To a tamne (03.11.21)
Slepy pasažěr ma nowe doma pola policista. Hižo srjedź septembra policija wo njewšědnej namakance rozprawješe: kočatko je so pod motorowej hawbu awta schowało, a to najskerje hižo 100 kilometrow dołho. Kaž mějićelka awta zdźěli, je hižo dźeń do jězby dwě dalšej młodej kóčce wuswobodźiła. Třeća je so derje schowała. Dokelž pytaše policist tak a tak kóčku, wona jenož skrótka w zwěrjatowni přebywaše a potom pola njeho zaćahny.
Mortweju po padnjenju w koncertowym domje w Uppsala nadeńdźechu po rozprawach wjacorych šwedskich medijow. Kaž tute zdźělichu, je wosoba z wysokosće do směra zachoda padnyła abo skočiła a při tym na druhich padnyła a zemrěła. Dalša wosoba tohorunja zemrě a jedna so zrani. Pozadki pada běchu hač do wutory wječora hišće njeznate. Wječor planowany koncert so wotpraji.
To a tamne (02.11.21)
Něhdźe dwaj metraj dołhej hadaj je swójba w awstralskim zwjazkowym staće Queensland w swojej klimowej připrawje wuhladała. Přiwołany fachowc za hady měješe swoju lubu nuzu jednoho wuža (Natter) wućahnyć. Tamny so přez dźěru w sćěnje zminy. Nětko chcedźa dźěru zamazać. Popadnjeneho hada dowjezechu do zwěrjatownje.
Młody mórski mjedwjedź wosrjedź dróhi je w USA njedaloko San Francisca zasadźenje policije zawinował. Šoferojo awtow běchu zastojnikow wołali, po tym zo běchu spodźiwneho pěška wuhladali. Bjezmała bychu do zwěrjeća zrazyli. Wobrazy pokazuja zwěrjo pod dohladom policije na kromje dróhi. Mjedwjedźa su mjeztym do stacije mórskich zwěrjatow k wobkedźbowanju dowjezli. Kak je so młody ćuleń do ciwilizowaneje kónčiny zabłudźić móhł, njewědźa.
To a tamne (01.11.21)
Drogi město paduchow namakała je policija w rudnohórskim Neuhausenje. Muž bě zastojnikow wołał, dokelž tukaše na paduchow w swojim domje. Jako so policisća po domje rozhladowachu, namakachu tři plantaže hašiša a hižo předźěłane drogi. Nimo toho zwěsćichu, zo předleži wukaz zajeća přećiwo njemu, dokelž njebě pokutu zapłaćił. 44lětneho dowjezechu do jastwa.
600 eurow za šalku kofeja je sej pinčnik w Budapesće wot němskeho turista žadał. Jako so turist spjećowaše, sumu zapłaćić, jemu mějićel hosćenca a pinčnik z policiju hrožeštaj. Ta wšak njeda so dołho prosyć a wobeju hosćencarjow zaja. Stajnje zaso turisća na horendne płaćizny skorža, čehoždla madźarska policija w tymle směrje zaměrnje přepytuje. Zajataj mataj dwaj hosćencaj w Budapesće, jedyn na sławnej dróze Vaci utca.
To a tamne (29.10.21)
Samlutki z měšćanskej železnicu po puću był je dakl w Mnichowje. Pos steješe w Grafingu pola Mnichowa sam na nastupišću a zalěze do ćaha, kiž jědźeše do směra na nutřkowne město. Pasažěram dakl napadny. Woni zawołachu policiju. Zastojnicy psa z picu zastarachu. Kaž so wukopa, bě sej 49lětny wobsedźer w ćahu wusnył. Tuž bě psyk sam z ćaha wustupił a z druhim dale jěł. Po dlěšim pytanju muž psa pola policije namaka.
Z pomocu interneta dźěćo porodźiła je 17lětna młodostna w Indiskej, po tym zo bě sej pola Youtube informaciski widejo wobhladała. Samodruhosć bě před staršimaj zatajić móhła. Wonaj zhoništaj wo wnučku hakle, jako słyšachu ze stwy dźowki žałosćenje ćěšenka. Policija je mjeztym 21lětneho nana dźěsća zajała, dokelž měješe seks z njepołnolětnej, štož je w Indiskej zakazane.
To a tamne (28.10.21)
Mjerzanje z policiju ma šofer wosoboweho awta, kiž je ze skóncowanej wobruču prosće dale jěł. Policija jeho w porynsko-pfalcowskim Frankensteinje zadźerža, dokelž jědźeše jenož hišće na zwjenje, a to k tomu dosć spěšnje. Zastojnikam muž rozłoži, zo nima narunanske koleso a tež žane pjenjezy za wotwlečenje. Policisća sćazachu na to klučiki awta. Te smě sej 72lětny wotewzać, po tym zo je skóncowane koleso wuměnił.
Před měsacomaj narodźena amurska leopardka w Lipšćanskim zwěrjencu rěka wotnětka Manju. Hladarjo zwěrjenca běchu so jednohłósnje za mjeno rozsudźili, kotrež woznamjenja „słódka“. Młoda kóčka je po wšej Europje prěnja narodźena amurska leopardka tutoho lěta, zwěrjenc zdźěla. Manju je stajnje zaso z maćerju po puću. Bórze móža ju wopytowarjo tež pod hołym njebjom wobdźiwać.
To a tamne (27.10.21)
Po nanuzowanej přestawce koronapandemije dla je wčera zaso 200 wobdźělnikow legendarny napřemoběh po 1 576 schodźenkach New Yorkskeho Empire State Buildinga přewjesć móhło. Najspěšniši bě Wai Ching Soh z Malaysije, kiž bě po 10 mjeńšinach a 46 sekundach w cilu. Lěta 2019 bě wón hišće na druhim městnje był. Najspěšniša žona bě Cinda Harris z USA, kotraž po 14 mjeńšinach a jednej sekundźe cyle horjeka doběža.
Roboter „Bella“ wot najnowšeho wopytowarjow hosćenca w schleswigsko-holsteinskim Grömitzu při Baltiskim morju posłužuje. Z njewšědnym pomocnikom chce hosćencar Tim Bornewasser problemy pobrachowaceho personala dla rozrisać. Rěčaca mašina nima pak čłowjeski serwis narunać. Wona pak móže jědźe a napoje přiwjezć. Skazanki přiwzaja dale čłowjescy kolegojo „Belle“.
To a tamne (26.10.21)
Z hajzlowej papjeru a kórkowymi škleńcami je překlepana rentnarka we Würzburgu wobšudnikow zjebała. Tući běchu ju zazwonili a sej pjenjezy žadali, dokelž je jeje dźowka pječa ćežke wobchadne njezbožo zawinowała. Žona pak scyła žanu dźowku nima. Najebać to wona přilubi, zo přepoda pjenjezy a debjenki. W tobole, kotraž wona kurěrej přepoda, pak běchu jenož papjera a škleńcy. Mjeztym informowana policija podhladneju w starobje 15 a 22 lět zaja.
Wobsadkam dźewjeć policajskich awtow je so wčera poradźiło, ćeknjeneho młodeho byka popadnyć. Zwěrjo bě w nocy njedaloko badensko-württembergskeho Lörracha po puću a měrješe so na awtodróhu 98, kotruž dyrbjachu tohodla nachwilnje zawrěć. Zhromadnje z wobsedźerjom, hajnikom a pomocnikami móžachu 300 kilo ćežkeho byka popadnyć.
To a tamne (25.10.21)
Hižo poł hodźiny po kradnjenju awta je policija w sewjerorynsko-westfalskim Bestwigu wobsedźerjej wóz zaso wróćić móhła. Zastojnicy wuhladachu awto na zwjazkowej dróze 480, po tym zo bě jich centrala wo kradnjenym awće informowała. Šofer spyta ćeknyć, dyrbješe pak po krótkej honjeńcy bjezwuhladnosć dowidźeć. 58lětneho zajachu. Wón dyrbi so padustwa, smalenja a jězdźenja bjez jězbneje dowolnosće dla zamołwić.
„Frizerskeho termina dla“ je šoferka wosoboweho awta městno njezboža w Regensburgu wopušćiła, bjez toho zo by so wo zranjenu wužiwarku rolera starała. 31lětna bě při zaparkowanju za njej jěducy roler přewidźała a by 21lětnu žonu bjezmała přejěła, kotraž bě při borzdźenju padnyła. Na to 31lětna z přispomnjenjom, zo dyrbi k frizerej, wotjědźe. Wona dyrbi nětko ze skóržbu ćeknjenja po njezbožu dla ličić.
To a tamne (22.10.21)
Hejata kóčka je w Sewjerorynsko-westfalskej zasadźenje wohnjoweje wobory zawiniła. Wobydlerjo domu w Grevenbroichu běchu jim njeznate zwěrjo w sušaku wuhladali. Dokelž so wone raznje wobaraše, njewědźachu sej hižo pomhać a wołachu wohnjowu woboru. Tola tež wobornicy mějachu swoju nuzu, byrnjež přez rukajcy škitani byli. Skónčnje sušak powalichu a chětro agresiwnu kóčku do sudobja tyknychu. Wzachu ju sobu a přepodachu ju porjadowemu zarjadej.
Z třomi promilemi alkohola w kreji je muž w sewjerorynsko-westfalskim Hagenje k awtowemu domej přijěł, zo by so za luksusowym wozom wobhonił. Předawarjej „chorhojčka“ muža hnydom napadny. Přiwołani policisća naměrichu tři promile a namakachu w awće prózdnu blešu wina. Muž drje prěješe, zo bě z awtom jěł, natočene wideojo pak to dopokaza.
To a tamne (21.10.21)
Policistam swoje hrajki pokazać chcył je štyrilětny hólc w Nowoseelandskej a je za to nuzowe čisło 111 wolił. Słužbu wukonjacy zastojnik bě hnuty a so k hólčkej domoj nastaji. Po tym zo bě sej hrajki wobhladał a pachołkej policajske awto z módrej swěcu předstajił, pak wón pjerachej a jeho staršimaj w „pedagogiskej rozmołwje“ rozłoži, zo je nuzowe čisło 111 jeno za nuzowe pady myslene.
Na wšě 159 000 eurow wunjesł je 505 kilogramow ćežki, jědnaće měsacow stary byk při přesadźowanju skotu w hornjobayerskim Weilheimje. Je to druha najwyša suma, kotruž su hdy w Němskej a Awstriskej za byka płaćili. Kupiło je jeho sewjerošwabske nasymjenjenske towarstwo w nadźiji, zo so inwesticija ze symjenjom byka Senatora zaso wupłaći. Toho geny lubja po dotalnym přepytowanju „strowe a płódne potomnistwo“.
