To a tamne (26.10.15)
Sprócna třilětna z južneje Pfalcy je so tak derje schowała, zo dyrbješe policija přijěć. Holčka bě so minjeny pjatk njejapcy zhubiła, jako nan na hornim poschodźe domu lampu přišrubowa. Na to wón podarmo w domje a na dworje za dźěsćom pytaše a skónčnje policiju zawoła. Ta zhromadnje z nanom dom hišće raz za třilětnej přepyta a ju skónčnje we wulkim přećahowanskim kartonje spicy nańdźe. Prawdźepodobnje chcyše so holčka schować a je sej při tym wusnyła. Hru chowanja pak doby policija.
Při spěšnosći 100 km/h stej psaj na awtodróze A 3 w Delnjej Bayerskej z małotransportera skočiłoj. Sobudźěłaćerjej towarstwa za zwěrinoškit běštaj z nimaj po puću do zwěrjatownje, jako so psomaj poradźi zadnje durje wočinić a na awtodróhu twochnyć. Najebać wulku spěšnosć so wonej njezraništej. Šoferaj pak informowaštaj policiju, kotraž zwěrjeći spěšnje zaso popadny.
To a tamne (23.10.15)
Jako najmłódši blidotenisowy hrajer wšěch časow je dwanaćelětny Japančan Tomokazu Harimoto na blidotenisowych swětowych mišterstwach we Waršawje kónčne koło docpěł. Do toho bě wón něhdyšeho finalista Tana Ruiwuna z Chorwatskeje pobił. Nětko wočakuje małeho Japančana swětowy mišter Ma Long z Chiny. Harimoto bě jako dwulětny blidotenis hrać započał. Dźensa zwučuje wón dźewjeć hodźin wšědnje.
Kołp je w Hornjej Pfalcy poł hodźiny wobchad na awtodróze A 93 zlemił. Wot zastojnikow njeda so wuhnać, kaž policija dźensa zdźěli. Šoferojo běchu policiju informowali, zo kołp po dróze běha a tak wobchad haći. Po wjacorych njewuspěšnych pospytach so zastojnikej, kotryž je za swój dobry poměr k zwěrjatam znaty, poradźi, ptaka tola pohnuć, zo by wotlećał. Kołp doleća k bliskemu hatej.
To a tamne (22.10.15)
Něhdźe 800 000 eurow je domjaca pomocnica zhromadnje z dalšej žonu w juhozapadnej Francoskej rentnarjej pokradnyła, kiž bě pjenjezy w blachowych tyzach a nohajcach chował. Něhdyši sobudźěłaćer tankownje bě hižo w aprylu policiji zdźělił, zo su jeho cyłe žiwjenje dołho składowane nalutowanki pokradnjene. Na to policistam poměrnje luksuriozne žiwjenske wašnje rjedźerki a jeje přiwuzneje napadny. Dźěl pjenjez móžachu při zajeću žonow sćazać.
Čěskemu šoferej po 20 lětach pokradnjene awto wróća, byrnjež wjace wjele wjesela z nim njezměje. Amaterskaj nurjakaj běštaj jězdźidło, Škodowku 105 ze zadnim motorom, w bagerowym jězoru namakałoj, policija w Olomoucu zdźěli. Wohnjowa wobora 1995 pokradnjene awto z wody wućahny. Ručež su formality zrjadowane, awto mužej přepodadźa.
To a tamne (21.10.15)
Bjezmała w katastrofje skónčiła je so njeleposć muža na tankowni w USA. Při tankowanju wuhlada wón wulkeho pawka na swojim awće, na čož spyta jeho ze zapalakom morić. Hnydom steješe awto w płomjenjach. Přistajena tankownje re- agowaše a zawjertny bencinowy honač. Z pomocu hašaka móžeše šofer płomjenja podusyć. Přičina hłupeho zadźerženja bě, zo ma muž paniski strach před pawkami a podobnymi zwěrjatkami.
Njewšědny rozžohnowanski list je žona w jendźelskim Sheffieldźe swojemu njeswěrnemu mandźelskemu pisała. Na hoberskej wabjenskej plakatowej sćěnje direktnje při hłownej dróze, po kotrejž muž wšědnje na dźěło jězdźi, bě wona napis připrawić dała: „Mojemu njeswěrnemu mandźelskemu Paulej: Hdyž přińdźeš domoj, tam hižo njebudu. Daj sej puć na dźěło lubić. Lisa.“
To a tamne (20.10.15)
Nižozemscy wojacy z turbanom na hłowje su w pomjeznej kónčinje mjez Bayerskej a Hessenskej wulke zadźiwanje zbudźili. Na naprašowanje wobydlerjow wokrjesa Main-Kinzig rěčnik wójska wěc rozkładźe: Nižozemska jednotka so tuchwilu w Bayerskej na zasadźenje w Afghanistanje přihotuje. Zo bychu połoženje awtentisce napodobnili, mějachu někotři swojoraznu uniformu woblečenu a čapku na hłowje, kotrež su w Afghanistanje z wašnjom. Bayersko-hessensku mjezu drje su mylnje překročili.
25 rybam žiwjenje wuchowali su wohnjowi wobornicy w Düsseldorfje. Techniski defekt lampy bě woheń w bydlenju zawinił. Horcoty dla so na to škleńca akwarija pukny. Přichwatani wobornicy njezhašachu tuž jenož płomjenja ale přesadźichu tež wohrožene ryby do wanje w kupjeli, kaž nowiny rozprawjeja.
To a tamne (19.10.15)
Nadobo ptačka měli su policisća minjenu sobotu w bayerskim Coburgu. Pěšk bě jich informował, zo sedźi při puću sprócna pašturlica. Kožanej paskaj při nohomaj ptačka běštej jemu dopokaz, zo jedna so wo wukubłaneho ptaka. Policisća wzachu pašturlicu w słužbnym awće sobu, zo bychu ju wobsedźerjej přepodali. Ptak bě jemu před třomi tydźenjemi twochnył. „Nětko bě drje słaby, dokelž njeje zwučeny sam w přirodźe za picu pytać“, wobsedźer zdźěli.
Rekordne loterijowe dobyće 101 miliona eurow su zbožownemu Španičanej wupłaćili. Muž bě so na loterijowej hrě „La Primitiva“ wobdźělił. Kaž statna loterijowa towaršnosć zdźěli, jedna so wo najwyše dobyće w stawiznach španiskeje warianty hry 6 z 49. Dobyćer bě za lisćik wosom eurow wudał. Wón měješe šěsć prawych a přidatnu ličbu. Ličby wupytał bě za njeho kompjuter.
To a tamne (16.10.15)
Znaty telewizijny kuchar a awtor Horst Lichter budźe z 25. rjadom rančeho žołdka (Saumagen) počesćeny. To wozjewi wčera karnewalowe a rejwanske towarstwo Schlotte w Porynsko-Pfalcy. Z wuznamjenjenjom hódnoći towarstwo wjesołosć a žort kaž tež socialne prócowanja a zasłužby Lichtera. Rjad, 740 gramow ćežki kamjeń, napodobnjacy narodnu jědź Pfalcy, chcedźa jemu 21. decembra přepodać.
Pjećlětnaj hólčkaj staj swojej maćeri na balkon wuzamknyłoj, zo móhłoj pizzu jěsć hić. Prjedy hač žonje pytnyštej, zo stej won zamknjenej, běštaj pachołaj hižo twochnyłoj, woblečenaj jako snowboarder a policist. W pizzeriji dóstaštaj słódnu pizzu, byrnjež žane pjenjezy njeměłoj. Předawar pak zawoni policiju, kotraž nasyćenej dźěsći zaso k starosćiwymaj maćerjomaj dowjeze.
To a tamne (15.10.15)
Z wólbernosću jako reakciju na šlagrowu hudźbu swojeho nana w awće je 15lětny w Porynsko-Pfalcy policiju alarmował. Hólc dźeržeše na awtodróze A 6 papjeru z napisom „pomoc“ na wokno awta, štož starosćiwa šoferka wuhlada a policiju zazwoni. Wopytawši swójbu doma zastojnicy wěc spěšnje wujasnichu. Hólc njebě sej swojeho jednanja wědomy. Hač budźe nan w awće nětko hinašu hudźbu słuchać, wšak njeje znate.
Po zranjenju ručneho zhibadła při wobjimanju je žona z New Yorka swojeho wosomlětneho bratrowca wobskoržiła, a to na zboha wulki bolosćowy pjenjez 130 000 dolarow. Hólc měł bóle kedźbować, wona měnješe. Sudnistwo w Bridgeporće pak to hinak widźeše a skóržbu wotpokaza. Žona bě skoržiła, zo njemóže wudawki za hojenje zranjenja zwjesć, štož jeje prawiznik potwjerdźi.
To a tamne (14.10.15)
Pytajo za wobchodom, hdźež přestrjency předawaja, je 85lětna ze swojim awtom na nastupišću dwórnišća w Ansbachu stejo wostała. Zastojnicy policije nochcychu swojimaj wočomaj wěrić, jako tam awto wuhladachu, kotrež drje so pomału, ale zaměrnje twarjenju dwórnišća bližeše. Jako starušku zadźeržachu, wona rjekny, zo je so tróšku zajěła.
Transportne lětadło A 300 je pobrachowaceho městna k přizemjenju a mało ćěriwa dla na dróze wěsće přizemiła. Čłonka wobsadki so při njewšědnym podawku blisko somaliskeje stolicy Mogadishu lochce zrani. Po tym zo njemóžeše mašina ćmy dla po wjacorych pospytach na lětanišću přizemić, rozsudźi so pilot, zo spyta to na bliskej dróze. Lětadło drje wosta wotwonka bjez wjetšich škodow, přiwšěm njeje wjace wužiwajomne.
To a tamne (13.10.15)
Při pytanju za elektrošrotom je so muž w Hamburgu hłuboko do kontejnera nadźěrał a w nim tčacy wostał. Jeničce noze hišće won sahaštej. 22 wohnjowych wobornikow móžeše jeho jeno z pomocu hydrawliskeho nastroja wuswobodźić. Woni powjetšichu dźěru za nutřmjetanje elektriskich nastrojow, po tym zo běchu jich pasanća njezbožowneje pozicije muža w kontejneru dla zazwonili.
Jako pozdatne zetkanje přiwisnikow teroristiskeje milicy Islamski stat je so fototermin kluba nošerjow brody w šwedskim Jönköpingu wukopał. Zawołana policija postara so wo wulki směch. Alarmował bě ju starosćiwy muž. Wón sej mysleše, zo jedna so wo někajkich teroristow, kotřiž so pod čornej chorhoju hromadźa. Na njej zwobraznjena bě skupina brodatych muži, štož podhlad muža posylni, zo móhli to terorisća być.
