To a tamne (19.11.20)
130 kokosowych worjechow w běhu 60 sekundow jeno z ruku rozbił je Hamburgčan Muhamed „hamorowa ruka“ Kahrimanović a je tak nowy swětowy rekord nastajił. Po informacijach Němskeho rekordneho instituta w Hamburgu by poprawom 124 worjechow za nowy rekord dosahało. W bojowej šuli, hdźež 61lětny Kahrimanović trenuje, běchu sudnicy 151 worjechow spřihotowali. Zamołwity sudnik spočatnje dwělowaše, hač je móžno dwaj worjechaj na sekundu pačić. Dotalny rekord 123 rozpačenych worjechow je tež wot Kahrimanovića.
W lětadle dźěćo porodźiła je młoda žona w Indoneskej. 50 mjeńšin po wotlěće w měsće Sentani běchu so hrona započeli, rěčnik lětanskeho předewzaća Lion Air zdźěli. Mašina bě po puću na kupu Sulawesi. Mjez pasažěrami přitomny lěkar žonje při porodźe pomhaše. Pilot na přichodnym lětanišću přizemi.
To a tamne (17.11.20)
Při wuchodźowanju z psom je so žona njedźelu w lěsu pola bayerskeho Coburga zabłudźiła. Wona zamó policiju hišće wo tym informować, zo je w błóće tčacy wostała. Na to pak njebě hižo docpějomna. Po wulkej pytanskej akciji nańdźechu zastojnicy žonu hač do brjucha stejacu w błóće wotpušćeneho hata a móžachu ju na zbožo wuchować. Swoju słužbnu drastu wšak po tym hižo wužiwać njemóžachu.
Widejo z mrowjemi, kotrež kaž dźiwje wokoło mobilneho telefona běhaja, je na Facebooku wjele kedźbnosće wubudźił, a to pod hesłom „Widejo pokazuje wjace hač kóždažkuli studija“. Zamóža elektromagnetiske pruhi handyja mrowje tak wobwliwować, zo so w kruhu pohibuja? Po analyzy wideja fachowcy měnja, zo jedna so wo manipulaciju. Tak je filmčk po wšěm zdaću na kompjuteru nastał.
To a tamne (16.11.20)
Kradnjenej čisłowej tafličce swojeho awta wuhladał je muž, jako so wčera po Wolfsburgu wuchodźowaše. Přiwołana policija cuze awto přesćěhowaše a skónčnje zadźerža. Kaž so wukopa, njeběštej jenož tafličce pokradnjenej, ale tež awto, w kotrymž třo mužojo sedźachu. Policija wšitkich zaja. Šofer njeměješe ani jězbnu dowolnosć a steješe nimo toho pod wliwom alkohola a drogow.
Wosrjedź puća sedźacy kołp je njedaloko porynsko-pfalcskeho Bad Kreuznacha wobchad na zwjazkowej dróze B 41 nachwilnje haćił. Wobsadka policajskeho awta spyta podarmo jeho z jězdnje zehnać a dyrbješe tuž pomoc kolegow přiwołać, kotřiž dróhu na to do wobeju směrow zawrěchu. Dokelž dobre přirěčowanje njepomhaše, kołpja skónčnje wotnjesechu. Ptak wšak so chětro wobaraše a do zastojnikow kusaše.
To a tamne (13.11.20)
Nakupowanskej wozyčkaj połnej čriji su swědcy na dwórnišću badensko-württembergskeho Klettgauwa našli. Jedna so wo cyłkownje 129 nowych čriji, a to nic w porach, ale jednotliwych. Na někotrych wisachu hišće płaćiznowe taflički. Policija z toho wuchadźa, zo jedna so wo rubiznu. Što pak pakostnicy ze 129 jednotliwymi črijemi chcychu, je wulke prašenje.
Dweju paduchow w kamorje cyrkwje našli su policisća w sewjerorynsko-westfalskim Krefeldźe. Swědk bě podhladny šćerkot słyšał a widźał, kak mužej žonje před Božim domom złoćany předmjet přepodaštaj. Přiwołani policisća móžachu 37lětneju paduchow hišće w cyrkwi zajeć, byrnjež so w kamorje schowałoj. Wobaj staj hižo podobnych njeskutkow dla wospjet zasudźenaj byłoj. Před cyrkwju čakaše 34lětna žona w awće. Jedne z woknow Božeho domu bě rozbite.
To a tamne (12.11.20)
„Tule rěči wótc Francesco!“, takle je so bamž Franciskus telefonisce pola jednoho z Kölnskich fararjow přizjewił. Duchowny Regamy Thillianathan sej spočatnje mysleše, zo jeho mać zwoni, jako na konferency mobilny telefon klinkaše. Přizjewił pak bě so bamž cyrkwje. „Swjaty wótc měješe zbožo, zo sym scyła wotzběhnył.“ Franciskus poćahowaše so na list, kotryž bě jemu duchowny tydźenja na awdiency přepodał.
Smjertnje skónčiła je so za kruwu w Delnjej Frankskej ćěkańca před rěznikom. Wona bě před rězarnju z připowěšaka twochnyła, běhaše po zahrodach, přeprěči rěku a běžeše přez železniske kolije. Před šulu móžachu ju skónčnje popadnyć. Dokelž steješe masiwnje pod stresom a dokelž hrožeše strach za wobydlerjow, so policisća po dorěčenju z rězarnju rozsudźichu kruwu zatřělić.
To a tamne (11.11.20)
Paducha žonjacych spódnich cholowčkow je policija w bayerskim Hofje lepiła. 29lětny měješe dźesatki slipow w swojim bydlenju nakopjene. Spočatk oktobra bě wón prěni króć cholowčki ze sušaka kradnył, bórze na to dalše. Pola 29lětneho namakachu zastojnicy 54 slipow w hódnoće wjacorych stow eurow. Nětko pytaja jich wobsedźerki, dokelž njemóžachu dotal wšitke přirjadować.
Do zadka kusnył je policajski pos paducha, kiž ze swojej rubiznu w hódnoće wjacorych stow eurow po nutřkownym měsće poruhrskeho Essena ćěkaše. 21lětny bě wěcy w kupnicy kradnył. Dokelž muž na namołwu policistow, zo ma zastać, njereagowaše, pósłachu pastyrskeho psa Teddyja za ćěkacym. Zranjenja pakostnika na ruce, nohomaj a zadku su po „wuspěšnym zasadźenju“ w chorowni zastarali.
To a tamne (10.11.20)
Kurioznu, lěta trajacu zwadu wo worštowane drjewo na zahrodźe Podstupimskeho Kupoweho hotela su na dosć jednore wašnje rozrisali: Stapl drjewa nětko wo 20 metrow přestorča. Tak njesteji hižo dlěje na škitanym pasmje połkupy Hermannswerder, kaž město informuje. Zwada bě po wšej Němskej kedźbnosć zbudźiła: Město bě lěta 2016 drjewo jako twarski objekt wobhladowało, za kotryž by hotel twarsku dowolnosć trjebał a kiž dyrbjał tohodla zwottorhać.
Prezident USA Donald Trump njesteji w Londonskim kabineće wóskowych figurow hižo jako statnik w čornym wobleku z čerwjenym krawatu, ale jako hrajer golfa w pisanej drasće a z pochmurjenym mjezwočom. Wón ma nětko wjace chwile so swojemu najlubšemu sportej wěnować, muzej pisa.
To a tamne (09.11.20)
Prěni króć digitalnje zahajić chcedźa lětušu sezonu karnewalistow koronapandemije dla. Zajutřišim, 11. nowembra, w 11.11 hodź chce Zwjazk karnewalistow Němskeje sezonu oficialnje startować. „Chcemy w tym času najebać wirus prezentni być a ludźom wjeselo do bydlenjow přinjesć“, zwjazk informuje. Internetny livestream poskići potom hudźbne wideja a postrowy politikarjow.
Črjopy a hotowy chaos zawostajiła je šoferka awta sobotu w Bramsche w Osnabrückskim wokrjesu, po tym zo bě pedalej za płun a borzdźenje zaměniła. 53lětna zrazy z wotmachom do wukładneho wokna paslenskeho wobchoda, hdźež je tak wjacore regale z dekoraciskim materialom spowalała. Ani žona ani sobu jěducy wnučk so njezraništaj. Parkowanišćo wona poprawom znaje: W domje, do kotrehož bě zrazyła, dźě sama bydli.
To a tamne (06.11.20)
Třilětneho hólca na zastanišću wuhladał je busowy šofer w badensko-württembergskim Ludwigsburgu. Jenož nócny woblek zdrasćeny bě hólčk z bydlenja maćerje ćeknył. Šofer sadźi jeho do busa a zawoła policiju. Bórze na to přizjewi so tam starosćiwa mać, kotraž rjekny, zo drje bě jeje synk prjedy hač hewak wotućił a so skradźu zminył. Krótko na to móžeše wona jeho na straži wotewzać. Tak dołho běchu zastojnicy třilětneho z čajom a šokolodu zastarali.
Kuriozny kónc to pytanskeje akcije policije w Kölnje za zhubjenym awtom: Pytali su swědkow, kotřiž bychu něšto k „pokradnjenemu Citroënej 2CV“ rjec móhli. Rozrisanje přińdźe spěšnišo hač myslene: Susod bě parkowace awto „z ciwilnoprawniskich přičin“ wot priwatneje słužby wotwlec dał. Kak staj so susodaj skónčnje dojednałoj, njeje znate.
To a tamne (05.11.20)
Hobersku nopawu su pěstowarske dźěći w Danskej njedaloko němskeje mjezy našli. Tole dokumentuja wobrazy, kotrež je přirodoškitny centrum Tønnisgård w interneće wozjewił. Při tym jedna so wo eksotiske zwěrjo, kotrež bě wichor na přibrjóh připławił. Po wozjewjenych fotach je mortwa nopawa něhdźe dwaj metraj wulka. Dźěći běchu ju při přechodźowanju namakali a zhromadnje z kubłarkami přirodny centrum informowali.
Samlutki k Baltiskemu morju jěć chcył je sydomlětny hólc z Macherna pola Lipska. Za jězbu bě sej samo hižo jězdźenku kupił. W ćahu pak napadny žonje, kotraž policiju informowaše. Zastojnicy zalězechu w Lipsku do ćaha a pućowace dźěćo namakachu. Woni wzachu pachoła sobu na stražu, hdźež jeho přewšo zbožowny nan wotewza. Čehodla bě hólčec ćeknył, njeje znate.
