To a tamne (26.07.22)
Pola kriminelnych sćazany Ferrari chce čěska policija zasadźić, zo by wobchadnych hrěšnikow přesćěhowała. Hač do 325 km/h spěšny wóz chcedźa přećiwo „najagresiwnišim šoferam“ na awtodróhach wužiwać, rěčnik policije zdźěli. Za to su awto wotpowědnje přetwarili. Ferrari tutoho typa płaći nimale 200 000 eurow. Wodźić smědźa jón jenož wosebje wukubłani zastojnicy.
Hnydom dwójce je so bjezdomny do domow zadobył, zo by tam jědł a spał. 33lětny bě so minjeny pjatk do jednoswójbneho domu w braniborskim Hennigsdorfje zadobył, so najědł a so do łoža wobsedźerja lehnył. Policija jeho zaja a sobotu zaso pušći. Samsny dźeń zadoby so muž do domu w Oranienburgu, hdźež so wukupa a ćekny. Policija pak móžeše jeho znowa zajeć. Tónkróć dyrbi wón dlěje w jastwje wostać, policija zdźěli.
To a tamne (25.07.22)
Runje zmandźelenaj a hižo w błóće: Pod nawodom kwasneho porika su minjenu sobotu na tradicionalnej „watowej olympiadźe“ w Brunsbüttelu nowy „polonezowy“ swětowy rekord nastajili. 206 wobdźělnikow běžeše před wjacorymi tysac přihladowarjemi w błóće watoweho morja, symbolizujo wulku wutrobu. 150 ludźi by trěbnych było.
Gumijowa ruka je na brjoze Łobja pola Torgauwa wjetše zasadźenje policije zawiniła. Pěšcy běchu pozdatny dźěl čłowječeho ćěła w trawje namakali, ruku a dźěl łochća. Na to městno zaraćichu. Nimo kriminalneje policije přichwatachu zastojnicy wodoškitneje policije, techniskeho pomocneho skutka a psyk k namakanju ćěłow. Přepytowanje wunjese, zo jedna so wo wuběrnu atrapu.
To a tamne (22.07.22)
21 lět dołho zhubjene noticne knižki britiskeho přirodospytnika Charlesa Darwina su namakane. Uniwersitna knihownja w Cambridgu bě knižki w lěće 2000 wupožčiła. Dwě lěće pozdźišo zdźělichu, zo su pokradnjene. Nětko su sobudźěłaćerjo wjacore miliony eurow hódne dokumenty w zjawnje přistupnym dźělu knihownje w darnej tiće wotpołožene namakali.
Třělbowu granatu namakało je dźěćo při hrajkanju při jězoru w braniborskim Petershagenje a je ju sobu domoj wzało. Staršimaj bě na zbožo hnydom jasne, zo jedna so wo strašnu namakanku a zawołachu policiju. Fachowcy granatu wotewzachu a w lěsu rozbuchnychu. Kak bě granata k jězorej přišła, njeje znate.
To a tamne (21.07.22)
Wjele zboža měł je sobudźěłaćer wěstotneje firmy při rumowanju zawostankow rockoweho festiwala Hurricane. 23lětny bě so po kóncu nócneje słužby w delnjosakskim Scheeßelu k spanju do stana lehnył, kiž běchu hosćo festiwala stejo wostajili. Bager stan hrabny a ćisny jón do wotpadkoweho kontejnera. Muž je akciju njezranjeny přetrał. Najebać to dyrbi wodźer bagra z chłostanjom ličić, dokelž njebě pohladał, hač je stan prózdny.
Dokelž njeměješe prěni oficěr wukubłanje na pilota hišće wotzamknjene, je so pasažěrske lětadło po puću z Londona do New Yorka zawróćić dyrbjało. Airbus A330 bě hižo 40 mjeńšin w powětře, jako w cockpiće zwěsćichu, zo njeje prěni oficěr hišće wšě předpisane treningowe lěty zmištrował. Na to lećachu wróćo. Předewzaće Virgin Altantic rěčeše wo słužbnym planowanskim zmylku.
To a tamne (20.07.22)
Z powětrom pjelnjeny papagaj je w Bayerskej pomocnikow a samo helikopter zaběrał. Wobydlerka bě na rěce Regen pola města Cham spodźiwny objekt na wodźe wuhladała. Dokelž móhło so tež wo znjezboženy gumijowy čołm jednać, wołachu wohnjowu woboru, wodowu stražu a helikopter policije. Pomocnicy namakachu gumijowu hrajku, nic pak jeje wobsedźerja.
Hnydom cyły kilogram drogi crystal měješe dealer při sebi, jako jeho policija w Kamjenicy lepi. Zastojnicy namakachu wopojny jěd w nachribjetniku 42lětneho, jako jeho kontrolowachu. Drogi běchu w plastowych tyzach a titkach schowane. Dealer transportowaše drogi z elektriskim rolerom. Sudnik je bjezposrědnje na to zajeće 42lětneho wukazał. Jeho dowjezechu do jastwa, wumjetujo jemu wikowanje z drogami we wulkim stilu.
To a tamne (19.07.22)
Pospytane wotstronjenje wosaceho hnězda je w juhopfalcskim Bellheimje zasadźenje wohnjoweje wobory zawinowało. 39lětny bě spytał, wosy pod třěchu domskeho z bunsenowym palakom wućěrić. Při tym so hnězdo zapali. Přiwołana wohnjowa wobora móžeše woheń zhašeć, prjedy hač tón třěchu wobškodźi. Zamołwići wotradźa, hnězda sami wotstronić. Lěpje je, fachowcow přiwołać.
Kedźbliwy psyk je we Winsenje pola Hannovera wjetšemu wohenjej zadźěwał, swojemu wobsedźerjej pak skóržbu wunjesł. Muž bě woheń w železnym sudobju bjez dohladowanja palić dał, policija zdźěla. Na to so pódla sudobja ležace drjewo zapali. Hakle přez šćowkanje psa so na to dohlada. Susodźa wołachu wohnjowu woboru, kotraž płomjenja podusy. Při tym zwěsćichu, zo paleše so w sudobje wobarbjene drjewo, štož njeje dowolene.
To a tamne (18.07.22)
Pozdatnje znjezboženy parašutist je w sauerlandskim Altena zasadźenje specialistow wohnjoweje wobory za wuchowanje we wulkich wysokosćach zawinował. Swědcy běchu při tamnišim spjatym jězoru błyšćacy so objekt při nahłej skłoninje wuhladali. Dokelž njebě teren bjeze wšeho přistupny, wołachu fachowcow z Dortmunda. Ći zwěsćichu, zo jedna so wo chětro wulki powětrowy balon.
Dwanaće lět stary hólc z Indiskeje je swětowe mišterstwa w ličenju z hłowy dobył. Aaryan Shukla je so wčera w Paderbornje přeciwo 34 konkurentam z 18 krajow přesadźił. Slědowaštaj Japančan Ono Tetsuya a Mohammed El Mir z Libanona. Wobdźělnicy dyrbjachu wjacore nadawki spjelnić. Mjez druhim dyrbjachu dźesać dźesaćcyfrowych ličbow hromadu ličić abo dwě wosomcyfrowej ličbje we hłowje multiplikować.
To a tamne (15.07.22)
Elektriski roler z móžnej maksimalnej spěšnosću 120 km/h je policija w Šwicarskej sćazała. Twarjene su e-scootery poprawom jenož za 20 km/h. Jězdźidło bě policistam napadnyło, dokelž njebě swěca w porjadku. Při dokładnej kontroli so wukopa, zo je w roleru motor z 4 000 wattami zatwarjeny město dowolenych 500 wattow. 23lětneho wodźerja jězdźidła su wobskoržili.
Žarowacu wowcu je policija ze železniskich kolijow w šwabskim Tapfheimje njesć dyrbjała, dokelž njeje so zwěrjo hinak z blaka hibnyło. Wowca steješe spočatk tydźenja při kolijach poboku dweju wowcow, kotrejž bě ćah přejěł a morił. Policist wza zwěrjo skónčnje na ramjo a je wotnjese. Wowcu su najprjedy raz na bliskim statoku zaměstnili. Lokomotiwnicy běchu policistow wo wowcy w susodstwje kolijow informowali.
To a tamne (14.07.22)
Liška je so do zarjadnistwa Berlinskeho senata zabłudźiła. Zwěrjo sedźeše wčera před zarjadom za integraciju, dźěło a socialne w Kreuzbergu a nóžkowaše potom po twarjenju hač do najwyšeho poschoda, senat zdźěla. Sobudźěłaćerjam so poradźi, lišku změrować a do kartona tyknyć, kotryž přepodachu policiji. Ta dowjeze zwěrjo ke skótnemu lěkarjej. Liški so w Berlinje derje rozmnožeja.
Wupyšeny pas swětoweho pjasćowarskeho mištra, kiž bě zemrěty južnoafriski prezident Nelson Mandela něhdy wot pjasćowarskeje legendy Raya Leonarda dóstał, su z muzeja w Južnej Africe pokradnyli. Pas, kotrehož hódnotu trochuja na 3 000 eurow, su njeznaći z muzeja Mandela House Museum w Soweto spakosćili. W domje bě Mandela wot 1946 hač do 1962 bydlił. W nim chowaja wosobinske wěcy bywšeho prezidenta.
To a tamne (13.07.22)
Z dwanaće lětami masterski studij wotzamknył je wulce inteligentny Laurent Simons. W runje jednym lěće je belgisko-nižozemski hólc studij fyziki na uniwersiće w Antwerpenje zmištrował, uniwersita zdźěla. Maturu bě Laurent hižo z wosom lětami zakónčił. Po tym studowaše wón elektrotechniku. Spočatk lěta wobdźěli so wón na slědźenskim projekće Mnichowskeje uniwersity k wuslědźenju nowych srědkow přećiwo rakej.
Zwada mjez šoferom taksija a sobujěducymi je w juhohessenskim Mörfelden-Walldorfje zasadźenje policije zawinowała. 42lětny šofer bě třoch pasažěrow w starobje 22 a 23 lět namołwjał, z awta wulězć, po tym zo běchu so płaćizny dla zwadźili. Na to dwaj młodostnaj awto wobškodźištaj, načinjejo škodu wjacorych tysac eurow. Dóńdźe tež k ćělnym rozestajenjam. Policija pad přepytuje.
