To a tamne (10.06.20)

srjeda, 10. junija 2020 spisane wot:

Mops Edda, mjeztym Wilma, sudnistwo dale zaběra. Zastojnik města Ahlena bě psa zadołženej swójbje sćazał a jeho w interneće jako pozdatnje stroweho poskićił. Nowa wobsedźerka pak bě cyle hinašeho měnjenja, dokelž dyrbješe Wilmu wjacore razy na wočomaj operować dać. Nětko ma Münsterske sudnistwo pad na blidźe a je posudźowarja wo pomoc prosyło. Zwadna sudniska naležnosć wučinja mjeztym něhdźe 20 000 eurow.

Wulkeje podobnosće z turkowskim starom Enginom Altanom Düzyatanom dla je město Ordu bustu ­ wojaka z 13. lětstotka zaso wotstroniło. Poprawom dyrbješe skulptura nana załožerja Osmaniskeho mócnarstwa zwobraznjeć. Je pak skerje postawa dźiwadźelnika, kiž jeho w telewizijnej seriji předstaja. Měšćanske zarjadnistwo je so na tym ­postorčiło a bustu wotstronić dało.

To a tamne (09.06.20)

wutora, 09. junija 2020 spisane wot:

Poćehnjenje łoža je paducha we Wormsu přeradźiło. 40lětny bě so minjenu nóc do bydlenja zadobył. Jako wobydlerka to pytny, wona swojeho žiwjenskeho partnera zazwoni. Tón poda so hnydom na puć k domej a zetka muža, kiž w poćehnjenju poslešća něšto transportowaše. Dokelž bě jemu cycha znata, wón paducha narěča. Tón swoju rubiznu nablaku pušći a ćekny. Muž pak jeho dosahny a policistam přepoda.

Pilotny projekt ze 6 000 němskimi turistami chcedźa na Mallorce a druhich balearskich kupach přewjesć. Tak chcedźa pruwować, hač su nastupajo wěstotne naprawy koronawirusa dla na hoberski nawal turistow přihotowani, z kotrymž liča po wotewrjenju mjezow 1. julija. Němsku su wuzwolili, dokelž je tam poměrnje mało infekcijow z wirusom. Do karanteny turisća njetrjebaja.

To a tamne (08.06.20)

póndźela, 08. junija 2020 spisane wot:

Swójby sedmispancow wobkedźbować móža lubowarjo zwěrjatow nětko na internetnej stronje přirodoškitneho zwjazka Nabu. Jeho čłonojo běchu kamery do kukawow w nocy aktiwnych hrymzakow zatwarili. Po dołhim zymskim sparje su wone zaso chětro aktiwne. Dokelž su rezerwy tuka wotbyli, dyrbja najprjedy raz wjele žrać. Dorost wočakuja sedmispancy spočatk awgusta. Wot septembra hač do meje su wone w zymskim sparje.

Hakle z pomocu wohnjoweje wobory je so mužej w sewjerorynsko-westfalskim Bad Salzuflenje poradźiło, swój mandźelski pjeršćeń wotpołožić. Muž bě sej pjeršćenjak złamał, na čož porst zaćekny a cirkulaciju kreje haćeše. Wšitke po­spyty, pjeršćeń wotbyć, pak zwrěšćichu. Tež złotnikar njemóžeše pomhać. Hakle wohnjowym wobornikam so poradźi, pjeršćeń wotfrezować a porst zdobom chłódźić. Akcija traješe 45 mjeńšin.

To a tamne (05.06.20)

pjatk, 05. junija 2020 spisane wot:

Hnydom štyri ćelata na swět přinjesła je kruwa w Badensko-Württembergskej, štož je přewšo rědko. Mějićelce ratarskeho statoka bě swjatki sobotu njeměrna kruwa napadnyła. Krótko po tym wuhlada wona dwójnikaj w hródźi a je zastara. Na to kruwa hišće raz ćeleše a třeće a štwórte młodźo porodźi, bjez pomocy ratarki a skótneho lěkarja.

Sněženki z kamuškom na awta molujo je sydomlětna holca w Hohensteinje-Ernstthalu hobersku škodu zawostajiła. Pječa je wona lak 37 awtow rozdrapała, a to w běhu jeničkeho tydźenja. Při tym nasta škoda 30 000 eurow. Policija bě holčku po wobšěrnych přepytowanjach jako skućićelku zwěsćiła. Sydomlětna přizna, zo je sněženki molowała. Wona wšak twjerdźi, zo njebě jej wědome, kajku wulku škodu načini. Haj, hdyž žno žane sněženki z mróčelow njepadaja ...?!

To a tamne (04.06.20)

štwórtk, 04. junija 2020 spisane wot:

Měrneje nocy na policajskej straži dla je so połstalětny muž w Bremerhavenje na jeje teren zadobył. Chětro natutkany zalěze tam přez železny płót. Sobudźěłaćerka straže pak jeho na awtomatiskej kamerje wuhlada. Wulce zadźiwanym policistam muž rozłoži, zo chce skónčnje zaso raz woměrje spać, bjez mylenjow druhich. Zastojnicy pak dyrbjachu jemu přeće wotpokazać, dokelž njebě žaneje přičiny zajeća. Dyrbješe tuž zaso woteńć.

Ryzy lóšt na pućowanje je wosomlětneho pachoła z městačka Flöha pohnuł so z ćahom do Kamjenicy nastajić. Na tamnišim dwórnišću hólčec zastojnikam zwjazkoweje policije napadny, dokelž bě sam po puću. Tym wón rjekny, zo chce so na wulět podać, bjeztoho zo staršej wo tym wěstaj. Něhdźe 15 mjeńšin trajaca wróćojězba bě za njeho ćim zajimawša: W policajskim awće dowjezechu hólca domoj k staršimaj.

To a tamne (03.06.20)

srjeda, 03. junija 2020 spisane wot:

Nic na konju, ale z awtom je muž po ko­njacym wubědźowanišću w Gelsenkirchenje smalił. 22lětny jědźeše po wuprajenju swědkow njedźelu wječor pozdźe z wulkej spěšnosću a bjez swěcy po pěskojtej čarje. Swědcy awto zadźeržachu a tomu zadźěwachu, zo móžeštaj so muž a sobujěduca zminyć, prjedy hač policija dojědźe. Zastojnicy wupisachu jimaj skóržbu. Če­hodla běchu wrota wočinjene, njeje znate.

Wulki zajim kruwow zbudźił je wčera błyskač policajskeje kontrole spěšnosće na kromje Bielefelda. Foto policije pokazuje na wšě dźesać howjadow, kotrež steja wusko pódla so a hladaja wćipne přez płót na mobilnu radarowu připrawu policije. Błyskało je wutoru woprawdźe dosć: 37 z cyłkownje 438 kontrolowanych awtow bě přespěšnje po puću. Najspěšniši bě šofer ze 107 kilometrami na hodźinu na dróze, hdźež je 60 km/h dowolene.

To a tamne (02.06.20)

wutora, 02. junija 2020 spisane wot:

Njezbožo z motorizowanym konopejom zaběra policiju w durinskim Eichs­feldźe. Za kuriozne jězdźidło běchu motorske na třikoleso přetwarili a před wodźidło konopej připrawili. Na dróze mjez Kefferhausenom a Küllstedtom bě wozydło, kotrež nima ani nadróžne přizjewjenje ani čisłowu tafličku, do hrjebje zajěło. Při tym so třo sobujěducy zranichu. Na městnje njezboža pak zwosta jenož jedyn z wobdźělenych. Policija pyta nětko za wobsedźerjom a za šoferom.

Po wšej Němskej prěni drive-in-cirkus je w Mannheimje njedźelu něhdźe tysac wopytowarjow přiwabił. „Smy jara spokojom“, rjekny jednaćel dźěćaceho ­a młodźinskeho cirkusa Paletti Tilo Bender. Na wulkim parkowanišću móžachu wopytowarjo z awtom k wšelakim atrakcijam jěć a naprawo a nalěwo wuměłcow wobdźiwać. Cirkus ma 500 čłonow.

To a tamne (29.05.20)

pjatk, 29. meje 2020 spisane wot:

Dobra a droha to kapka: W Londonskim awkciskim domje Sotheby’s su 258 lět stary konjak za 132 000 eurow na přesadźowanju předali. Po wšěm swěće eksistuja runje hišće tři bleše palenca z palencarnje Gautier z lěta 1762. Je to zdobom najdróša hdy přesadźowana bleša konjaka. Blešu běchu přez generacije w pincy domu chowali. Fachowcy Sotheby’s su sej wěsći, zo je palenc „swój charakter wobchował“, a zo móžeš jón tež po połtřeća lětstotku hišće pić.

Swójski špihelowy wobraz na kradnjenym dźěćacym elektriskim awće je paducha přeradźił, jako tón spakosćene wěcy w interneće poskićowaše. Mjezwočo muža na nabóčnej škleńcy wuhladała bě wobsedźerka awta, bywša susodka 32lětneho paducha. 33lětna pytaše w interneće zaměrnje za awtom, kotrež běchu jej w pincy wjaceswójbneho domu w Schweinfurće pokradnyli. Podhladny sedźi mjeztym w přepytowanskej jatbje, dokelž ma hišće dalše padustwa na swědomju.

To a tamne (28.05.20)

štwórtk, 28. meje 2020 spisane wot:

Po zahrodźe kralowskeho palasta joggować smě wot najnowšeho britiski premierminister Boris Johnson. Kralowna Elizabeth II. bě jemu to wosobinsce dowoliła. Johnson chce po přetratej chorosći na koronawirus swoje ćěło zaso sylnić. Z wěstotnych přičin pak je 55lětnemu zakazane w zjawnosći běhać. Premiera běchu něšto dnjow na intensiwnej staciji Londonskeje chorownje lěkowali.

Róžojty hołb jako pozdatny spion je konflikt mjez Indiskej a Pakistanom nachwilnje přiwótřił. Indiscy wojacy běchu hołbja popadnyli, kotryž bě ze znjepřećeleneho Pakistana přilećał. Na nóžce měješe rynku z čisłom. Krótko na to přizjewi so muž z pakistanskeje wsy a rjekny, zo hołb jemu słuša a zo jeho za wulke wubědźowanje trenuje. Kode na rynce bě telefonowe čisło plahowarja.

To a tamne (27.05.20)

srjeda, 27. meje 2020 spisane wot:

Dorostowemu wowčerjej je dźěl jemu dowěrjeneho stadła twochnył a na awtodróhu A 3 pola Nürnberga běžał. Poprawom chcyše njenazhonity wowčer sta­dło přeměstnić, jako so dźěl wowcow wotsali. Hakle wobsadce policajskeju ­awtow a wjacori pomocnicy awtodróhoweje słužby skoćata zaso popadnychu. A 3 dyrbjachu za to dwě hodźinje zawrěć.

Psyče salony, kotrež smědźa w thailandskej stolicy Bangkoku po dlěšim zawrjenju korony dla zaso dźěłać, dožiwjeja nětko hoberski nawal. „Wjetšina wužiwarjow našich posłužbow njeje hišće nihdy swojeho psa sama myła“, rozprawja wobsedźer tajkeho salona. „Tak su stajnje zas na mnje zazwonili, jako bě wobchod ­začinjeny.“ Tójšto psam pobrachowachu tež wosebity płuwanski basenk salona a móžnosće, sej tam w klimatizowanych rumnosćach hrajkać.

Serbska debata

nowostki LND