To a tamne (24.09.21)
Wokata sowa měješe z kałatym grotom swoju lubu nuzu, dokelž bě w nim z prawej pazoru wisajo wostała. Hakle wohnjowemu wobornikej so poradźi, ptaka z pasli wuswobodźić, za čož wužiwaše techniski nastroj. Chětro wosłabjenu sowu dyrbjachu na to do zwěrjećeje kliniki dowjezć, zo by so po tajkich stróželach zaso porjadnje zhrabała.
Swětowy rekord twarožkoweje pizzy chce Francoz Julien Serri nětko na zežiwidłowych wikach w Lyonje docpěć. Z pomocu regionalnych producentow chce wón pizzu z 1 000 družinami twarožka napjec. K tomu złožuje so jenož na domoródne družiny, z kotrychž maja hižo něhdźe 1 200. Narodny centrum za mlokowe hospodarstwo a dalši nazhonići fachowcy předewzaće Serrija wězo podpěruja. Wuslědk chce wón mjez wopytowarjemi wikow rozdźělić.
To a tamne (23.09.21)
Z chětro měšanymi začućemi dyrbi němska winowa kralowna Eva Lanzerath koronapandemije dla nětko njewšědnu dobu zastojnstwa zakónčić. „Sym jara zrudna, zo so moje lěto skónči, bjez toho zo móžach kaž moje předchadnicy wino na wulkozarjadowanjach prezentować, rjekny 23lětna powěsćerni dpa. Ju běchu loni w septembru za 72. němsku winowu kralownu wuzwolili. Pandemije dla pak dyrbjachu nimale wšitke terminy wotprajić. Jutře wuzwola w pfalcskim Neustadće nowu winowu kralownu.
Z drjewjanej łatu a nožom su so susodźa w Berlinje-Reinickendorfje do so dali a so mjez sobu zranili. Wobydlerjo dweju domjacnosćow běchu so tak zwadźili, zo samo ćělnu namóc wužiwachu. 27lětny poćerpje zranjenja noža dla, dalša 37lětna ćežke zranjenja na hłowje. Wobeju dyrbjachu do chorownje dowjezć.
To a tamne (22.09.21)
Negatiwny test korony na pozitiwny změnił je muž we Vietnamje a dyrbi nětko pokutu 280 eurow zapłaćić. Zaměr njewšědneje akcije 41lětneho bě, zo njechaše so jemu dźěłać. Přistajeny telekomunikaciskeje firmy bě so testować dał a je wuslědk změnił. Manipulowany certifikat pósła dźěłodawarjej a přiwuznym. Jako strowotniski zarjad wo tym zhoni, pósła sobudźěłaćerja k mužej na dalši test. Při tym so jebanstwo wukopa.
Erich Honecker kandiduje k wólbam zwjazkoweho sejma, znajmjeńša w Lipsku. Na jednym ze sćežorow wisa wobraz 1994 zemrěteho bywšeho předsydy statneje rady NDR a generalneho sekretara centralneho komiteja SED. Po słowach měšćanskeho zarjadnistwa pak „Honni“ tam ničo pytać nima, po wustawkach města njeje plakat na sćežoru dowoleny a ma so zaso wotstronić. Hdy, pak njebu postajene.
To a tamne (21.09.21)
Dokelž stej pječa mužej na zadk klesnyłoj, stejitej dwě młodej žonje w jendźelskim měsće Portsmouth splažneho wobćežowanja a wobdźělenja na tumulće dla před sudnistwom. Wobskorženej w starobje 19 a 20 lět dyrbještej wčera prěni raz na sudnistwo. Wobě žonje wumjetowanja wotpokazujetej. Placnjenje na zadk bě nastork wjetšeho rozestajenja, po tym zo bě dalša žona młodej žonje narěčała, wumjetujo jimaj nalěhawosć. Hłowny proces budźe klětu 7. měrca.
Dwě staršej hač 107lětnej japanskej sotře stej po Guinnessowej knize rekordow najstaršej žiwej dwójnikaj swěta. Umeno Sumiyama a Koume Kodama běštej 1. septembra 107 lět a 300 dnjow starej a stej tak nowy rekord nastajiłoj. Dotalny tajki rekord měještej před 20 lětami zemrětej sotře: Wonej běštej zhromadnu starobu 107 lět a 175 dnjow docpěłoj.
To a tamne (20.09.21)
W Šwedskej je so łós (Elch) do chorownje zadobył. Zwěrjo skoči wčera připołdnju z woknom kliniki w juhošwedskim měsće Eskilstuna a so při tym zrani. Pacientow njeje na zbožo nastróžił, dokelž bě rumnosć prózdna. Přistajeni wołachu hajnika a skótneho lěkarja, kiž měješe zranjeneho łosa najprjedy raz pohłušić. Dokładne přepytowanje ma nětko pokazać, hač dyrbja łosa zasparnić abo nic.
Pěšcy, skaterojo a kolesowarjo mějachu wčera na jedyn dźeń Lipšćanski nutřkoměšćanski wobchadny kruh sami za sebje. Hłowna dróha bě wot 10 hač do 17 hodź. za nadróžny wobchad zawrjena. Tež pjerkobul hrajacy a běharjo su njewšědne městno čile wužiwali. Měšćanski wobkruh wobkruža nutřkowne město Lipska na štyrjoch čarach. Z akciju je so Lipsk na Europskim tydźenju mobility wobdźělił. Wjedra dla bě nawal přewidny.
To a tamne (17.09.21)
120 hodźin na mobilnym nuzniku wutrać chcedźa štyrjo Britojo, zo bychu pjenjezy za dobroćelsku organizaciju zběrali. „Je napinace“, rjekny jedyn z wobdźělnikow po prěnjej nocy. Wodnjo wšak maja kontakt z ludźimi, w nocy pak je njepřijomne a wuske. Bywši wojacy chcedźa pjenjezy organizaciji Forgotten Veterans přewostajić, kotraž so wo weteranow stara. Wutrać dyrbja hišće hač do njedźele w 17 hodź. Hač do wčerawšeho běchu 1 000 puntow (1 170 eurow) nazběrali.
Zabłudźeny młody wjelk je w Drježdźanach-Langebrücku w płoće tčacy wostał. Zwěrjo chcyše sej před ludźimi na ležownosć wućeknyć a dósta so tak do njepřihódneho połoženja. Sobudźěłaćerjo wjelčeho běrowa wołachu hajnika a policiju. Skótny lěkar móžeše małeho wjelka skónčnje wuswobodźić. Tón so na to chětře do bliskeje Drježdźanskeje hole zminy. Je jara rědko, zo so wjelki woprawdźe do sydlišćow zabłudźa.
To a tamne (16.09.21)
Zynčacy nachribjetnik je so na Nürnbergskim hłownym dwórnišću wo wulkozasadźenje policije postarał. Něhdźe 50 zastojnikow, mjez nimi fachowcy za znješkódnjenje bombow, přijědźe. Potencielne wohroženje pak wukopa so na zbožo jenož jako elektriski truhanski aparat. 85lětny bě nachribjetnik mjez čakacymi pod stólcami wotstajił a so hakle po dobrej hodźinje zaso wróćił. Policija nětko pruwuje, štó ma kóšty zasadźenja zarunać.
Cigarety dla je nan w mecklenburgskim Bad Kleinenje swojej dźěsći samej z ćahom jěć dał. Krótko do wotjězda ćaha bě wón na nastupnišćo šoł, zo by cigaretu kurił. Dźewjeć měsacow stara dźowka we wozyčku a dwulětny synk wostaštaj w ćahu. Naraz so durje začinichu a ćah wotjědźe bjez nana. Zwjazkowa policija so wo dźěsći staraše. Chětro wustróžany je nan z přichodnym ćahom za nimaj přijěł.
To a tamne (15.09.21)
Z blachowej tyzu bědźacy so jěž je w schleswigsko-holsteinskim Neumünsteru zasadźenje policije zawinił. Wobydlerka bě spodźiwne zwuki na ležownosći susoda słyšała a na zadobywarja tukała. Policija přijědźe z třomi awtami. Zastojnicy prózdnje stejacy dom wobstupichu, přepytachu jón, ale njejsu ničo namakali. Naraz pak woni tohorunja podhladne zwuki słyšachu a wuhladachu „z blachowej tyzu wojowaceho“ jěža.
Zwěrjeći wopyt w Lipšćanskej radnicy: Sobudźěłaćerka socialneho zarjada so njemało wustróži, jako z woknom hladajo šupa (Waschbär) wuhlada, kiž do běrowa hladaše. Městu bě to přičina, přez radnicowy intranet sobudźěłaćerjow pokiwy za wobchad z dźiwimi zwěrjatami dawać: „Na kóždy pad wotstawk dźeržeć a na žadyn pad je njepicować.“ Z fotami šupa su tele warnowanje rozšěrjeli.
To a tamne (14.09.21)
Chětro zajěł bě so kolesowar, kotrehož su danscy policisća na awtodróze pola Ellunda njedaloko mjezy k Němskej lepili. Kaž jim 25lětny powědaše, bě wón před dnjemi w Madźarskej startował, zo by přećela w Italskej wopytał. Kartu abo handy pak młody muž žanej při sebi njeměješe. Zastojnicy přepodachu 25lětneho policiji w Němskej, kotraž přewodźeše jeho skónčnje na dwórnišćo.
Tankować a zapłaćić – tak to wodźerjo jězdźidłow činja. Na tankowni w delnjobayerskim Hauzenbergu pak je minjenu sobotu něšto křiwje běžało. Jako chcyše muž swoju zličbowanku 21 eurow zapłaćić, wón pytny, zo je tankownja zamknjena. Wón zawoła tuž policiju, zo móhł pjenjezy někomu dać. Wšako nochcyše nikoho wobšudźić. Kaž zastojnicy zwěsćichu, bě šef tankownje na dowolu a njedocpějomny. Po wšěm zdaću bě wón zabył tankowanske stołpy wupinyć.
To a tamne (13.09.21)
To drje so mnozy dźiwachu, jako wuhladachu małeho hólčka za wodźidłom awta, kotrež bě minjeny štwórtk na zwjazkowej dróze pola Passauwa po puću. Tež policist, kiž bě ducy na dźěło, to wobkedźbowaše a zawoła swojich kolegow. Kaž so wukopa, bě 44lětny swojeho dwulětneho synka na klin wzał a jemu wodźidło jězdźidła přewostajił. Hakle jako hólčk zaso w swojim dźěćacym sydle sedźeše, smědźeštaj dale jěć. Nan ma nětko wězo z chłostanjom ličić.
Němske mišterstwa pomjatkoweho sporta maja noweho mištra, a to samo z rekordom. W Romje bydlacy 21lětny Andrea Muzii je sej ličbu ze 630 cyframi spomjatkował, zdźěli wčera organizator wurisanja Steffen Bütow w Torgelowje, hdźež su je přewjedli. Cyłkownje 1 700 ludźi po cyłym swěće pomjatkowy sport wukonja.
