To a tamne (26.08.20)
Dokelž bě tank awta prózdny, je so 66lětny w Hessenskej na awtodróze A 5 na strašne pućowanje podał. Z bowom połny kwětkow w ruce zadźeržowaše wón awta, zo by k 20 kilometrow zdalenej tankowni přišoł. Tam kwětki předa a kupi sej z pjenjezami kanister bencina. Na wróćopuću k awtu pak so Durinčan zaběža. Policisća jeho skónčnje namakachu. 66lětny dóstanje chłostanje parkowanja na awtodróze dla, dokelž dyrbjał sam na to dźiwać, zo tank njewuprózdni.
Z awtom dźěda njezbožo zawinił je dwanaćelětny w Delnjej Sakskej. Kaž policija zdźěli, je hólc w emslandskim Haselünne do štoma zrazył. Jeho dowjezechu do chorownje. Wón pak bě jenož snadne zranjenja poćerpjeł. Po prěnich dopóznaćach bě so pachoł ze swojim dźědom zwadźił. Na to wza sej klučik a wotjědźe. Škoda: Wjacore dźesaćitysacy eurow.
To a tamne (25.08.20)
13lětneho za wodźidłom wosoboweho awta je policija w Mecklenburgsko-Předpomorskej krótko před krajnej mjezu Schleswigsko-Holsteinskeje z awtodróhi wjedła. Pódla hólca sedźeše jeho nan, jězbny wučer z Madźarskeje. 53lětny zastojnikam rozłoži, zo chcyše synej na awtodróze jězdźenje nawučić. Hólc bě něhdźe 50 kilometrow po A 24 jěł. 13lětny dóstanje skóržbu. Tež nan dyrbi z chłostanjom ličić, dokelž je hólca jěć dał.
Wopity muž je sej w taksiju pola Kaiserslauterna njedźelu rano tak kruće wusnył, zo dyrbješe zadwělowany šofer taksija policiju wołać. Chětro sprócny 22lětny bě so wot Kaiserslauterna do Enkenbacha-Alsenborna wozyć dał. Tam pak njeje šofer muža hižo wubudźić móhł. Hakle přiwołanym zastojnikam so to poradźi. 22lětny jězbu zapłaći. Policisća jeho wěsće doma wotedachu.
To a tamne (24.08.20)
Nawoči, kiž bě indiski wojowar wo swobodu Mahatma Gandhi pječa wužiwał, su we Wulkej Britaniskej za 260 000 puntow (278 000 eurow) přesadźili. Trochowali běchu pomoc k lěpšemu widźenju na najwjace 15 000 puntow, zdźěla awkciski dom w Bristolu. Při tym njemóže sej nowy wobsedźer ani stoprocentnje wěsty być, zo je Gandhi nawoči woprawdźe wobsedźał. Předawar to twjerdźi.
Přewidne toalety su najnowša atrakcija japanskeje stolicy Tokija. Swětosławny architekt Shigeru Ban bě je naćisnył, zo by špatnu nahladnosć zjawnych hajzlow polěpšił. Njeje-li nichtó na toaleće, móža wšitcy přez wulke škleńcy do nich hladać a widźeć, kak čiste su. Zastupi-li něchtó do škleńčaneje budki w měšćanskim parku, so z wjacorych worštow škleńcy wobstejace wokna awtomatisce přebarbja a su naraz njepřewidne.
To a tamne (21.08.20)
Pjany slepy pasažěr na kolesonošaku pućowanskeho busa je w Berlinje zasadźenje policije zawinował. Naležnosć bě poměrnje strašna, dokelž bě nošak kolesow za najwjace 75 kilogramow twarjeny. Muž sedźeše na nim kaž na ławce parka. Skónčnje so poradźi, bus zadźeržeć a šofera informować. Komunikacija ze slepym pasažěrom bě lědma móžna, dokelž bě chětro napity. Tuž ani njewědźa, kak dołho je z busom „čornje“ sobu jěł.
Pod pomnikoškitom steji wotnětka znaty Berlinski Friedrichstadtski palast. 1984 wotewrjeny twar je posledni socialistiski reprezentaciski twar do powalenja murje. Po měnjenju Berlinskeho kulturneho senata je so architektam poradźiło, „wuměłsce jónkrótne twarjenje“ stworić. W domje su za čas NDR mjez druhim „Kotoł pisaneho“ nawjerćeli.
To a tamne (20.08.20)
Pytajo za picu je so młoda liška do kuchnje zawoda w badensko-württembergskim Immendingenje zabłudźiła – a sobudźěłaćerku chětro nastróžiła. Žona wuhlada małeho rubježnika w kisće w regalu, hdźež wón wotpočowaše. Kolegojo lišku skónčnje wuhnachu. Hajnik zwěrjo derje znaje: Młoda liška njemóže zbrašenja dla sama na hońtwu hić a pyta tuž we wotpadkach a twarjenjach za picu.
Sam so do wobchoda zamknył je paduch w Aalenje. 35lětny bě sej při zachodźe předawarnje žiwidłow wusku škałbu mjez durjemi a škleńcu wutłóčił. We wobchodźe nazběra sej wón tobak, napoje a žiwidła w hódnoće 500 eurow. Jako chcyše wobchod zaso wopušćić, dožiwi złe překwapjenje. Wón bě drje do wobchoda přišoł, přez škałbu pak njemóžeše wjace won. Tuž jemu ničo njezwosta, hač we wobchodźe na policiju čakać.
To a tamne (19.08.20)
Něčeho so wzdać móže w Hamburgu samo stipendij wunjesć. Tamniša Wysoka šula za tworjace wuměłstwo je stipendij za ničočinjenje wupisała. Stajnje 1 600 eurow dóstanu třo požadarjo, kotřiž móža ze swojimi planami jury přeswědčić. Při tym dyrbja rozłožić, što nochcedźa přichodnje činić a kak dołho nic. Móže to manager być, kiž nochce na zhromadźiznach ničo wjace rjec abo něchtó, kiž nochce měsac dołho z awtom na dźěło jěć.
Po wowcynym parfimje pomjenowali su fyzikarjo w Kölnje nowu hwězdu, kiž su w systemje planetow wuhladali. Ta rěka wotnětka S4711. Wjeselo nad hwězdu chcychu z mjenom podšmórnyć. 4711 Echt Kölnisch Wasser bě po wójnje požadny parfim. „Naša wowka je jón wužiwała. Tuž mam pozitiwne dopomnjeće na to“, jedyn ze slědźerjow rjekny.
To a tamne (18.08.20)
Šěsćlětneho kolesowarja na awtodróze zadźeržała je kanadiska policija. Šoferojo běchu policiju informowali, zo je mały kolesowar z nahłownikom na pobóčnej čarje highwayja 403 z města Hamilton do Toronta po puću. Zastojnicy jeho spěšnje nadeńdźechu. Hólc rjekny, zo je po puću wot wowki k swojej maćeri. Policisća so dźiwachu, zo jědźeše hólc do praweho směra na nimale 70 kilometrow dołhej čarje mjez woběmaj městomaj.
Lochkomyslnosć dweju młodostneju ze Sakskeje je na Rujanach zasadźenje pomocnikow zawinowała. 18- a 19lětnaj dowolnikaj chcyštaj póndźelu pola Sassnitza po 70 metrow hłubokej nahłej skłoninje dele lězć. Při tym so 19lětny wotsuny a móžeše so 60 metrow wysoko w strašnym połoženju runje hišće hałzy dodźeržeć. Wjace hač 20 pomocnikow z helikopterom jeju wuchowa.
To a tamne (17.08.20)
Kóčka z Tuneziskeje w připowěšaku nakładneho awta je do městačka Kahl nad Mohanom w Aschaffenburgskim wokrjesu dojěła. Mały „slepy pasažěr“ je drje w Tuneziskej do připowěšaka skočił a tak chcyjo-nochcyjo daloku jězbu na so wzał, samo přez Srjedźne morjo. Jězba skónči so w Delnjej Frankskej. Sobudźěłaćerjo běchu žałosćenje słyšeli. Přiwołana policija namaka lačnu a hłódnu kóčku, kotraž pak je jězbu hewak derje přetrała.
Porjedźenje mopeda je so w sewjerobayerskim Karlstadće z rozbuchnjenjom skónčiło. Ćišć detonacije wutorhny wěka kanalow a wutłóči wodu z toaletow. Při porjedźenju běštej dwaj litraj bencina do kanalizacije wuběžałoj, hdźež nasta strašna měšeńca bencina a powětra. Jako chcyše 25lětny moped startować, dóńdźe k rozbuchnjenju. Nichtó so njezrani.
To a tamne (14.08.20)
Mjez hałzami štoma zatłusnjeneho małeho šupa je policija w Frankfurće nad Mohanom wuswobodźiła. Žona, přechodźowaca so podłu Ryna, bě žałosćenje słyšała. Jako šupa wuhlada, zawoła wona policiju. Zastojnicy nańdźechu hišće dalše młodźo, wočiwidnje bratra zatłusnjeneho. Wobě zwěrjeći běštej chětro wuhłódnjenej. Dowjezechu jej do zwěrjatownje.
Spakosćeny alkohol hnydom sam wupił je paduch w Lipsku-Probstheida. 51lětny bě po prěnich dopóznaćach z wočinjenym woknom do jednoswójbneho domu zalězł, je tam „wšelake alkoholiske napoje“ pokradnył a wupił. Na to drje bě tak mučny, zo lehny so na zahrodźe spać. Pozdźišo jeho tam wobsedźer domu namaka a informowaše policiju. Zastojnicy wzachu pjaneho muža najprjedy raz sobu na rewěr. Dźensa chcychu jeho sudnikej předstajić.
To a tamne (13.08.20)
Mały njetopyr je so do policajskeho rewěra w badensko-württembergskim Ludwigsburgu zabłudźił a so tam na zapinak swěcy powěsnył, zo by sej swój spar popřał. Kolegina měješe to spočatnje za žort, bórze pak zwěsći, zo jedna so woprawdźe wo žiwe zwěrjatko. „Dokelž pak njeje na policajskim rewěrje měrny spar móžny, pušćichu kolegojo njetopyrja z woknom běrowa do swobody“, pisaja zastojnicy w interneće.
Bjez chwatka je so 32lětny zadobywar po wili w Berlinje-Wilmersdorfje rozhladował a w nocy k tomu hišće swěcu zapinył. Wón běhaše w kupanskich toflach wobsedźerja – kiž njebě doma – po chěži. Kedźbliwy susod pak informowaše policiju, wuhladawši swěcu w domje. Nětko chcedźa pruwować, hdy je so podhladny do wile zadobył a hač tam scyła něšto pobrachuje.
