To a tamne (16.03.21)
Wjace hač 120 metrow dowysoka lězć dyrbjachu wohnjowi wobornicy w Berlinje. Při fasadźe hotela „Park Inn by Radisson“ na Alexanderowym naměsće bě so wulke „R“ pušćiło a hrožeše na terasu hotela na 40. poschodźe padnyć. Pismik wisaše jenož hišće na elektriskim kablu. Specialisća za wuchowanje ludźi we wulkich wysokosćach su „R“ zaso zasadźili. Akcija traješe dobru hodźinu.
Ze 200 km/h před policiju ćěkał je muž z wosobowym awtom na dróze pola Greifswalda w Předpomorskej. Zastojnicy jeho sčasami samo z wočow zhubichu. Něšto pozdźišo kolegojo awto wuhladachu, na čož šofer z wulkej spěšnosću dale smaleše. Wjacore policajske jězdźidła awto přesćěhachu. Před Prenzlauwom je skónčnje prózdne nańdźechu. Krótko na to so jeho wodźer sam přizjewi a dyrbješe jězbnu dowolnosć wězo wotedać.
To a tamne (15.03.21)
Dawno znješkódnjena bomba je we Weissachu pola Stuttgarta zasadźenje policije zawiniła. W nadawku bydlenjotwarskeho předewzaća běchu wjacori sobudźěłaćerjo garažu wotewrěli. Tam namakachu pozdatnje strašny objekt. Policija da na to hłownu dróhu zawrěć. Fachowcy pak spěšnje zwěsćichu, zo bě bomba drje originalna, ale bjez rozbuchadła. Wona słušeše domizniskemu towarstwu, kotrež wužiwaše garažu jako skład.
Tři metry dołhi krokodil je wohnjowych wobornikow w Čěskej nastróžił. Wobornicy běchu woheń na třěše zahrodoweho domu w gmejnje Klopina 190 kilometrow wuchodnje Prahi hašeli. Na to chcychu w domje nutřka hladać, hač so tam něhdźe něšto dymi. To tam krokodil wokoło łažeše. Fachowc jeho popadny. Kak bě reptil do domu přišoł a hač tam legalnje přebywa, chcedźa nětko přepytować.
To a tamne (12.03.21)
Traktor wosrjedź bydlenskeje stwy je muža w badensko-württembergskim Hoßkirchenje wustróžił. Wozydło z připowěšakom, połnym hnójnicy, bě z puća zjěło, sćěnu domskeho přełamało a z motorowej hawbu w stwě stejo wostało. 40lětny wobydler domu měješe wulke zbožo, kaž policija zwěsći. Jemu so ničo njesta. Škoda na twarjenju wučinja 220 000 eurow. Snadnje zranjeneho 29lětneho traktorista dowjezechu do chorownje.
Žałosćenje ćěšenka w kontejneru za staru drastu je w schleswigsko-holsteinskim Ahrensböku zasadźenje policije zawiniło. Wobydlerka bě wołanje słyšała a policiju informowała. Wohnjowi wobornicy kontejner rozrězachu a přepytachu. Při tym so wukopa, zo pochadźeja zwuki wot babyjoweje klanki, w kotrejž tčachu hišće baterije. Něchtó drje bě hrajku do kontejnera ćisnył.
To a tamne (11.03.21)
Zranjenemu šubutej žiwjenje wuchował je kedźbliwy muž w sewjerorynsko-westfalskim Balve. Wón zawoła policiju a wodźeše wobchad awtow wokoło ptaka, kotryž sedźeše wosrjedź zwjazkoweje dróhi B 229. Strachoćiwemu zwěrjeću ze zranjenym wóčkom njeje so derje šło, kaž policija pytny. Wona wza šubuta (Uhu) do přikrywa a dowjeze jeho do sokołarstwa, hdźež jeho skótny lěkar zastara.
Dom połny kulkopisakow ma 58lětny Gerd Reck we wuchodofriziskim Westrhauderfehnje a chce tak swětowy rekord nastajić. „Chcu čłowjek z najwjace kulkopisakami na swěće być“, zdźěli Reck powěsćerni dpa. W běhu 27 lět je wučeny skowar po swójskim trochowanju něhdźe 150 000 pisakow znosył, kotrež ma po cyłym domje rozdźělene. Pječa pak bydli w Danskej muž, kiž wobsedźi 500 000 tajkich pisakow.
To a tamne (10.03.21)
Z dźěćaceje čumpjele wuswobodźiła je wohnjowa wobora 18lětnu w Drježdźanach. Młoda žona bě so na hrajkanišću na čumpjel sydnyła, ale w njej tčacy wostała. Přiwołani pomocnicy dyrbjachu sydło rozšrubować, zo bychu ju z dilemy wuswobodźili. Zranił so při tym na zbožo nichtó njeje.
Domjace tofle Winstona Churchilla su za 37 000 eurow přesadźowali, kaž awkciski dom Bellmans w hrabinstwje West Sussex zdźěli. Somoćane tofle něhdyšeho premierministra z toho złoćanymi inicialemi wunjesechu tak dwójce telko dobytka kaž poprawom wočakowane. Palencowa škleńca Churchilla ma za 17 500 eurow noweho wobsedźerja. Churchill (1874–1965) bě we Wulkej Britaniskej za čas Druheje swětoweje wójny a w 1950tych lětach knježił a je premierministrej Borisej Johnsonej z wulkim přikładom.
To a tamne (09.03.21)
Na wšě 83 900 eurow namakała je policija w ručnym fašku wosoboweho awta na awtodróze A 61 pola sewjerorynsko-westfalskeho Nettetala. Kontrolujo awto njedaloko nižozemskeje mjezy nańdźechu zastojnicy pjenjezy w listowej wobalce. 58lětny šofer dawaše „spřećiwjace so informacije“ wo tym, zwotkel pjenjezy pochadźeja. Mnóstwa wjace hač 10 000 eurow dyrbja na namjeznych přechodach do Němskeje přizjewjene być.
Jědnaćelětneho paducha awta je policija w delnjosakskim Gifhornje lepiła. Šofer bě awto skrótka wopušćił, zo by sej při kiosku něšto k jědźi kupił. Klučik drje bě tčacy wostajił. Jědnaćelětny z 13lětnym towaršom to wuži a wotjědźe. 31lětny wóz z druhim awtom přesćěhowaše. Mjeńšiny pozdźišo pokradnjene jězdźidło na křižowanišću do dalšeho awta zrazy. Škoda: 12 000 eurow.
To a tamne (08.03.21)
Njewšědnje dołhe objektiwy fotoaparatow su njedaloko lětanišća w Frankfurće n. M. zasadźenje policije zawinowali, dokelž bě je nimo jěduca žona za mašinske třělby měła. Alarmowani policisća zetkachu štyrjoch fotografow, kotřiž chcychu lětadła zwobraznić. Za to wužiwachu wosebite objektiwy. Policija přiwšěm potwjerdźi, zo je žona prawje jednała.
Najćeše wubědźowanje sankowych psow swěta w Alasce je so pod wuměnjenjemi koronapandemije zahajiło. „Iditarod“ pak njepowjedźe kaž hewak z Anchoragea, najwjetšeho města zwjazkoweho stata USA, do 1 600 kilometrow zdaleneho Nome nad Beringskim morjom. Město toho so 47 přizjewjenych zapřahow lětsa po połojcy čary zawróći. Přenocować njebudu na wsach podłu čary, ale w stanowych lěhwach zwonka sydlišćow. Wobdźělnikow chcedźa wospjet testować.
To a tamne (05.03.21)
Z jězbnej dowolnosću swojeho bratra je 26lětny na policajskim rewěrje w delnjosakskim měsće Celle spytał, so chłostanju jězdźenja bjez jězbneje dowolnosće dla wuwinyć. Zo je muž na foće dokumenta wo wjele šwižniši, wón z tym wopodstatni, zo bě wobmjezowanjow korony dla tójšto přibył. Při kontroli do toho wšak twjerdźeše, zo bě papjery doma zabył. Nazajta přijědźe z wopačnym dokumentom na stražu. Tam so skónčnje wukopa, zo scyła žanu jězbnu dowolnosć nima.
Dorost pola kenguruwow maja wot najnowšeho w Kamjeničanskim zwěrjencu. Dokelž su młodźata při porodźe přewšo móličke, hladarjo spočatnje ani njepytnychu, zo maja tam tři nowonarodźene, kotrež so w měšku při maćernym brjuše chowaja. Tak njemóža ani rjec, kak stare młodźata su. Hakle po poł lěće wone měšk maćerje prěni króć wopušća.
To a tamne (04.03.21)
Dźěle chódnika pytaja w jendźelskim městačku Storringtonje. Dwanatki chódnikowych platow běchu so přez nóc zhubili. Mjeztym je tamniše měšćanske zarjadnistwo wobkrućiło, zo na padustwo tukaja. Z pomocu nahrawanja wobstražowanskich widejowych kamerow spytaja skućićelow nětko wuslědźić.
Baćony wróća so ze zymskeho přebytka do Braniborskeje. We wjacorych wokrjesach su je hižo wuhladali, byrnjež jenož jednotliwe. Někotre z nich wšak budu nětko samolutke tydźenje na swojich partnerow čakać dyrbjeć. Kaž fachowcy měnja, klimowa změna baćony zamyla a swójbne planowanje wobwliwuje. Přerěznje měješe 1 206 porikow w Braniborskej loni 1,8 młodźatow. Za zachowanje wobstatka baćonow pak stej znajmjeńša dwě młodźeći na hnězdo trěbnej.
To a tamne (03.03.21)
Dwaj lětdźesatkaj zhubjenu mólbu, kotraž měješe poprawom we wustajeńcy New-Yorkskeho Metropolitan-muzeja wisać, su w bydlenju njedaloko muzeja namakali. Chorobna sotra, kotraž bě wo zhubjenej mólbje čitała, je zhromadnje ze synom na sćěnje wisacy wobraz bliže přepytowała. A to bě jedna z 30 mólbow afroameriskeho wuměłca Jacoba Lawrencea ze serije „Struggle (bój)“. Za pjeć wobrazami serije hižo wjele lět pytaja. Žona njewědźeše, zo ma wuměłsku drohoćinku w bydlenju.
Proch srěbacy roboter je w Erfuće zasadźenje policije zawinił. 29lětna bě w nocy spodźiwneje hary w swojim bydlenju dla wotućiła. Tukajo na paduchow so wona w spanskej stwě zamkny a alarmowaše policiju. Zastojnicy přičinu hary spěšnje wotkrychu: Elektroniski pomocnik-roboter bě so wosrjedź nocy do dźěła dał a při tym zas a zaso wo meble storkał.
