piłow bě kónc tydźenja w Heinersdorfje we wokrjesu Wódra-Sprjewja prezentna. Tam wubědźowaše so 20 wobdźělnikow we wowčerni wo myto najspěšnišeho a najlěpšeho rězbarja z motorowej piłu „Speedcarving“. Při tym dyrbjachu w 45 mjeńšinach ze 1,10 metrow wysokeho a 30 centimetrow tołsteho zdónka wuměłsku twórbu rězbarić.
To a tamne (09.06.23)
Ćeknjeny kenguru w Rostockskim wokrjesu je z pomocu susodow zaso puć domoj namakał. Wulět „Berryja“ po wsy Rethwisch traješe runje dźeń. Po informacijach rozhłosa bě dospołnje běłe zwěrjo srjedu wječor twochnyło. Wobydlerjo běchu je drje wobkedźbowali, popadnyć pak kenguru njemóžachu. Wčera nadeńdźechu „Berryja“ w bliskosći statoka, wottam přewodźachu jeho domoj. Wobsedźerka boješe so wosebje nadróžneho wobchada dla, kiž njeje běły kenguru zwučeny.
Mjezu 30 stopnjow překročili su prěni króć w tutym lěće w Podstupimje. Tam naměrichu wčera 30,7 stopnjow, sobudźěłaćer Němskeje wjedrarnje wječor w Offenbachu zdźěli. Tež wokoło Berlina pokazowachu stacije wjedrarnje wjace hač 30 stopnjow. Z blakami mějachu tam šwihele a njewjedra. Dźensa liča z dalšimi zdźěla sylnymi njewjedrami.
To a tamne (08.06.23)
Starodawny són spjelniła je sej bywša wučerka francošćiny Evelyn Haupt při wopyće francoskeho prezidenta Emmanuela Macrona a zwjazkoweho kanclera Olafa Scholza (SPD) w Podstupimje. Wona bě jeno za to z Hannovera přijěła a prošeše wobeju politikarjow wo zhromadny foto, jako wobaj po Nowym torhošću dźěštaj. Macron a Scholz njedaštaj so dołho prosyć a so za selfie zestupištaj.
Na wšě 23 dźiwich swini je so wčera dopołdnja do parka w sewjerorynsko-westfalskim Hagenje zabłudźiło. Při tym jednaše so wo dwě rancy z młodźatami, město zdźěla. Park su zawrěli. Šulerjo bliskeje šule njesmědźachu twarjenje wopušćić. Hajnicy črjódu swini z parka do bliskeho lěsa přewodźachu. Hakle w nalěću běchu dźiwje swinje w Hagenje njeměr zbudźili, jako so do bydlenja zadobychu a je dospołnje zapusćichu.
To a tamne (07.06.23)
Trut policije w powětře nadběhowali su tonuški w zapadnofrancoskim Rennesu. Policisća chcychu demonstraciju přećiwo rentowej reformje wobkedźbować, jako so ptački za wšěch widźomnje do lětaceho pomocnika zastojnikow dachu. Demonstranća, kotřiž prawidłownje přećiwo kontrolowanju z powětra protestuja, nowych zwjazkarjow wótře witachu a podawk filmowachu a komentowachu.
Zabyty budźak w lětadle je na Hamburgskim lětanišću zasadźenje fachowcow za znješkódnjenje bombow zawinował. Personal lětanišća bě podhladne tikotanje při rjedźenju mašiny z Züricha słyšał a policiju informował. Přiwołani fachowcy njestrašny budźak spěšnje namakachu a zrumowachu. Nětko pytaja za pasažěrom, kiž je nastroj w lětadle zabył, zo móhli jemu zličbowanku za dosć drohe poł hodźiny trajace zasadźenje pósłać.
To a tamne (06.06.23)
Horce rulady z běrnjacymi kulkami su w Hornjej Frankskej wobchadne njezbožo zawinowali – po tym zo je so hornc z horcej jědźu šoferej wosoboweho awta na klin wulał. Kaž policija zdźěla, bě 82lětny šofer kontrolu nad swojim awtom zhubił, jako so hornc na pódlanskim sedle w křiwicy powali. Wustróžany muž zrazy do parkowaceho awta, kotrež so na dalše awto suny. Wěcna škoda wučinja po prěnim trochowanju 25 000 eurow.
Mórsku dróhu mjez Němskej a Danskej – Fehmarnbelt – chce Kamjeničanski płuwar dołhich čarow Joseph Heß zmištrować. Po tym zo bě loni Ryn wot žórła hač k zaliwej přepłuwał, je sej 35lětny nowe wužadanje předewzał. Něhdźe 25 kilometrow dołhu čaru chce wón w něhdźe wosom hodźinach přeprěčić. Rekord nastajiła je Lotta Steinmann w štyrjoch hodźinach a dwanaće mjeńšinach.
To a tamne (05.06.23)
Wulkobratrowc bywšeho bamža Pawoła VI., Guilio Montini, je so ze swojim žiwjenskim partnerom zmandźelił. Kwas z runje 250 hosćimi je w italskich medijach tójšto kedźbnosće zbudźił, wšako bě bamž Pawoł VI., kiž katolsku cyrkej wot 1963 hač do smjerće 1978 nawjedowaše, tež na polu splažneje moralki swoje slědy zawostajił. Tak bě wón ze swojej encykliku w lěće 1968 kumštne zadźěwanje samodruhosći zakazał. Priwatnje bě bamž pječa wosebje dźěćom napřećo zrozumliwy a lubosćiwy wuj.
Mać na balkonje z bydlenja wuzamknył je štyrilětny hólc w Mnichowje. Žona steješe sobotu wonka, jako syn durje wot nutřka zamkny. Najebać naležnje prošenje maćerje hólc durje balkona wjace njewotewrě. Susodźa wołanje maćerje słyšo wołachu wohnjowu woboru, kotraž přez nachilene wokno do bydlenja zalěze.
To a tamne (02.06.23)
Wjace datow za wobkedźbowanje a identifikowanje njeznatych lětacych objektow je sej skupina fachowcow swětnišćoweho zarjada NASA w USA žadała. Přepytowanje tajkich njeznatych objektow je přewšo wažne, fachowcy na swojim prěnim zjawnym zetkanju we Washingtonje zdźělichu. Tójšto padow njejsu hač do dźensnišeho wujasnili, dokelž su daty snadne a špatneje kwality.
Awto wikowarja drogow pokradnyć chcyłoj staj paduchaj w sewjerorynsko-westfalskim Remscheidće. Wobydlerjo njeskutk wobkedźbujo informowachu policiju, kotraž paduchow zaja. Jako sej policisća wot paduchow wobškodźene awto bliže wobhladachu, jim znata wóń do nosa stupaše. W awće namakachu zastojnicy konop, amfetaminy a pistolu z municiju. 20lětneho wobsedźerja awta jako „wobrónjeneho dealerja“ zajachu.
To a tamne (01.06.23)
Z drogami w zaku na sudnistwo přišoł je muž w bayerskim Forchheimje, zo by so přećiwo chłostance sudnistwa drogow dla wobarał. Při wěstotnej kontroli namakachu zastojnicy pola 23lětneho marihuanu, policija zdźěla. Muž chcyše předwčerawšim spřećiwjenje přećiwo wukazanej chłostance sudnistwa wotedać. Nětko dyrbi z nowej chłostanku ličić – kotraž budźe drje dróša hač prěnja.
Dźěl originalneho meteorita wobdźiwać móža fanojo swětnišća w Francoskej. Přirodowědny muzej w Parisu pokazuje wot dźensnišeho wjacore dźěle meteorita, kiž bě njedawno na sewjeru kraja na zemju zrazył. Najwjetši kamjeń waži 175 gramow a je wot čorneje woršty wobdaty. Meteority leža w nowej witrinje zběrki „Pokłady zemje“. Swětnišćowy objekt je tak stary kaž słónčny system, 4,6 miliardow lět, wědomostnicy twjerdźa.
To a tamne (31.05.23)
Pasažěrow na lětanišćach wažić chcedźa wotnětka w Nowoseelandskej. Tamniše lětarske předewzaće Air New Zeeland chce po tutym puću zhonić, što lětadła do wotlěta woprawdźe waža a kak je waha w mašinje rozdźělena, předewzaće zdźěla. Wuraznje na to pokazuja, zo je waženje dobrowólne a dospołnje anonymne. „Nichtó njewidźi, što wažiće“, Air New Zeeland přilubja.
Priwatny železniski přechod twarił je sej muž w Mecklenburgsko-Předpomorskej a ma nětko dla teho tójšto mjerzanja. Muž bě po swójskich informacijach betonowu platu při kolijach zatwarił, zo by wobstejacy přechod ponowił. Železnica zdźěla, zo njeje twarske dźěła dowoliła a zo njeje na tutym městnje žadyn přechod eksistował. Twarskich dźěłow dla dyrbjachu wobchad nakładnych ćahow na tutej čarje samo přetorhnyć.
To a tamne (30.05.23)
Z jastwa ćeknjeny muž je sej w Čěskej chětro njekmany schow wupytał. Kaž rěčnica policije zdźěli, słyšachu ludźo w podzemskej železnicy w Praze, zo něchtó w tunlu wo pomoc woła. Policisća a wohnjowi wobornicy skónčnje muža namakachu, kiž tčeše w kanalu přewětrjenja. Při kontroli personalijow so wukopa, zo bě so 22lětny dźeń do toho z wotewrjeneho dźěla jastwa zminył. Jeho dowjezechu wróćo – do zawrjeneho dźěla jastwa.
Sobu najwjetšu zběrku 60 000 plastowych titow z časa NDR je mjeztym 83lětny rentnar Dieter Luchs w Zurowje pola Wismara w běhu 50 lět znosył. Minjeny kónc tydźenja bě dźěl eksponatow w bywšim bunkrje wustajeny, tematisce rjadowany po temach „produkcija“, „turizm“ a „stat“. Za historiske tity žada sej rentnar mjeztym hač do 60 eurow a namaka stajnje zaso kupcow, kaž rjekny.
