To a tamne (19.01.22)
Potajnstwo spodźiwneho nócneho šumjenja a klepanja z hłubin zemje w dźělu grjekskeho přistawneho města Thessaloniki je wotkryte: Kaž tamniša wodarnja zdźěli, mějachu zwuki něšto z ćišćom we wodowodach činić. Ćišć su mjeztym změnili a problem wotstronili. Tydźenje dołho běchu zwuki ludźi znjeměrnjeli a běchu přičina najhóršich spekulacijow – wo bližacym so zemjerženju hač k zwonkazemskim, kotřiž so na čłowjestwo měrja.
Nadpad njeznatych ze smjerdźatej butrowej kisalinu na stanowanišću w sewjerorynsko-westfalskim Drostenje je pad za policiju. Zastojnicy přepytuja dwě wulkej wodopistoli, kiž běchu ze susodneho kanala wućahnyli a kotrejž tak surowje smjerdźitej, zo móhłoj „bróni njeskutka być“. Stanowanišćo wužiwaja trajni camperojo. Kanal rjedźić płaći po prěnim trochowanju 50 000 eurow.
To a tamne (18.01.22)
Palaca so baterija elektrokolesa je w delnjosakskim Isernhagenje škodu 1,5 milionow eurow zawostajiła. Aku bě so za čas nabiwanja zapalił. Wobydlerjo wosobneho domu buchu přez alarmowu připrawu warnowani a móžachu so wuchować. Płomjenja pak rozpřestrěchu so na biblioteku, w kotrymž aku ležeše. Fachowcy wohnjoweje wobory wšak spěšnje zwěsćichu, zo bě defekt kolesoweje baterije woheń zawinił.
Prěnje narodniny swojeho synka je wopity muž w Ludwigshafenje z wutřělemi woswjećił a so tak wo zasadźenje policije postarał. 30lětny bě z trašawku wospjet do powětra třělał. Přiwołani policisća zhonichu, zo bě muž wjacore salwy składnostnje synkowych narodnin třělał. Wón pak njeměješe žanu dowolnosć, tajku bróń wobsedźeć. Zastojnicy pistolu a municiju sćazachu a delikt přizjewichu.
To a tamne (17.01.22)
Jednotliwu stronu comicoweho zešiwka su w USA za wjace hač tři miliony dolarow přesadźowali. Originalna rysowanka strony 25 wuměłca Mikea Zecka z lěta 1984 wušłeho comica „Secret Wars No. 8“ je 3,4 miliony dolarow (něhdźe tři miliony eurow) wunjesła, kaž awkciski dom Heritage Auctions w texaskim Dallasu zdźěli. Je to najdróša hdy přesadźowana strona comicoweho zešiwka.
Najebać koronapandemiju su so statysacy indiskich wěriwych w rěce Ganges kupali, zo bychu sej hrěchi wotmyli. Mnozy njewužiwachu w zwjazkowym staće Uttar Pradesh žane škitne nahubniki a stejachu wusko hromadźe. Do toho dyrbjachu wšitcy wobdźělnicy negatiwny PCR-test předpołožić. Lěkarjo běchu podarmo spytali swjatočnosć sudnisce zakazać dać. Ličby natyknjenjow z koronu w Indiskej zaso přiběraja.
To a tamne (14.01.22)
Wopity šofer je swoje awto w porynsko-pfalcskim Bernkastelu-Kuesu před policajskej staciju parkował a je sej za wodźidłom wusnył. Zastojnikam wóz napadny, dokelž motor wšón čas běžeše. Zastojnicy zwěsćichu pola 26lětneho šofera 1,72 promilow alkohola a su jeho wopiłstwa w nadróžnym wobchadźe dla hnydom přizjewili.
Z horcotu nad 50 stopnjemi bědźa so tuchwilu wobydlerjo zapadnych kónčin Awstralskeje. W pobrjóžnym sydlišću Onslow bě to wčera z 50,7 stopnjemi lětdźesatki stary rekord a najwyša hdy w zwjazkowym staće Western Australia měrjena temperatura. Samsnu hódnotu běchu 1960 w pusćinowym sydlišću Oodnadatta na juhu kraja naměrili. Tež w druhich městach su podobne temperatury zwěsćili. Z městnami su klimatiske naprawy přežadane a hižo njedźěłaja.
To a tamne (13.01.22)
Dźěćo w busu porodźiła je žona w brazilskej metropoli Rio de Janeiro. Při porodźe jej sobujěducy pomhachu. Do toho běchu woni šofera pohonjeli, spěšnišo jěć. We wideju brazilskeje telewizije je widźeć, kak sanitetar z nowonarodźenym na ruce bus wopušći, młoda mać za nim. Wona so pola pasažěrow hišće zamołwi, zo bě bus jeje dla zapozdźeny. Ludźom pak bě to po wšěm zdaću smorže. Woni jej gratulowachu a so z njej wjeselachu.
Do hajzla ćisnjene spěšnotesty korony dla zatykuja w francoskim Berre-les-Alpes pola Nizzy tamnišu rjedźernju wopłóčkow. Zaso raz běchu železne hrabje, kotrež krute wobstatki z wopłóčkow ćahaja, zatykane, wottam rěkaše. „Myslachmy sej, zo je logiske, zo słušeja trjebane spěšnotesty do wotpadkoweho sudobja.“ Komuna ludźi prosy ničo do nuznika njemjetać, štož do njeho njesłuša.
To a tamne (12.01.22)
Radšo sej z mobilnym telefonom hrajkałoj hač za złóstnikami honiłoj staj policistaj w Kaliforniskej – a staj nětko pušćenaj. Sudnistwo je jeju skóržbu přećiwo tomu zaćisnyło. Wobrazy awtomatiskeje kamery policajskeho awta dopokazuja, zo staj w lěće 2017 hru „Pokemon Go“ dale hrałoj, byrnjež jeju zasadźenska centrala rubježnistwa dla do kupnicy pósłała.
Wjace hač 300 měchow z kradnjenej drastu a hrajkami je policija w delnjobayerskim Vilsbiburgu w bydlenju žony namakała. Wěcy běchu po bydlenju, w pincy a na balkonje rozdźělene. Swědcy běchu 36lětnu we wobchodźe při kradnjenju wobkedźbowali a policiju informowali. Policisća su na to bydlenje jako padušnica znateje žony přepytali a rubiznu namakali. Čehodla žona wěcy kradnješe, ale njewužiwaše, nichtó njewě.
To a tamne (11.01.22)
Homoseksualne amplowe poriki maja wot tohole tydźenja w Braunschweigu za wjace tolerancy wadźić. Cyłkownje wosom amplowych mužikow su ze štyrjomi žónskimi a štyrjomi muskimi porikami z małej wutrobičku narunali. Znački maja „signal tolerancy, wotewrjenosće a akceptancy jenakosplažneje lubosće być“, rjekny wyši měšćanosta Thorsten Kornblum (SPD) k zahajenju akcije.
Přemało spara a napinacy šulski dźeń stej wosomlětnemu pachołej w sewjernej Němskej zjawne pytanje policije wunjesłoj. Hólčec bě po šuli njedaloko Kiela do busa zalězł, doma pak njedojěł. Tak informowaštaj staršej policiju, kotraž zjawnje za nim pytaše. Busowy šofer je hólca skónčnje namakał – spjaceho w zadnim dźělu busa. Policija wosomlětneho na to domoj dowjeze.
To a tamne (10.01.22)
Při tankowni w swojim awće wusnył je sej muž w badensko-württembergskim Heidenheimje. Sobudźěłaćerjej bě wóz 21lětneho napadnył, dokelž tam dlěši čas steješe. Wón wuhlada muža spjaceho na zadnjej ławce awta. Na widejowym nahrawanju bě widźeć, kak muž po tankowanju zady do awta zalěze. Zastojnicy zwěsćichu při jězdźidle čerstwe slědy njezboža. Hač steješe muž pod wliwom alkohola abo drogow, njeje znate.
Ze swojim awtom runjewon wotlećał je 58lětny šofer we Warnemündźe nad Baltiskim morjom. Prawdźepodobnje měješe wón strowotniske problemy. Muž bě wčera z wulkej spěšnosću w křiwicy z dróhi zjěł. Při tym prasny do stejaka kolesow. Awto wotzběhny, přeleća murju mórskeje promenady a je skónčnje w pěskowym nasypje tčacy wostało. Muža dowjezechu do chorownje.
To a tamne (07.01.22)
Pře wšu měru sprócny bě paduch w Hannoveru. 25lětny je sej za čas njeskutka w cuzym łožu wusnył. Nimo toho bě chětro natutkany a steješe pod wliwom drogow. Wobydlerjo njeběchu w tym času doma. Susod pak bě zadobywarja widźał a policiju alarmował. Přiwołani sanitetarjo muža wubudźichu, njemóžachu pak žane strowotniske škody zwěsćić.
Wobchodowy detektiw móžeše tomu zadźěwać, zo je Berlinjan wjetše mnóstwo šokolody we wobchodźe w Neustreelitzu spakosćił. Wón wobkedźbowaše, kak muž 70 taflow šokolody do nachribjetnika styka a so zminy, bjez toho zo by płaćił. Detektiw jeho zadźerža. Rozhladujo so wuhladachu přiwołani policisća dweju čakaceju muži w awće, w kotrymž ležachu sta taflow šokolody w hódnoće 1 100 eurow. Zwotkel je mějachu, njemóžachu paduši policiji wězo rjec.
To a tamne (06.01.22)
Zhubjeneho hólca namakał je kedźbliwy pěšk w durinskej Gerje. Mužej bě sydomlětny napadnył, dokelž po dróze tam sem běhaše a wočiwidnje někoho pytaše. Přiwołani policisća zwěsćichu, zo bě žona swojeho syna hižo jako zhubjeneho přizjewiła. Pachoł bě maćeri w nakupowanskim centrumje twochnył.
Na wšě 28 hodźin za wodźidłom sedźał je šofer Lkw-ja, kaž so při kontroli w Braniborskej wukopa. Zastojnicy zwjazkoweho zarjada za transport tworow běchu spočatnje přepruwowali, hač ma za transport wulkich rołow scyła wurjadnu dowolnosć. Jako zwěsćichu, zo bě šofer krótko do kontrole elektronisku dokumentacisku kartu wuměnił, wołachu policiju. Zastojnicy namakachu wjacore dokumentaciske karty a dwě wšelakej jězbnej dowolnosći. 38lětnemu šoferej z Pólskeje su dalejězbu nablaku zakazali.
