To a tamne (03.08.20)
Z wohenjom w železnej škli wo ruku młodeje žony prosył je w porynsko-pfalcskim Neustadće muž a zawini tak zasadźenje wohnjoweje wobory. Swědcy na to wohnjowu woboru informowachu. Jako wobornicy přijědźechu, woni płomjenja hnydom zhašachu a powučichu porik, zo je woheń tuchwilneje suchoty dla wokomiknje wosebje strašny.
Wot błyskača dospołnje nastróžany je 26lětny wodźer wosoboweho awta do njeho zajěł. Nětko dóstanje nimo chłostanki tež hišće zličbowanku wjacorych dźesaćtysac eurow za skóncowany błyskač do domu. Prawdźepodobnje bě so šofer błyska dla tak nastróžił, zo je wodźidło wokoło storhnył a do błyskača zrazył. Alkohol abo drogi pola njeho zwěsćili njejsu.
To a tamne (31.07.20)
Do akwarija w coowje awstralskeho Sydneyja zalězł je 30lětny muž – a ma nětko mjerzanje ze sudnistwom. Přećeljo muža běchu zwažliwu akciju filmowali a w interneće wozjewili. Na wideju je widźeć, kak 30lětny w spódnich cholowach do basenka lěze a mjez mjeńšimi rybami wokoło płuwa. Policija wumjetuje jemu ranjace zadźerženje a mylenje wotběhow w zwěrjencu. Za 17. september su jeho tuž na sudnistwo skazali.
Z 250 km/h před policiju ćěkał je paduch awtow na A 2 pola Braunschweiga. Do toho bě so wón policajskej kontroli wuwinył. Na ćěkańcy jědźeše chětro riskantnje a přesćěhowaše awta zdźěla na nuzowej čarje. Po 50 kilometrach wotjědźe z awtodróhi, wotstaji awto a ćekny. Zastojnicy lepichu muža krótko na to w kerčinje a jeho zajachu.
To a tamne (30.07.20)
Zastanišćo železnicy přewidźał bě lokomotiwnik intercity-ćaha pola Bonna a je prosće dale jěł. Pasažěrojo, kotřiž chcychu tam wulězć, móžachu IC hakle na přichodnym dwórnišću w Koblenzu wopušćić. Dokelž na železniskej čarje mjez Kölnom a Bonnom runje twarja, měješe ćah město hłowneho dwórnišća tuž w Bonnje-Beuelu zastać. To pak bě lokomotiwnik přewidźał. Železnica je so za misnjenje mjeztym zamołwiła.
Pozdatneje miny w pincy domu we Wurzenje dla dyrbjachu wjaceswójbny dom ewakuować. 31lětny wobydler bě po někotrych lětach prěni króć zaso do pincy pohladał a tam pozdatnu rozbuchlinu wuhladał. Po tym zo běchu cyły dom rumowali, přijědźe wosebita słužba k wotstronjenju bojowych srědkow, zo by swoje dźěło wukonjała. Spěšnje pak móžeše wšitkich změrować: Pozdatna mina njebě ničo hinaše hač stara pomazkowa tyza.
To a tamne (29.07.20)
Swój lóšt na burger a pomfritki změja třo Awstralčenjo nětko chětro droho zapłaćić. Policija je jich lepiła, jako běchu za čas koronapandemije najebać razny zakaz, dom wopušćić, w zwjazkowym staće Victoria k hosćencej McDonald‘s po puću. Napołožili su młodostnym nětko pokutu 5 000 awstralskich dolarow. Při kontroli awta dyrbješe policija zwěsćić, zo so přećeljo priwatnje zetkachu, byrnjež kóždy něhdźe druhdźe bydlił.
Hoberski kruh w žitnišću w hornjobayerskim Pählu dźeń a wjace ludźi přiwabja. Štó bě kruh z akuratnymi formami a symetrijemi stworił, dotal njewědźa. Ratar, kiž polo wobhospodarja, je so mjeztym z tym wotnamakał, zo drje tam lětsa ničo žnjeć njebudźe. Na samsnym polu nańdźechu lěta 2007 hižo raz tajku wuměłsku twórbu, kotruž maja někotři za produkt zwonkazemskich.
To a tamne (28.07.20)
Wusnjeny paduch je policistam dźěło wolóžił – dyrbjachu jeho jenož hišće wubudźić. 39lětny zadobywar je sej w Göttingenskim bydlenju wusnył, do kotrehož bě so namócnje zadobył. 29lětny wobydler jeho při nawróće sobotu rano spjaceho wuhlada, zamkny bydlenje a zawoła policiju. Čehodla bě sej muž při pytanju za rubiznu wusnył a hač bě wopity, policija bohužel njepřeradźi.
Hnydom dwójce je šofer transportera wčera w Sankt Egidienje w Zwickauskim wokrjesu spytał pjany z awtom jěć. Mandźelskemu porikej bě chabłacy 59lětny při tankowni napadnył. Žona móžeše jemu klučiki wotewzać, doniž policija njepřijědźe. Ta naměri w jeho kreji 3,3 promile alkohola. Něšto hodźin pozdźišo su zastojnikow wospjet wołali, dokelž chcyše muž dale jěć. Nowy test wunjese přeco hišće 1,6 promilow.
To a tamne (27.07.20)
Paduchow wo pomoc prosył je farar w nižozemskim Schinnenje pola Maastrichta, po tym zo bě zamk tabernakla zaprajił. Wjacori zamkarjo běchu podarmo spytali trezor, w kotrymž su keluchi a woblatka, bjez škody wotewrěć. „Kotry paduch ma nazhonjenje při wotewrjenju pjenježneho kamora?“, farar twitterowaše. „Alarmowu připrawu hasnjemy. Město policije syda kofej a tykanc.“ Dotal njeje so hišće žadyn „zajimc“ přizjewił.
5 000 dolarow za pokradnjeneho barika aposkića Hollywoodski dźiwadźelnik Ryan Reynolds. Žona z kanadiskeho Vancouvera je so w telewizy wuskoržiła, zo bě jej něchtó małeho barika pokradnył. Reynolds, kiž tohorunja z Vancouvera pochadźa, zahaji na to z dalšimi prominentnymi akciju. Wosebitosć barika je ta: W nim je rekorder z hłosom mjeztym zemrěteje maćerje žony.
To a tamne (24.07.20)
13 historiskich a drohotnych sudobjow z antikskeho Roma su zastojnicy španiskeje wobswětoškitneje jednotki w małym rybjacym wobchodźe w pobrjóžnej gmejnje Santa Pola na wuchodźe kraja našli. Amfory pochadźeja po prěnich trochowanjach z prěnjeho lětstotka a stejachu we wobchodźe jako dekoracija. Syn wobchodnika twjerdźi, zo je mjeztym sćazane amfory při nurjenju w morju našoł.
Ćěło serijoweho mordarja Si Quey su w Thailandskej 60 lět po jeho smjerći spalili. Žałbowane powostanki ležachu donětka w škleńčanym kašćiku najwjetšeje chorownje w Bangkoku. Wjace hač 10 000 ludźi bě z peticiju žadało mumiju wotstronić. Muža, kiž bě šěsć dźěći morił, běchu 1959 w starobje 32 lět zasudźili a zatřělili. Jeho mjeno je wšěm znate: Starši hišće dźensa dźěćom praja: Njechodź won hdyž je ćma, hewak hrabnje će Si Quey!
To a tamne (23.07.20)
Prěni na přirodne wašnje spłodźeny panda je so w Južnej Koreji narodźił. Žónski panda-baby je póndźelu we wólnočasnym parku Everland na swět přišoł a waži runje 197 gramow. Dorost njeje pola pandamjedwjedźow samozrozumliwy. Žónki su jeničce tři dny wob lěto płódne. Sydomlětna Ai Bao bu w měrcu nošna, po tym zo bě so spłodźenje z dwě lěće staršim pandu Le Bao radźiło.
Swětowa mišterka w płuwanju Franziska van Almsick dźensa hižo rady do wody njeńdźe. „Sym mjeztym skerje bojazliwa“, 42lětna nowinarjam wuzna. W swójbje je stajnje poslednja, kotraž do basenka dźe. Swój bywši wšědny dźeń móže sej mać dweju synow lědma hišće předstajić, jako bě rano w sedmich do wody skočiła a sydom kilometrow płuwała. Berlinjanka je 43 medaljow dobyła a šěsć swětowych rekordow nastajiła.
To a tamne (22.07.20)
1 500 prózdnych piwowych kašćikow je njedaloko Dortmunda na awtodróhu spadało. Šofer nakładneho awta je tak wšitko zhubił, štož měješe na připowěšaku. Sobudźěłaćerjo nadróžneje słužby trjebachu hodźiny, zawrjenu awtodróhu zaso wurjedźić. Kašćiki běchu w křiwicy na jězdnju spadali, jako chcyše šofer na hinašu awtodróhu zajěć. Policija pruwuje, hač njeběchu wone prawje přiwjazane, abo hač bě Lkw přespěšny.
Swójba kołpjow je wčera rano powołanski wobchad na awtodróze A 5 pola hessenskeho Bensheima nimale dospołnje zlemiła. Staršej ze swojimi pjeć młodźatami běštej so wokoło šesćich na A 5 zabłudźiłoj. Šoferojo zwěrjata na zbožo w prawym času wuhladachu a je ze swojimi awtami wobkružichu. Wohnjowi wobornicy natwarichu z rěblow wobhrodźenje a wodźachu kołpje k bliskemu jězorej.
To a tamne (21.07.20)
Njewšědnje wulki swětły pos je na awtodróze w Moersu njedaloko Duisburga wjele kedźbnosće zbudźił. Jako „tak wulke kaž pony“ wopisane zwěrjo bě so zabłudźiło a běhaše na kromje awtodróhi, doniž zmužity šofer turkowskeho pastyrskeho psa rasy kangal njezadźerža. Při akciji so nichtó njezrani. Policisća wučerpaneho psa zastarachu, po tym zo běchu z nim na policajsku stražu doběželi. Wšako bě tón za transport w policajskim awće přehoberski. Krótko na to so wobsedźer přizjewi. Kangal móže hač do nimale 90 centimetrow wulki narosć.
Zo by sej po swój zabyty mobilny telefon přišoł, je so zadobywar we Warendorfje pola Münstera k městnu njeskutka wróćił. Tam bě jeho wobydler bydlenja při kradnjenju překwapił. Jako so wobaj znowa zetkaštaj, so paduch pola muža zamołwi a so na to zminy.
