To a tamne (10.09.21)
Lěta 1962 za dwanaće centow kupjeny comicowy zešiwk „Spiderman“ su w USA za 3,6 milionow dolarow (něhdźe tři miliony eurow) přesadźowali. Je to najdróši comicowy zešiwk, kotryž su hdy přesadźowali, zdźěli awkciski dom Heritage Auctions w texaskim Dallasu.
Swojich wobsedźerjow z awta wuzamknył je pos w Bayerskej. Porik bě z bydlenskim mobilom po puću a bě njedaloko sławneho hrodu Neuschwanstein pozastał. Muž a žona wulězeštaj, zo byštaj fotografowałoj. Při tym staj motor dale běžeć dałoj. Pos skakaše nerwozny po sydle sobujěduceho a hladaše za nimaj z woknom. Při tym dótkny so knefla, kotryž awto wotnutřka zamkny. Mužej so na zbožo poradźi, z gratom nabóčne wokno wočinić a do woza zalězć.
To a tamne (09.09.21)
Kreatiwnu formu lěnjopasenja je sej financny zastojnik w Šwedskej wumyslił. Přistajeny dawkoweho zarjada je hodźiny dołho sam na so zwonił. Kaž nowiny rozprawjeja, běše telefon muža cyłkownje 55 hodźin blokowany. Za to bě wón ze słužbnym aparatom swój mobilny telefon zazwonił a bě tak „wobsadźeny“. Wonkowne telefonaty posrědkowachu tamnym sobudźěłaćerjam. Šefej skónčnje wěčne telefonaty napadnychu. Zastojnik smě nětko z pušćenjom ličić.
Klasiski to pad w krótkej přestawce na awtodróhowym wotpočnišću. Nan je na A2 pola Hannovera swoju 16lětnu dźowku zabył. Swójba bě krótko pozastała, zo móhł wón wustupić hić, mać w awće spaše. Štož muž njewědźeše: Tež dźowka bě na nuznik šła. Tak wón dale jědźeše. Holca prošeše druhich wo pomoc, kotřiž nana a mać telefonisce informowachu.
To a tamne (08.09.21)
Njewšědnu namakanku su archeologojo w Lübecku wuslědźili: 79 lět po bombardowanju města přez lětadła antihitlerskich zwjazkarjow nańdźechu woni w pincy tehdy zničeneho domu derje zdźeržanu tortu. Prěnje přepytowanja su wunjesli, zo jedna so wo worješkowu tortu z krokantowej kromu. Z glazuru a ornamentami wudebjene pječwo bě w bywšej kuchni domu pod rozwalinami zasypane a je tak wšitke lěta přetrało.
Přistojny paduch je so w sewjerorynsko-westfalskim Gevelsbergu pola wobsedźerki bydlenja zamołwił – a bjez rubizny ćeknył. Njeje wědźał, zo je něchtó doma, rjekny wón zadźiwanej wobydlerce, kotraž jeho nadobo w koridorje zetka. Na to so spěšnje zminy. Do toho bě so do bydlenja w pjatym poschodźe wjaceswójbneho domu zadobył a je při tym najskerje kusk přewótře był.
To a tamne (07.09.21)
Tobołu ze 40 000 eurami w busu zabyła je žona w juhofrancoskim Nîmesu. Dźakowano přikładnemu zadźerženju sobudźěłaćerjow wozydłownistwa móže sej wona tošu z pjenjezami nětko pola policije wotewzać. Šofer bě zabytu tošu w depoće wotedał, bjez toho zo by wulce do njeje hladał. Sobudźěłaćerjo jón wočinichu, zo bychu wobsedźerja zwěsćili. Při tym namakachu pjenjezy a dokumenty, kotrež wobswědčeja, zo su pjenjezy legalne.
Dwanaće pokradnjenych katalyzatorow je policija při kontroli na awtodróze A 4 pola Wilsdruffa w awće namakała. Zastojnikam bě awto spodźiwneho jězbneho stila dla napadnyło. Pola 40lětneho wodźerja reagowaše drogowy test pozitiwnje. Při kontroli awta namakachu zastojnicy katalyzatory a grat za kradnjenje. Zwotkel nastroje pochadźeja a kak wulka škoda je, chcedźa nětko wuslědźić.
To a tamne (06.09.21)
Kino pod hołym njebjom wosrjedź awtodróhi móžeše 500 filmowych fanow sobotu na A 8 pola Pforzheima dožiwić. Wottorhanskich dźěłow při mosće dla bě čara kónc tydźenja zawrjena. Pforzheimske komunalne kino je składnosć wužiło a tam 15 metrow šěroku płachtu stajiło. Na třoch jězdnjach běchu stólcy nastajane, nimo toho předawachu popcorn a napoje. Wšitke zastupne lisćiki běchu w běhu połdra hodźiny předate.
Hejatej konjej stej wulět zapřaha w braniborskim Rheinsbergu dočasnje skónčiłoj. Brunačej běštej wosrjedź wulěta wosomwosoboweje skupiny z kuču naraz stejo wostałoj. Lědma zo bě pohonč z woza zalězł, pak wonej wóz chětro spěšnje 200 metrow po chódniku dale ćehnještej. Hakle jako so wotežka w štomje zapopadny, bě jězba nimo. Na zbožo so jenož jedna sobujěduca snadnje zrani.
To a tamne (03.09.21)
Hodźiny dołho do wopačneho směra jěł je 92lětny muž z hessenskeho Bad Hersfelda a je skónčnje do Rostocka nad Baltiskim morjom dojěł. Poprawom chcyše wón do 130 kilometrow zdaleneho Nidderauwa. Syn muža bě policiju informował, dokelž njebě rentnar na šulski zachod wnučki přijěł. Policija pytaše z dowolnosću sudnika za mobilnym telefonom muža a zwěsći, zo je 92lětny w 550 kilometrow zdalenym Rostocku. Prawdźepodobnje bě wón wopačnu adresu do nawija zapodał.
Manipulacije wólbnych plakatow dla ma Greifswaldska zapósłanča Zelenych Katharina Horn wulke mjerzanje z policiju. Zastojnicy běchu ju lepili, jako přelěpješe wólbne plakaty zapósłanca CDU Michaela Sacka z nalěpkami „koruptny“. 23lětna Horn je so pola Sacka mjeztym telefonisce zamołwiła.
To a tamne (02.09.21)
Z překwapjenjom je so wčerawši rekordny pospyt w Zwickauwje skónčił: Na wšě 20 sportowčow město planowanych 19 je so do Trabanta 601 tłóčiło. Runje tři a poł mjeńšiny młode žony trjebachu, zo bychu do nutřkowneje a kófroweje rumnosće zalězli, tak zo móžachu durje awta začinić, kaž sej to předpisy žadaja. Rekord je tuž nětko zaso w Zwickauwje.
Z rekordnymi 305 km/h bě 23lětny na ilegalnym wubědźowanju awtow na awtodróze w Düsseldorfje po puću a je so při tym hišće sam filmował. Tam je spěšnosć poprawom na 120 km/h wobmjezowana. Filmowy material, z kotrymž běchu so wobdźělnicy wubědźowanja w interneće hordźili, je policija mjeztym zawěsćiła. Awtomatiske kamery awtodróhi su to tohorunja dokumentowali. 23lětnemu hrozytej pokuta 700 eurow a sćazanje jězbneje dowolnosće na tři měsacy.
To a tamne (01.09.21)
19 žonow w jednym Trabanće 601 – tónle nowy rekord chcychu dźensa w Zwickauwje nastajić. 1976 bě w telewizijnym wusyłanju „Außenseiter – Spitzenreiter“ 17 wosobow do tajkeho awta zalězło. 18 žonow rejwanskeho towarstwa w braniborskim Altlandsbergu je rekord z lěta 2019 přetrjechiło. Mjetarki Zwickauskeho mustwa BSV chcychu jón dźensa do domizny Trabanta wróćić. Akciju chcedźa filmisce dokumentować a Institutej za rekordy předpołožić.
Zo by morjenje třoch ludźi přiznał, je muž na samym wuchodźe Ruskeje cyły tydźeń na přichodnu policajsku stražu nóžkował, dokelž njebě tam žanych busowych abo železniskich zwiskow. We wsy Ochotsku wón policistam rjekny, zo je pjany najprjedy znateho a po tym dwě žonje zatřělił. Muža, kiž dźěła na dospołnje wotležanej farmje w lěsu, nablaku zajachu.
To a tamne (31.08.21)
Z popjerjowym sprayjom do sobuwobydlerki dała je so rentnarka w starowni w bayerskim Oberstdorfje. Do toho bě so staruška ze 86lětnej zwadźiła. Na to hrabny młódša z njeju za tyzu ze sprayjom. Při atace su so nimo 86lětneje hišće třo dalši wobydlerjo domu zranili, lěkarske zastaranje pak na zbožo trěbne njebě. Přećiwo 79lětnej policija nětko zranjenja ćěła dla přepytuje.
Pjany do policajskeho wozydła zrazył je muž ze swojim awtom w braniborskim Seelowje. Policisća běchu njedźelu rano w zahrodkownišću zasadźeni a běchu swój wóz před zachodom wotstajili. 28lětny do njeho zrazy, jako chcyše kompleks wopušćić, a jón wobškodźi. Policisća naměrichu pola muža 1,97 promilow alkohola. Jězbnu dowolnosć wón žanu njeměješe. Tak sej zastojnicy tež klučiki awta hnydom zdźeržachu.
To a tamne (30.08.21)
Na wšě 380 kilometrow domoj nóžkował je pos w Francoskej. Do toho bě wón při dowolowej jězbje na přestawce při awtodróze twochnył. Po hodźinach čakanja dyrbještaj wobsedźerjej bjez njeho dale jěć. Něšto dnjow pozdźišo dóstaštaj wonaj foto psa wot susodow, kotřiž doma na jeju dom kedźbowachu. Na nim bě „Pablo“ widźeć, słaby, ale strowy. Swój dowol mandźelskaj hnydom skónčištaj, zo byštaj so nawróćiłoj.
Napřemoběh šlinkow su sobotu w Oldenburgu zarjadowali. Dobyćer wubědźowanja bě šlink z mjenom „Speedy Gonzales“. Wón trjebaše za 33 centimetrow dołhu čaru tři minuty a 28 sekundow. Zwěrjo dósta hłójčku solotje jako myto, jeho trenar Rudi trajnu kartu za delnjosakski filmowy festiwal „Fast and Furios – Back to the Culture“. Cyłkownje 25 šlinkow bě so wubědźowało.
