Tři wagony sławneje Wuppertalskeje powjaznicy chcychu dźensa rozdarić. W běhu dnja měješe so wozjewić, štó smě 24 metrow dołhe wagony přichodnje wužiwać. Ludźo běchu přizjewili, zo chcyli wozy na kofejownju, rjadownisku rumnosć abo tribunu na sportnišću přetwarić. Wuppertalski měšćanski zawod chce 40 lět staru železnicu, kotraž wšědnje hač do 80 000 ludźi wozy, zešrotować a z nowymi wozami narunać.

Winowu princesnu wobkradnyli su w bayerskim Randersackeru njedaloko Würzburga. Njeznaći běchu so kónc tydźenja w Mnichowje do transportera zadobyli, z kotrymž bě princesna po puću. Nimo pjenjez a wupokazow pokradnychu z njeho tež wudebjenu pozłoćanu krónu, kotruž smě princesna na oficialnych zarjadowanjach nosyć. Winowa princesna Klara Zehnder, hakle wot septembra w zastojnstwje, je „šokowana“.

Awto abo dowolowu jězbu dobyć móže kóždy, kiž wobchadne přeńdźenja w in­diskej stolicy New Delhiju fotografuje a wobrazy policiji přewostaji. Wotpowědnu namołwu je policija we wjacorych wulkich nowinach wozjewiła. Wona zajimuje so za šoferow, kotřiž čerwjenu amplu ignoruja, wopačnu jězdnju wužiwaja, z třomi wosobami na motorskim sedźa abo na chódniku parkuja. Wobchad w New Delhiju ze 17 milionami wobydlerjow je ekstremnje chaotiski.

Z kradnjenym awtom, bjez jězbneje dowolnosće a z dosć alkoholom w kreji je muž policistam do pasli zajěł. W Bad Oeynhausenje su jeho zadźerželi, dokelž bě přespěšny. Při kontroli napadny jim alkoholowa­ chorhojčka. Zastojnicy zwěsćichu, zo bu awto před dnjemi pokradnjene, čisłowej tafličce hižo w měrcu.­ Alkomat­ pokazowaše dwaj promilej. Tež jězbnu dowolnosć 41lětny njeměješe.

Happyend za małeho psa: Před pjeć lětami w bayerskim Schlüsselfeldźe ćeknjeny chihuahua Charly je zaso pola swojeho wobsedźerja. Kedźbliwa pěška bě wosamoćeneho psyčka widźała a ke skótnemu lěkarjej donjesła. Na zakładźe chipa wón spěšnje zwěsći, komu Charly­ słuša. Wočiwidnje běchu ludźo Charlyja derje picowali, dokelž je přećežki. „Wón je hłuchi a nimale slepy, ale strowy. Najwjetši hodowny dar nam je, zo jeho zaso mamy“, swójba w interneće piše.

Powětrowy balon je wčera Madridsku podzemsku železnicu w rańšim powołanskim wobchadźe cyłu hodźinu zlemił. Z heliumom pjelnjeny balon z metalowym poćehnjenjom bě hólcej z ruki zjěł a so milinowoda dótknył. Na to so wjacore kable přepalichu a zawinowachu krótkospjeće.

Zbytk tykanca, wot kotrehož bě awstriska kejžorka Elisabeth (1854–1898) před 118 lětami woptała, su krajnemu muzejej za turizm­ w italskim Meranje přepo­dali. „Sisi“ bě 1897 na wopyće hojenskeho města Meran njejapcy do hosćenca zastupiła. Wot poskićeneho tykanca da sej jeno skibku serwěrować. Zbytk sej swójba wobchowa­ a wot generacije ke generaciji jako wosebitu drohoćinku dale dawaše. Nětko přewostaji jón swójba muzejej.

Dźiwje zachadźaca kruwa, kotraž bě so w septembru 2014 z Mnichowskeje rězarnje wudobyła, budźe pad za sudnistwo. Kruwa bě na ćěkańcy młodu žonu zraniła, kotraž­ po lěsu joggowaše. Policija dyrbješe skoćo zatřělić, kotrež bě hač na łuku ćeknyło, hdźež hižo stany za oktoberski swjedźeń twarjachu. Wobsedźer kruwy wšak so dotal spjećuje, 500 eurow za zasadźenje policije zapłaćić.