To a tamne (17.02.21)
Bosy je policist w Zhorjelcu kołpjej pomhał, kotryž w lodźe tčeše. Wobydlerjo běchu policiju wołali, dokelž bě ptak w jězoru zamjerznył a njemóžeše sej hižo sam pomhać. Zastojnik, kiž so w swobodnym času sam w zamjerznjenych hatach kupa, wuzu sej črije a nohajcy, dźěše na hat, roztepta lód wokoło strachoćiweho kołpja a jeho wuswobodźi. Spočatnje trochu chabłacy tón skónčnje wotleća.
Woda kofejoweje mašiny je woheń w jednym z hosćencow badensko-württembergskeho Plochingena zhašała. Kaž w policajskej rozprawje steji, je so plastowe sudobjo za wotpadki zapaliło, po tym zo bě něchtó zbytki z popjelnika do njeho ćisnył. Płomjenja zeškrěchu hadźicu, kotraž kofejowu mašinu z wodu zastaruje. Na to so woda wuliny a płomjenja podusy. Škoda wosta z 500 eurami poměrnje snadna.
To a tamne (16.02.21)
Za wodźidłom kwada lepili su policisća dźewjećlětneho hólca w Bitburgu ze sydomlětnym sobujěducym. Štyrikolesate jězdźidło wužiwać pak směš jeno z jězbnej dowolnosću. Nan młodeho šofera twjerdźeše, zo hólc kwad dosć derje wobknježi. Přećiwo nanej zahajichu chłostanske jednanje, dokelž bě ćerpjeł, zo jeho syn bjez jězbneje dowolnosće jězdźi. Policistam bě kwad napadnył, dokelž jědźeštej hólcaj bjez nahłownika. TÜV jězdźidła bě nimo toho pjeć lět wotběžany.
Ćeknjene swinje su wčera wječor na awtodróze A 14 w Saksko-Anhaltskej wobchad lemili a zasadźenje policije zawinili. Po informacijach policije bě so transporter skotu njedaloko wotbóčki Peißen zwróćił. Někotre swinje běhachu na to po jězdni. Rumowanje traješe hač do ranja w pjećich a awtodróha do směra na Drježdźany bě dospołnje zawrjena.
To a tamne (15.02.21)
Zaso jako roznošowar nowin dźěłać móže 80lětny George Baley we Wulkej Britaniskej, a to dźakowano elektriskemu kolesu. Nětko móže z 25 km/h po puću być a njetrjeba so ćělnje tak napinać. Po swojich 80ćinach chcyše Baley rańše roznošowanje po dobrych štyrjoch kilometrach poprawom skónčić. Hižo jako jědnaćelětny bě sej wón tak něšto přizasłužił. Po powołanskim žiwjenju na bursy bě roznošowanje jako rentnar přewzał.
W Choćebuskim awtokinje su čłonojo wólbneho wokrjes Choćebuz-Sprjewja-Nysa Maju Wallstein minjeny pjatk wječor za načolnu kandidatku SPD k wólbam zwjazkoweho sejma lětsa w septembru wuzwolili. Koronapandemije dla dyrbjachu sej za wólby tónkróć kmane městno pytać. Čłonojo wuprajichu so jednohłósnje za 34lětnu. Dotalny zapósłanc SPD Ulrich Freese njebě hižo kandidował.
To a tamne (12.02.21)
Čisty paduch: W Sewjerorynsko-Westfalskej je so muž do bydlenja zadobył, zo by dušował. Jako wobydlerka ze swojej dwulětnej dźowku domoj přińdźe, słyšeše wona zwuki z kupjele a steješe před zamknjenymi durjemi. Z pjenjezom móžeše wona durje wotamknyć a wuhlada muža w trochowanej starobje mjez 30 a 40 lětami z trěnjom w ruce. Wón žonje rozłoži, zo chcyše jenož dušować. Žona z bydlenja ćekny a zawoła policiju. Prjedy hač zastojnicy přijědźechu, bě muž preč.
Swinje móža kompjuterowe hry hrać. Tole su wědomostnicy uniwersity Purdure w zwjazkowym staće Indiana w USA zwěsćili. Woni su swinje na to trenowali, z klamu joystick tak posłužować, zo so cursor na wobrazowce na wěste městno pohibuje. Jako myto dawaše chłóšćenku. Fachowcam je to dopokaz, zo su swinje inteligentniše hač dotal myslene.
To a tamne (11.02.21)
W swójskich rjadach přepytować dyrbi britiski zarjad za škit datow, po tym zo je sobudźěłaćer institucije za wjace hač 6 000 puntow šokolodu nakupował. Transakcija je směrnicy zarjada raniła, rěčnik zdźěli. Po tym je něchtó pola předawarja luksusoweje šokolody z kreditnej kartu zarjada do hód 6 248,40 puntow (něhdźe 7 100 eurow) za słódkosće wudał. Nětko pytaja za skućićelom, zo móhli sej pjenjezy wot njeho wróćo žadać.
Tysacy lět stary skelet su w Bayerskej namakali. Hobbyjowy stawiznar bě čłowjeski kosćowc namakał a policiju informował. Zastojnicy přijědźechu z wokrjesnym archeologu a bórze zwěsćichu, zo njejedna so wo pad za kriminalnu policiju. Po prěnich dopóznaćach je namakanka mjez 4 200 a 4 800 lět stara. Kosćowc ležeše njedaloko Romskeho pohrjebnišća, kiž běchu kónc 70tych lět wotkryli.
To a tamne (10.02.21)
Stopy w sněze su paducha w Hamburgu přeradźili. Zastojnicy wuhladachu stopy w předawarni žiwidłow a móžachu jim w čerstwym sněze zwonka twarjena sćěhować. Te wjedźechu policistow skónčnje k 500 metrow zdalenemu wjaceswójbnemu domej. Tam namakachu 22lětneho w swojim bydlenju zhromadnje z runje tak starymaj mužomaj. Na blidźe stejachu štyri bleše Wodki z kupnicy, kotrež zastojnicy jako dopokaz sćazachu.
Masowu karambolažu zawinował je mały koala w Awstralskej. Zwěrjo bě spytało, njedaloko města Adelaide awtodróhu přeprěčić. Při nuzowym borzdźenju je na to pjeć wosobowych awtow do so zrazyło. Rańši powołanski wobchad bě nachwilnje zlemjeny. Nichtó so njezrani. Žonje so poradźi, zwěrjo popadnyć. Koala pak njebě z městnom na zadnjej ławce awta spokojom a sydny so za wodźidło.
To a tamne (09.02.21)
Stopy w sněze su muža přeradźili, kiž je šofera taksija wo swoje pjenjezy wobšudźił. Muž bě šofera taksija prosył, skrótka při tankowni pozastać, zo móhł sej cigarety kupić. Město toho pak so wón zminy. Přiwołani policisća pak njetrjebachu dołho pytać. Slědy w sněze wjedźechu zastojnikow direktnje k durjam domu, w kotrymž podhladny bydleše. 20lětnemu napisachu skóržbu.
Ze sněhowym suwakom w ruce je so 55lětna žona w Durinskej do sobuwobydlerki dała. Kaž policija zdźěli, so 62lětna při tym snadnje zrani, nawoči so rozłamachu. Prawdźepodobnje njejstej so dojednać móhłoj, štó z njeju ma kelko sněha suwać. Policija přepytuje snadneho ranjenja ćěła dla. Nadrobnosće zwady w Sömmerda njeběchu spočatnje znate. Pječa njejstej so žonje wosobinsce znałoj.
To a tamne (08.02.21)
Na wšě 2 753,91 eurow maćerje přečinił je sydomlětny hólc w Hannoveru. Pachoł bě so na internetnej hrě wobdźělił a měješe dowolnosć maćerje, snadnu sumu zasadźić. Žona pak njebě sej wjace toho wědoma, zo su daty jeje kreditneje karty na platformje zapołožene. Syn hraješe tajnje dale, centrala za škit přetrjebarjow zdźěla. Wustróžana mać bě so na centralu wobroćiła. Ta so z poskićowarjom hrow dojedna, zo njetrjeba mać na kóncu wjace hač sto eurow zapłaćić.
Samlutki je 70lětny muž z Jendźelskeje z čołmom Atlantik přeprěčił, cyłkownje 4 800 kilometrow. Srjedź decembra bě na Kanariskich kupach wotjěł a je wčera w Karibice dojěł. Ze swojej jězbu chcyše pjenjezy za organizaciju zběrać, kotraž so wo ludźi stara, kiž su na Alzheimer schorjeli. Frank Rothwell je tak najstarši muž, kotremuž je so tajke něšto poradźiło.
To a tamne (05.02.21)
Magdeburgska katedrala je na nowym dwueurowskim pjenjezu zwěčnjena, kotryž Zwjazkowa banka wudawa. Wurjadny motiw su składnostnje saksko-anhaltskeho prezidentstwa Zwjazkoweje rady wuzwolili. Ministerski prezident Reiner Haseloff (CDU) ma tajki pjenjez hižo w swojej móšni. Zwjazkowa banka chce cyłkownje 30 milionow eksemplarow zhotowić. Motiw dopomina na lońše 500. narodniny Božeho domu w Magdeburgu.
Do prěnjeho poschoda jednoswójbneho domu zrazył je 43lětny ze swojim wosobowym awtom njedaloko Hamburga. Do toho bě sej muž za wodźidłom wusnył. Jako jeho wóz z wulkej spěšnosću přez nasyp zajědźe, tón runjewon wotzběhny, do domu zrazy a w róštach tčacy wosta. Wohnjowa wobora na zbožo jeno snadnje zranjeneho šofera wuswobodźi. Policija wšak zwěsći 1,1 promil alkohola.
To a tamne (04.02.21)
Zwada mjez porikom direktnje před policajskej stražu w Kulmbachu je so za muža w jastwje skónčiła. 30lětny bě so chětro wótře ze swojej přećelku wurěčował. Jako zastojnicy „hamtsce derje znaty“ porik přepruwowachu, so wukopa, zo bě samsny dźeń wukaz zajeća přećiwo mužej dóšoł. Woni jeho zajachu a do jastwa dowjezechu. „Zo policija jeho problemy na te wašnje rozrisa, z tym drje muž ličił njebě“, w zdźělence zastojnikow rěka.
Serum přećiwo koronawirusej preč ćisnyć dyrbjeli su w jendźelskim Rotherhamje. Sobudźěłaćerjo labora běchu zwěsćili, zo njebě specielny chłódźak, w kotrymž šćěpiwo ležeše, přez nóc z milinu zastarany. Tuž dyrbjachu 450 dozow šćěpiwa firmy Biontech/Pfizer wotstronić. Preparat trjeba zymnotu minus 70 stopnjow celsija, zo by so wjacore dny dźeržał.
