To a tamne (11.01.21)
24 hodźin bjez přestawki telefonować chce reporter rozhłosoweho sćelaka 1 Live WDR. Při tym chce moderator Daniel Danger ze znajmjeńša 500 ludźimi rěčeć, kaž nowinarjam přeradźi. „24 hodźin telefonować, před tym mam wulki respekt. Ze swojej přećelku rěču najdlěje 20 mjeńšin při telefonje.“ Zastupnik Němskeho rekordneho instituta chce wusyłanje 21. januara přewodźeć. Wón chce na to dźiwać, zo su rozmołwy z ludźimi „zmysłapołne“.
Konopej zhubiła je žona na awtodróze w Bayerskej. 20lětna transportowaše mebl njepřiwjazany na připowěšaku a ani njepytny, jako tón njedaloko Woringena na jězdnju padny. Za njej jěducy šofer njemóžeše so wuwinyć a nastroj přejědźe. Při tym nasta škoda 2 000 eurow. Hakle, jako žona wotboči, jej malheur napadny. Nětko dyrbi z chłostanjom ličić.
To a tamne (08.01.21)
Hišće za čas telefonata nana do porodneje kliniki je so w bydlenju w Mnichowje dźěćko narodźiło. Muž bě při telefonje rjekł, zo je jeho žona we 38. tydźenju samodruha a zo su so hrona započeli. W tym wokomiku bě w pozadku hižo wukřik dźěsća słyšeć. Hnydom poda so nuzowy lěkar k bydlenju swójby, hdźež nańdźe mać a strowe hólčatko.
Mylnje nuzowe čisło wolił je paduch w jendźelskim měsće Stoke-on-Trent a je tak policiju alarmował. „Smy drje runje najnjezbožownišeju paduchow swěta zajeli“, pisa policija hrabinstwa Staffordshire. Mužej w starobje 49 a 42 lět běštaj so w Stoke-on-Trenće do domu zadobyłoj. Jako so jedyn z njeju na konopej sydny, zazwoni toho mobilny telefon awtomatisce nuzowe čisło policije. Ta móžeše jeju činjenju připosłuchać, doniž njepřijědźe a wobeju njezaja.
To a tamne (07.01.21)
Paduch w sewjerorynskim-westfalskim Windecku bě so do domu porika zadobył a tam tři laptopy, šmóratko a pjenjezy spakosćił. Naposledk je nuznik wužiwał, hdźež wobydlerka jeho lepi. Rozhorjena so wona njeznateho wopraša, štó je a što chce. Zadobywar chětře stany, hrabny sej pućowanski wačok, kotryž bě tohorunja pokradnył, a so zminy. Jeho „zawostajenstwo“ w nuzniku dyrbješe přećel žony wotstronić.
Saznicy chcedźa image čornych zwěrjatow polěpšić. Tajkich maja mjenujcy w zwěrjatownjach nadosć, dokelž ludźo čorne zwěrjata z njezbožom zwjazuja. Zjednoćenstwo saznikow w Berlinje je tuž kalender ze zwobraznjenymi saznikami a čornymi zwěrjatami kaž psami, kóčkami a nuklemi wudało. Prěnje 500 eksemplarow je hižo předatych. Dobytk chcedźa zwěrjatownjam přewostajić.
To a tamne (06.01.21)
Při zražce ze sněhowym mužom bu ćah w Köthenje wobškodźeny. Intercity Němskeje železnicy bě njedźelu do figury zajěł, kotraž při kolijach steješe. A lokomotiwa so wobškodźi. Policija pyta nětko za swědkami a skedźbnja na to, zo přebytk we wobłuku kolijow žiwjenje wohroža. To wšak dyrbješe bohužel tež sněhowy muž nazhonić.
Dokelž njeje žona na wučinjene zetkanje přišła, so 59lětny w Münsteru chětro rozhněwa. Najprjedy da so do sobudźěłaćerja spěšnohosćenca a je na to samo přiwołaneju zastojnikow nadběhował. Skónčnje so jimaj poradźi roznjemdrjeneho muža přemóc. Přiwšěm staj so lochko zraniłoj. Skućićel ma nětko z chłostanskim jednanjom ličić.
To a tamne (05.01.21)
Mobilna sawna na kromje puća je policajske zasadźenje wuskutkowała. Swědcy w saarlandskim Wallerfangenje běchu pozdatnje naheho muža w sudźe wuhladali a so na tym postorkowali. Zawołana policija pak njemóžeše žane přeńdźenje zwěsćić, sud bě na připowěšaku awta derje připrawjeny a muž w kupanskich cholowčkach. Sawna pod hołym njebjom njeje zakazana. Wón njetrjeba tuž ze žanymi konsekwencami ličić.
Dotal njeznaty dobyćer lota z Badensko-Württembergskeje je swoju poslednju šansu zapasł so přizjewić a sej 11,3 miliony eurow hódne dobyće wotewzać. Tele pjenjezy du nětko do hornca wosebitych wulosowanjow. Hižo wot apryla 2017 běchu za dobyćerjom pytali. Najebać prawidłowne namołwy njeje so nichtó přizjewił. Tajki pad dotal na juhozapadźe Němskeje hišće dožiwili njejsu.
To a tamne (04.01.21)
Žonu ze swójskeho balkona wuswobodźić dyrbješe minjeny tydźeń wohnjowa wobora w Mnichowje. Dwulětny synk bě ju z bydlenja wuzamknył. Poprawom chcyše mać jenož wonka telefonować, zo njeby spjace dźěćo myliła. Syn pak přiwšěm wotući a durje balkona začini. Tuž dyrbješe žona wohnjowu woboru wo pomoc prosyć.
Poprawom měješe to za porik w Awstriskej jedyn z najrjeńšich dnjow žiwjenja być. Tola wony dźeń skónči so z katastrofu. Što bě so stało? Porik krosnowaše na horu Falkert w Korutanskej. Na wjeršku staji 27lětny skónčnje prašenje, hač nochcytaj so zmandźelić, čemuž 32lětna rady přizwoli. Po wšěm zdaću sonow wo přichodnym zhromadnym žiwjenju dla so žona wobsuny. Slubjeny drje chcyše ju hišće dźeržeć, štož so jemu njeporadźi a 32lětna sunje so 200 metrow po horje dele. Na zbožo je ju wobhospodar hěty namakał a wuchował. Zranjeneho muža dyrbješe helikopter do doła dowjezć.
To a tamne (30.12.20)
Kołp na železniskej čarje je na sewjeru Hessenskeje zapozdźenje ćahow wuskutkował. Zwěrjo je so patoržicu ze swojim přećelom-kołpjom na čarje mjez Kasselom a Göttingenom zabłudźiło, zdźěli rěčnik zwjazkoweje policije. Přećel je so po wšěm zdaću milinowoda dla zahinył. Tamny kołp sedźeše samlutki zdźěla na kolijach čary, tak zo njemóžeše hižo žadyn ćah jěć. Wohnjowa wobora je kołpja skónčnje popadnyła a preč dowjezła.
Policija w kóždej nuzy pomha a samo w nocy dźěći dohladuje, jelizo to staršej njemóžetaj. Znajmjeńša bě tomu w nocy na wutoru tak, jako nan šěsć dźěći w oberfrankskim Schönwaldźe zasadźensku centralu zawoła. Jeho žona je chora a dyrbješe nuznje do chorownje. Wón pak bě na nócnej słužbje a njemóžeše wottam preč. Samozrozumliwje policija přichwata a starosćiwym dźěćom samo bajku předčita. Kaž zastojnicy zdźělichu, bě zbytna nóc měrna a dźěći spachu.
To a tamne (29.12.20)
Podhladne wačoki před policajskej stražu w Pforzheimje su so jako słódka překwapjenka wukopali. Njeznaty bě pjatk wječor kófer a wjacore kisty před stražu wotstajił a tak wulke zasadźenje policije zawinował. Kónčinu wokoło twarjenja zaraćichu, fachowcy za rozbuchadła dyrbjachu ze Stuttgarta přijěć. Po dwěmaj hodźinomaj bě alarm nimo: W kófrje a kistach běchu słódkosće a hrajki. Čehodla bě muž wěcy tam stajił a so potom spěšnje zminył, nětko přepytuja.
Wosamoćeny starc je w italskej Bologniji patoržicu wječor policiju wołał, zo móhł sej z někim na hody připić. Dźěći su daloko preč a wón čuje so deprimowany, 94lětny skoržeše. Na to so třo policisća k njemu podachu. Starc powědaše anekdoty wo swojich wójnskich dožiwjenjach a wopyt carabinierijow z widejowym telefonatom znatym hordźe prezentowaše.
To a tamne (28.12.20)
Pilneho „hodowneho palčika“ su policisća w braniborskim Werderu nad Habolu patoržicu wječor wustróžili. Wobydlerka bě zastojnikow alarmowała, dokelž bě w parkowacym transporteru elektriski šrubowak słyšała. Tukajo na padustwo chwatachu zastojnicy k městnu a nańdźechu w awće 27lětneho, kiž w poslednim wokomiku dary za swójbu pasleše. Zasadźenje skónči so z posměwkom.
Dźesaćlětny hólc je prěni dźeń hód z awtom přiwuzneho po Rotterdamje jězdźił, doniž jeho policist njezadźerža. Zastojnikej bě mały šofer napadnył, kotrehož hłowa lědma nad wodźidło sahaše. Wobsedźer awta na pódlanskim sedle rozłoži, zo je hólc přez hody z Rumunskeje přijěł. Dokelž hižo derje z awtom jědźe, bě wón dźěsću jězbu po měsće popřał. Policija piše, zo so „ničemu wjace njedźiwa“ a zo płaći akcija wobsedźerja 280 eurow.
To a tamne (23.12.20)
Spěwace a rejwace rjadniske sotry w Francoskej zbudźeja w interneće wjele kedźbnosće. Pod hesłom „Zhromadnje hač do kónca“ su mały musical zhotowili, z kotrymž zběraja pjenjezy za sobusotru, kotraž chce klóšter w Semur-en-Brionnaisu ze starobnych přičin wopušćić. Z pjenjezami chcedźa klóšter na juhu kraja wotpowědnje přetwarić, zo móhła sotra dale w nim bydlić.
Rujacy jeleń je w Bayerskej zasadźenje policije zawinował. Žona w allgäuskim Günzachu bě policiju informowała, dokelž bě w lěsu někoho wo pomoc wołać słyšała. Na to pósłachu wjetšu ličbu policistow a helikopter ze specialnej kameru, zo bychu lěs přeslědźili. Dwě hodźinje pozdźišo akciju skónčichu. Helikopter bě jenož slědy jelenja wuhladał. Po dorěči z hajnikami su sej nětko wěsći, zo bě rujacy jeleń „z wulkej wěstosću“ na akciji wina.
